ކައުންސިލް އިންތިޚާބުގައި ސަރުކާރާ އިދިކޮޅަށް ވާދަ ކުރާ ހުރިހާ ކެންޑިޑޭޓުންނަކީ ގައުމުގެ ހަމަޖެހުން ނަގާލާނެ ކެންޑިޑޭޓުންގެ ގޮތުގައި ރައީސް ސިފަ ކުރައްވައިފި
ރައީސް މުއިއްޒު ވިދާޅުވީ ތަރައްގީގެ މަޝްރޫއުތަކާއެކު، މިހާރު ގައުމުގައި ހަމަޖެހުން ގާއިމް ކުރެވިފައިވާ ކަމަށް. އަދި ކައުންސިލް އިންތިޚާބުގައި އިންތިޚާބު ކުރާ ކެންޑިޑޭޓުންނަކީ ސަރުކާރުގެ ކެންޑިޑޭޓުންނަށް ވާން ޖެހޭ ކަމަށާއި، ތަރައްގީ މަޑު ޖައްސައި، މުޖުތަމައުގެ ހަމަނުޖެހުން އަނބުރާ ގެނެސްދޭނެ ބައެއް އިންތިޚާބު ކޮށްގެން ނުވާނެ ކަމަށް.
ޕީއެންސީ ޖަގަހަ ހުޅުވުމުގެ ރަސްމިއްޔާތުގައި ރައީސް ޑރ.މުހައްމަދު މުޢިއްޒު ވާހަކަފުޅު ދައްކަވަނީ | ރައީސް އޮފީސް
ކުރިއަށް އޮތް ލޯކަލް ކައުންސިލް އިންތިޚާބުގައި ސަރުކާރާ އިދިކޮޅަށް ވާދަ ކުރާ ހުރިހާ ކެންޑިޑޭޓުންނަކީ ގައުމުގެ ހަމަޖެހުން ނަގާލާނެ ކެންޑިޑޭޓުންގެ ގޮތުގައި ރައީސުލްޖުމްހޫރިއްޔާ ޑރ.މުހައްމަދު މުއިއްޒު ސިފަ ކުރައްވައިފި އެވެ.
ހޮނިހިރު ދުވަހުގެ ހަވީރު ޕީޕަލްސް ނޭޝަނަލް ކޮންގްރެސް (ޕީއެންސީ) އިން ބޭއްވި އިވެންޓެއްގައި ރައީސް މުއިއްޒު ވިދާޅުވީ އެމަނިކުފާނު މިހުންނެވީ ރައްޔިތުންނާއެކު ކަމަށާއި، ރައްޔިތުންނާއެކު ބައްދަލު ކުރެއްވުންތައް ބާއްވައި، ރައްޔިތުންނާއެކު ކުރިއަށް ދާން ބޭނުންވާ ކަމަށެވެ. އަދި ވިދާޅުވީ މަސައްކަތްތައް ކުރިއަށް ގެންދަނީ މުއައްސަސާތަކުގެ ވެރިންނާ ގުޅިގެން ރައްޔިތުން ބޭނުންވާ ގޮތަށް ކަމަށެވެ.
ރައީސް މުއިއްޒު ވިދާޅުވީ ތަރައްގީގެ މަޝްރޫއުތަކާއެކު، މިހާރު ގައުމުގައި ހަމަޖެހުން ގާއިމް ކުރެވިފައިވާ ކަމަށެވެ. އަދި ކުރިއަށް އޮތް ލޯކަލް ކައުންސިލް އިންތިޚާބުގައި އިންތިޚާބު ކުރާ ކެންޑިޑޭޓުންނަކީ ސަރުކާރުގެ ކެންޑިޑޭޓުންނަށް ވާން ޖެހޭ ކަމަށާއި، ތަރައްގީ މަޑު ޖައްސައި، މުޖުތަމައުގެ ހަމަނުޖެހުން އަނބުރާ ގެނެސްދޭނެ ބައެއް އިންތިޚާބު ކޮށްގެން ނުވާނެ ކަމަށް އެމަނިކުފާނު ވިދާޅުވި އެވެ.
