2026 ވަނަ އަހަރު ނިމޭއިރު ރާއްޖޭގެ ހުރިހާ ރަށެއްގައި ލެބޯޓްރީ ގާއިމު ކުރެވޭނެ: މިނިސްޓަރު އަބްދުﷲ ނާޒިމް
މި ސަރުކާރު ފެށިއިރު ލެބޯޓްރީ ހިދުމަތް ނުލިބޭ 76 ރަށެއް އޮތް ނަމަވެސް މިހާރު އެ ރަށްތަކުގައި ޕޮއިންޓް އޮފް ކެއާގެ އުސޫލުން އާންމު ޓެސްޓުތައް ގާއިމުކުރެވިފައިވާ ކަމަށް މިނިސްޓަރު ވިދާޅުވި. އަތޮޅުތަކުގެ ޚިދުމަތްތައް ފުޅާކުރުމަށް ރައީސް ޑރ. މުހައްމަދު މުއިއްޒު ވަރަށް އިސްކަންދެއްވާ ކަމަށް.
ހެލްތު މިނިސްޓަރު އަބްދުﷲ ނާޒިމް އިބްރާހިމް | ރައީސް އޮފީސް
2026 ވަނަ އަހަރު ނިމޭއިރު ރާއްޖޭގެ ހުރިހާ ރަށެއްގައި ލެބޯޓްރީ ގާއިމުކޮށް، އާންމު ޓެސްޓުތައް ހަދަން ފެށޭނެ ކަމަށް ހެލްތު މިނިސްޓަރު އަބްދުﷲ ނާޒިމް އިބްރާހިމް ވިދާޅުވެއްޖެ އެވެ.
ރައީސް އޮފީހުން ގެނެސްދޭ "ތަރުޖަމާނާ އެކު" ޕޮޑްކާސްޓުގައި މިނިސްޓަރު ވިދާޅުވީ، މި އަހަރު ނިމޭއިރު ދިވެހި ރާއްޖޭގެ ހުރިހާ ރަށެއްގައި ލެބޯޓްރީގެ ހިދުމަތް ގާއިމުކޮށް މުވައްޒަފުން އެތަނަށް ނަގައި އާންމުކޮށް ބޭނުންވާ ހުރިހާ ޓެސްޓެއް އެ ލެބޯޓްރީ ތަކުގައި ހެދޭނެ ކަމަށެވެ. އަދި މިދޔަ މަހުގެ ތެރޭގައި 4 ރަށަކަށް ގޮސް ލެބޯޓްރީ ހުޅުވައިދެއްވި ކަމަށް މިނިސްޓަރު ވިދާޅުވި އެވެ. އެހެން ނަމަވެސް އެއީ ކޮން ރަށެއް ކަމެއް އަދި ކޮންއިރެއްގައި ފެށި މަޝްރޫއުއެއްކަމެއް މިނިސްޓަރު ވިދާޅެއް ނުވެ އެވެ.
ނާޒިމް ވިދާޅުވީ، އަތޮޅުތަކުގެ ޚިދުމަތްތައް ފުޅާކުރުމަށް ރައީސް ޑރ. މުހައްމަދު މުއިއްޒު ވަރަށް އިސްކަންދެއްވާ ކަމަށެވެ. މި ގޮތުން، އަތޮޅުތެރެއަށް ސިއްހީ ނިޒާމު ފުޅާކުރުމުން މާލެއަށް ބަރޯސާވާ މިންވަރު ކުޑަވެ، މާލޭގެ ހޮސްޕިޓަލުގެ ކިޔޫ ކުޑަވުމަށް މަގުފަހިވާކަން މިނިސްޓަރު ފާހަގަކުރެއްވި އެވެ.
މީހެއްގެ ބަލި ބޭސްފަރުވާ ފެށޭ ހިސާބަކީ ރަނގަޅު ޑައިގްނޯ ސިސްޓަމަކުން. ޑައިގްނޯ ސިސްޓަމަށް ކުރެވޭ އިތުބާރަކީ ބަލިމީހަގެ ބޭސްފަރުވާ އަށް ކުރެވޭ އެންމެ މުހިންމު އިތުބާރު. ޑައިގްނޯ ސިސްޓަމް އަށް އިތުބާރު ނުކުރެވޭ ކަމަށް ވަންޏާ އެ ލިޔެވޭ ޕްރިސްކްރިޕްޝަނަކަށް އެއްވެސް ޕޭޝާންޓެއްގެ އިތުބާރެއް ނޯންނާނެ. ނަތީޖާއަކަށް ވަނީ ޑައިގްނޯސް ސިސްޓަމް ހަރުދަނާ ނުކޮށް ހެލްތު ނިޒާމުގެ ވާހަކަ ނުދެއްކޭނެކަން.ހެލްތު މިނިސްޓަރު އަބްދުﷲ ނާޒިމް އިބްރާހިމް
ނާޒިމް ވިދާޅުވި ގޮތުގައި އެ މަސައްކަތް މި ސަރުކާރުން ފެށިއިރު، ލެބޯޓްރީގެ ޚިދުމަތް ނުލިބޭ 76 ރަށެއް އޮތެވެ. މި ގޮތުން، ޕޮއިންޓް އޮފް ކެއާގެ އުސޫލުން އާންމު ޓެސްޓުތައް އެ ރަށްތަކުގައި ގާއިމުކުރެވިފައިވާ ކަމަށް މިނިސްޓަރު ވިދާޅުވި އެވެ.
އޭގެ އިތުރަށް، ސަރުކާރުގެ ދެވަނަ އަމާޒަކަށްވީ ހުރިހާ ލެބޯޓްރީތައް ގާއިމުކުރުމުގެ މަސައްކަތް ފެށުން ކަމަށް މިނިސްޓަރު ވަނީ ވިދާޅުވެފަ އެވެ.
