"ޝަހީދު ޢަލީ" ސްކޫލް ހުޅުވުމުގެ ރަސްމިއްޔާތުގައި ދަރިވަރުންނަށް ދިން މުއިއްޒު ގެ ފޮޓޯ ޖެހި ލިޔުމަށް އެތައް ބައެއް ގެ ފާޑުކިޔުން!
މި ސްކޫލް ނިންމީ މި ސަރުކާރުން ކަމަށް ދައްކަން މަސައްކަތް ކުރައްވާއިރު، މި މަޝްރޫޢު ހަވާލުކޮށް ފެށީ ރައީސް ސޯލިހު ގެ ސަރުކާރުން 2021 ވަނަ އަހަރު.
ދަރިވަރަކު ދިވެހި ދިދަ، ސްކޫލް ގެ ދިދަ އަދި މުއިއްޒު ގެ ފޮޓޯ އާއި އެކު ހިމަނާފައިވާ ލިޔުން ހިމެނޭ ފޮޓޯ އެއް ހިފައިގެން ހުރި މަންޒަރު ފެންނަ ފޮޓޯ އެއް | ސޯޝަލް މީޑިއާ
ކުރީގެ ރައީސް އިބްރާހިމް މުހައްމަދު ސޯލިހު ގެ ސަރުކާރުން 2021 ވަނަ އަހަރު މަސައްކަތް ހަވާލު ކުރި، "ޝަހީދު ޢަލީ" ސްކޫލް ގެ މަސައްކަތް ނިންމާ، އެ މަޝްރޫޢު ހުޅުވުމަށް ބޭއްވި ރަސްމިއްޔާތުގައި ދަރިވަރުންނަށް ރައީސް ޑރ.މުހައްމަދު މުއިއްޒު ގެ ފޮޓޯ ޖެހި ލިޔުމެއް ދިނުމުން، އެކަމަށް އެތައް ބައެއް ގެ ފާޑުކިޔުން އަމާޒުވެއްޖެ އެވެ.
މި ސްކޫލް ރަސްމީކޮށް ހުޅުވައިދެއްވީ، ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު އެވެ. މި ސްކޫލް ގެ މަސައްކަތަކީ ރައީސް މުއިއްޒު ގެ ދެ އަހަރު ތެރޭ ހުރިހާ މަސައްކަތެއް ކުރި ތަނެއް ކަމަށް ސަރުކާރުން ދަނީ ބުނަމުންނެވެ. ސްކޫލް ހުޅުވުމަށް ބޭއްވި ރަސްމިއްޔާތުގައި ދަރިވަރުންނަށް ދީފައިވާ ލުއި ފޮތެއް ފަދަ ލިޔުމުގައި ވެސް ހިމަނާފައި ވަނީ މި ސްކޫލް އިމާރާތް ކޮށް ނިންމީ މި ވެރިކަމުގައި ކަން ހާމަކުރުމަށް ތައްޔާރުކޮށްފައިވާ ލިޔުމެކެވެ. މީ ގެ ކުރިން ސްކޫލްތައް ހުޅުވާ އިރު ވެސް ސްކޫލް ގެ ބިންގާ އެޅި ތާރީހާއި ގުޅޭ މައުލޫމާތު ދަރިވަރުންނާއި ސީދާ ހިއްސާކޮށް އެފަދަ ލިޔުންތަކާއި އެކު ދަރިވަރުން ގެ ފޮޓޯ ނަގާފަ އެއް ނެތް ކަމަށް އާއްމުން ދަނީ ބުނަމުންނެވެ.
އެ ލިޔުމުގައި ވަނީ ރައީސް މުއިއްޒު އެ ސްކޫލް ގެ ބިންގާ އަޅާ މަންޒަރު ފެންނަ ފޮޓޯ އެއް ހިމަނާފަ އެވެ. އަދި އެ ފޮޓޯ އާއި އެކު ހިމަނާފައިވާ ލިޔުމުގައި ވަނީ،އެ ތަނުގެ ބިންގާ އަޅުއްވައިދެއްވީ އެމަނިކުފާނު ކަމަށެވެ. އެހެންކަމަށް ވާއިރު މިއީ ދަރިވަރުންނާ އެއްވެސް ގުޅުމެއް ހުރިކަމެއް ނޫން ކަން ބައެއް ބެލެނިވެރިން ވަނީ ފާހަގަކޮށްފަ އެވެ. ހަމައެހެންމެ މިއީ މީ ގެ ކުރިން އެއްވެސް ސްކޫލެއް ހުޅުވާ އިރު ވެސް ހިނގާފައި ނުވާ ކަމެއް ކަމަށް އާއްމުން ބުނެ އެވެ.
ރައީސް ސޯލިހު ގެ ސަރުކާރުން 2021 ވަނަ އަހަރު ގެ ޖުލައި މަހުގެ 21 ވަނަ ދުވަހު ޑިޒައިން އެންޑް ބިލްޑް އުސޫލުން ޢިމާރާތް ކުރުމަށް ޙަވާލު ކޮށްފައިނީ އާރުސީސީ އާ އެވެ. 243،119،269.20 (ދުއިސައްތަ ސާޅީސް ތިން މިލިއަން އެއްލައްކަ ނަވާރަ ހާސް ދުއިސައްތަ ފަސްދޮޅަސް ނުވަ ރުފިޔާ ވިހި ލާރި) އަށް މި މަޝްރޫޢު ހަވާލުކޮށްފައި ވަނީ ކޮންޓްރެކްޓަރ ފައިނޭންސް ގެ އުސޫލުން ފަސް އަހަރަށް ބަހާލައިގެން ރިފައިނޭންސް ކުރެވޭ ގޮތަށެވެ.
ނަމަވެސް ސަރުކާރުން ދަނީ މި ސްކޫލް އެއްކޮށް ތަރައްޤީކޮށް ނިންމީ މި ދައުރު ގެ ތެރޭގައި ކަމަށް ދެއްކުމަށް މަސައްކަތް ކުރަމުންނެވެ. އާއްމުން ބުނަނީ ދަރިވަރުންނަށް ދިން ލިޔުމަކީ ވެސް މިއީ މި ސަރުކާރު ގެ ޕްރޮޖެކްޓެއް ގެ ގޮތުގައި ދެއްކުމަށް ކުރި މަސައްކަތުގެ ބައެއް ކަމަށެވެ. ނަމަވެސް ދަރިވަރުން ގެ ކިޔެވުމާއި އަދި އެހެނިހެން ގޮތަކުން ވެސް ގުޅުން ނެތް ކަމެއް މިގޮތަށް ކުރުމުގެ ހަގީގީ މަގްސަދާއި މެދު ފާޑު ކިޔާފަރާތްތަކުން ވަނީ ސުވާލު އުފައްދާފަ އެވެ. އަދި މިއީ ދަރިވަރުން ސިޔާސީ ބޭނުމަށް ބޭނުން ކުރުން ކަމަށް އެފަދަ ފަރާތްތަކުން ޤަބޫލު ކުރެ އެވެ. އާއްމުން މިކަމަށް ފާޑުކިޔަމުން ދިޔަ ނަމަވެސް އެޑިއުކޭޝަން މިނިސްޓްރީ އިން މިހާތަނަށް މިކަމަށް ކޮމެންޓެއް ކޮށްފަ އެއް ނުވެ އެވެ.
