ކުރީގެ ރައީސް ސޯލިހުގެ ސަރުކާރުގައި ބޯހިޔާވަހިކަން ފޯރުކޮށް ދިނުމަށް ހިއްކަން ފެށި ހުޅުމާލެ-ފޭސް 3 އެއްކޮށް ހިއްކާ ނިންމާލައިފި
ހުޅުމާލެ ފޭސް 3ގެ 63 ހެކްޓަރުގެ ބިން ހިއްކުމުގެ އަމަލީ މަސައްކަތް ފަށާފައިވަނީ 23 ސެޕްޓެންބަރު 2023 ގައި. ނަމަވެސް ވެރިކަން ބަދަލުވެގެން ދިއުމާއެކު، އެމަސައްކަތް ކުރިއަށް ގެންގޮސްފައިނުވޭ. މަޝްރޫއުގެ އަމަލީ މަސައްކަތް ފަށާފައިވަނީ އެސަރަހައްދުން ގޯތި ލިބުނު މީހުން މުޒާހަރާއަށް ނުކުތުމުން.
ހުޅުމާލެ ފޭސް-3 | އެމްއޭސީއެލް
ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި ރައްޔިތުންނަށް ބޯހިޔާވަހިކަން ފޯރުކޮށް ދިނުމަށް ހިއްކަން ފެށި ހުޅުމާލެ-ފޭސް 3 އެއްކޮށް ހިއްކާ ނިންމާލައިފި އެވެ.
މިކަން އިއުލާން ކުރެއްވީ ހޮނިހިރު ދުވަހު ޕީއެންސީން ބޭއްވި އިވެންޓެއްގައި ރައީސް ޑރ.މުހައްމަދު މުއިއްޒެވެ.
ރައީސް މުއިއްޒު ވިދާޅުވީ، ބޯހިޔާވަހިކަމުގެ މައްސަލައަކީ މުޅި ރާއްޖެއަށް ދިމާވެފައިވާ މައްސަލައެއް ކަމަށާއި އެ މައްސަލަ ހައްލުކުރުމަށް މިދިޔަ ދެ އަހަރު ދުވަހުގެ ތެރޭގައި ބުރަ މަސައްކަތްތަކެއް ކުރެވިފައިވާ ކަމަށެވެ. އަދި ވިދާޅުވީ ހުޅުމާލޭ ތިންވަނަ ފިޔަވެހި ހިއްކާ ނިމިފައިވާއިރު، ގިރާވަރުފަޅު، ގުޅީފަޅު އަދި އުތުރުތިލަފަޅު ހިއްކުމުގެ މަޝްރޫއު ހަލުއި ދުވެލީގައި ގައި ކުރިއަށްދާ ކަމަށެވެ.
ހުޅުމާލެ ފޭސް 3ގެ 63 ހެކްޓަރުގެ ބިން ހިއްކުމުގެ އަމަލީ މަސައްކަތް ފަށާފައިވަނީ 23 ސެޕްޓެންބަރު 2023 ގަ އެވެ. ނަމަވެސް ވެރިކަން ބަދަލުވެގެން ދިއުމާއެކު، އެމަސައްކަތް ކުރިއަށް ގެންގޮސްފައިނުވެ އެވެ. މަޝްރޫއުގެ އަމަލީ މަސައްކަތް ފަށާފައިވަނީ އެސަރަހައްދުން ގޯތި ލިބުނު މީހުން މުޒާހަރާއަށް ނުކުތުމުންނެވެ.
12 އޯގަސްޓް 2024 ގައި އޭރު ހައުސިންގ މިނިސްޓަރަކަށް ހުންނެވި ޑރ.އަލީ ހައިދަރު ވިދާޅުވެފައިވަނީ ހުޅުމާލެ- ފޭސް3 ގެ ފަޅުން ގޯތި ލިބުނު 699 މީހުންނަށް ގޯތި އެ އަހަރުގެ ނޮވެންބަރު މަހު ދޫކުރާނެ ކަމަށެވެ.
ރައީސް މުއިއްޒުގެ ސަރުކާރަށް ދެއަހަރާއި ބައި ވެގެންދާއިރު، މި ސަރަހައްދުތައް އަވަހަށް ހިއްކައި، ގޯތި ދިނުމުގެ ބަދަލުގައި އިސްކަން ދީފައިވަނީ ފުށިދިއްގަރުފަޅު ހިއްކައި ރަސްމާލެ ތަރައްގީ ކުރުމަށެވެ. އެކަމާ ގުޅިގެން ވެސް ގިނަ ބައެއްގެ ފާޑު ކިޔުން ސަރުކާރަށް އަމާޒުވެގެން ދިޔަ އެވެ.