އަޅުގަނޑު މިހުރީ ރައްޔިތުންނާ އެކީގައޭ. ރައްޔިތުންނާ ބައްދަލު ކުރަމުން ރައްޔިތުންގެ މުއައްސަސާތަކާއި، ހުރިހާ ތަނެއްގެ ވެރިންނާއެކު ގާތުން މިސަރުކާރުން މިދަނީ މަސައްކަތް ކުރަމުންނޭ. އަޅުގަނޑު ވެފައިވާ ހުރިހާ ވައުދެއް އެހުރީ ލިޔެވިފައި. އެއާ އެއްގޮތަށް ކަންކަން ބާރު ސްޕީޑްގައި އެކި މަރުހަލާތަކުގައި ކުރިއަށް އެދަނީ. ދާއިރުގައި މިކަންކަމުގައި ހިފައި، އެކަންކަމުގައި ބާރުއަޅައިދީ، ހިތްވަރު ދީ ނޫނިއްޔާ މަގުފަހިކޮށްދޭނެ ބައެއް ކައުންސިލަށް ވައްދަންވާނީ. އެއަށް ހުރަސްއަޅައި، އެކި ކަހަލަ އުޒުތައް ދައްކާ އެކިކަހަލަ ހުރަސްތައް ކުރިމަތިކޮށް، ތަރައްގީ މަޑު ޖައްސަން މުޖުތަމައުގެ ހަމަނުޖެހުން އަނބުރާ ގެނެސްދޭނެ ބައެއް ނޫނޭ. މިރާއްޖޭއަށް މި މުޖުތަމައުއަށް މިހާރު މިވަނީ ހަމަޖެހުން އިރާދަކުރެއްވިއްޔާ ގާއިމް ކުރެވިފައި.ރައީސުލްޖުމްހޫރިއްޔާ ޑރ.މުހައްމަދު މުއިއްޒު
މީގެ އިތުރުން ރައީސް މުއިއްޒު ވިދާޅުވީ މިގައުމުގައި މިހާރު ބަދަލު ހިފުމުގެ ރޫހެއް ނެތް ކަމަށާއި، ސިޔާސީ ކުށްވެރިންނެތ ކަމަށެވެ. އަދި އެއްވެ އުޅުމުގެ މިނިވަންކަން ކުރިއަށް ވުރެ ބޮޑަށް ފަހި ކޮށްދީފައިވާ ކަމަށް އެމަނިކުފާނު ވިދާޅުވި އެވެ.
ނަމަވެސް ރައީސް މުއިއްޒު މަސްވެރީންނަށް ވީ ވައުދު ނުފުއްދާ ކަމަށް ބުނެ ބޮޑު ކަންނެލި މަސްވެރިންގެ ޔޫނިއަނުން މާލެ ކައިރީގައި ކުރި މުޒާހަރާ ރޫޅާލުމަށް ކުރި މަސައްކަތުގެ ތެރެއިން އެ ޔޫނިއަންގެ ސެކްރެޓަރީ ޖެނެރަލް އަދި ރައްޔިތުންގެ މަޖިލީހުގެ ކެންދޫ ދާއިރާގެ އެމްޑީޕީ މެންބަރު މައުރޫފް ޒާކިރު 11 ޑިސެންބަރު 2025 ގައި ހައްޔަރުކޮށްފައިވެ އެވެ. އަދި އޭނާ ހައްޔަރު ކުރުމުގެ ތެރޭގައި ދޯނީގެ ސިޑިން ދާމާ ކޫއްތާފައި ގަދަކަމުން ބޭލުމުގެ ތެރޭގައި ވަރަށް ބޮޑަށް އަނިޔާ ވެސް ވެފައިވެ އެވެ.
މީގެ އިތުރުން "ލޫޓުވައިފި ލޫޓުވައިފި" މުޒާހަރާއިން ވެސް 7 މީހަކު ހައްޔަރުކޮށް ދައުވާ ކުރަން ފޮނުވި އެވެ. ނަމަވެސް ފަހުން ވަނީ ދައުވާ ނުކުރަން ނިންމާފަ އެވެ. މީގެ ތެރޭގައި ވެސް ކުރީގެ މަޖިލިސް މެންބަރުންނާއި، ކައުންސިލަރުން ހިމެނެ އެވެ.
އެމްޑީޕީން ބޭއްވި މި މުޒާހަރާގައި އެތައް ހާސް ބަޔަކު ބައިވެރިވެ، މަޖީދީމަގުން ހިނގާފައި ދާން އުޅުމުން، ފުލުހުން ނުކުމެ ހާލަތާއި ނުބައްދަލު ބާރުގެ ބޭނުންކޮށް، ޕެޕަ ސްޕްރޭ ޖަހައި، އަދި މުޒާހަރާއިގެ ބައިވެރިންނާއި ދެކޮޅަށް ފުރަތަމަ ފަހަރަށް ސޮނިކް ވެޕަން ވަނީ ބޭނުންކޮށްފަ އެވެ.
