ފުށިދިއްގަރުފަޅު ވެސް ހިއްކަނީ ވައްކަން ކުރަން، 200 މިލިއަން ޑޮލަރު ކާލަން ކުރާ ކަމެއް: މެންބަރު މައުރޫފް
މެންބަރު މައުރޫފް ވިދާޅުވީ ކަނޑު ދަތުރެއް ކުރަން ގިނަ ރައްޔިތުން ބޭނުންނުވާ ކަމަށާއި، ބްރިޖުން ގުޅާލެވޭ ސަރަހައްދުތަކުން ބޯހިޔާވަހިކަން ރައްޔިތުން ބޭނުންވާ ކަމަށް. ނަމަވެސް ކުރީ ސަރުކާރުގައި ހުޅުމާލޭގައި އަޅަން ނިންމާފައިވާ ފްލެޓުތައް މިސަރުކާރުން ފުށިދިއްގަރުފަޅަށް ބަދަލުކޮށް، ފްލެޓު އަޅަން ނިންމި ބިން ވެސް އެންމެ ހަ ދުވަސް ތެރޭގައި ޗައިނާގެ ކުންފުންޏަކަށް ވިއްކާލާފައިވާ ކަމަށް އޭނާ ވިދާޅުވި.
ރާއްޖެޓީވީގެ ޓީވީޓޯކް ޕްރޮގްރާމްގައި ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު މައުރޫފް ޒާކިރު ވާހަކަ ދައްކަވަނީ. | ރާއްޖެއެމްވީ
ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ބޯހިޔާވަހިކަމަކީ ބޮޑު ސްކޭމެއް ކަމަށާއި، ފުށިދިއްގަރުފަޅު ވެސް ހިއްކާ ނިމުމާއެކު ވިއްކާލާނެ ކަމަށް މައުލޫމާތު ލިބިފައިވާ ކަމަށް ރައްޔިތުން މަޖިލީހުގެ ކެންދޫ ދާއިރާގެ މެންބަރު މައުރޫފް ޒާކިރު ވިދާޅުވެއްޖެ އެވެ.
ރާއްޖެޓީވީގެ ޓީވީޓޯކް ޕްރޮގްރާމްގައި މެންބަރު މައުރޫފް ވަނީ މިސަރުކާރުގެ ބޯހިޔާވަހިކަމުގެ ސިޔާސަތަށް ވަރަށް ބޮޑަށް ފާޑު ވިދާޅުވެފަ އެވެ. ބޯހިޔާވަހިކަން ފޯރުކޮށްދިނުމުގައި ރައީސް މުއިއްޒުގެ އެއްވެސް ހެޔޮ ނިޔަތެއް ނެތް ކަމަށް އޭނާ ވިދާޅުވި އެވެ.
މެންބަރު މައުރޫފް ވިދާޅުވީ 2025 ވަނަ އަހަރު އެއީ ބޯހިޔާވަހިކަމުގެ އަހަރުގެ ގޮތުގައި ކަނޑައަޅައި، ރަން ޒަމާނުގެ ގޮތުގައި ޕްރޮމޯޓް ކުރި ކަމަށެވެ. ނަމަވެސް ބޯޯހިޔާވަހިކަމާ ގުޅިގެން ކުރެވުނު އެއްވެސް މަސައްކަތެއް ފެންނަން ނެތް ކަމަށާއި، ކުރީ ސަރުކާރުން ދޫކޮށްފައިވާ ގެދޮރުވެރިޔާ ފްލެޓު ހޯދުމަށް ވެސް ރައްޔިތުން ތަކުލީފު އުފުލަން ޖެހުނު ކަމަށް އޭނާ ވިދާޅުވި އެވެ.
މީގެ އިތުރުން ''އެންމެނަށް ބޯހިޔާވަހިކަން" ސިޔާސަތުން ގޯއްޗާ ފެލެޓަށް ހުޅުވާލާފައިވާތީ އެކަމަށް އިޝާރާތް ކުރައްވައި މެންބަރު މައުރޫފް ވިދާޅުވީ އެއީ ވަރަށް ބޮޑު ސްކޭމެއް ކަމަށެވެ. ފުށިދިއްގަރުފަޅު ހިއްކައި، ރަސްމާލެ ނަމުގައި ތަރައްގީ ކުރި ނަމަވެސް އެތަން ވިއްކާލާނެ ކަމުގެ މައުލޫމާތު ލިބިފައިވާ ކަމަށް މެންބަރު މައުރޫފް ވިދާޅުވި އެވެ.
އެއީ ސީދާ ވައްކަން ކުރަން 200 މިލިއަން ޑޮލަރު ކާލަން ވައްކަން ކުރާ ކަމެއް އެއީ. އަޅުގަނޑު މިދަންނަވާ ވާހަކައަކީ މާދަމާއަކީ ދިވެހިރާއްޖެ ދަރާ 500 މިލިއަން ޑޮލަރު ދައްކަން ޖެހިފައި. ކީއްކުރަންތޯ 600 މިލިއަން ޑޮލަރު ދީގެން ކުރާކަމެއް ތޯ އެއީ. ރައްޔިތުން ވިސްނަވާ. ހެޔޮ އެދޭނަމަ އެކަންތޯ ކުރާނީ، ލޯނުތޯ ދައްކާނީ.ރައްޔިތުން މަޖިލީހުގެ ކެންދޫ ދާއިރާގެ މެންބަރު މައުރޫފް ޒާކިރު
ހުޅުމާލެ ތަރައްގީކުރި ގޮތަށް އިޝާރާތް ކުރައްވައި މެންބަރު މައުރޫފް ވިދާޅުވީ ސިނާމާލެ ބްރިޖު އައުމުގެ ކުރީ އެރަށް އާބާދު ކުރުމަށް ގިނަ ދަތިތައް ކުރިމަތިވި ކަމަށެވެ. ނަމަވެސް ސިނަމާލެ ބްރިޖާއެކު ހުޅުމާލެ އާބާދުވެގެން ދިޔައީ ހީވެސް ނުކުރާ ގޮތަށް އަވަހަށް ކަމަށެވެ.
މެންބަރު މައުރޫފް ވިދާޅުވީ ކަނޑުން ދަތުރެއް ކުރަން ގިނަ ރައްޔިތުން ބޭނުންނުވާ ކަމަށާއި، ބްރިޖުން ގުޅާލެވޭ ސަރަހައްދުތަކުން ބޯހިޔާވަހިކަން ރައްޔިތުން ބޭނުންވާ ކަމަށެވެ. ނަމަވެސް ކުރީ ސަރުކާރުގައި ހުޅުމާލޭގައި އަޅަން ނިންމާފައިވާ ފްލެޓުތައް މިސަރުކާރުން ފުށިދިއްގަރުފަޅަށް ބަދަލުކޮށް، ފްލެޓު އަޅަން ނިންމި ބިން ވެސް އެންމެ ހަ ދުވަސް ތެރޭގައި ޗައިނާގެ ކުންފުންޏަކަށް ވިއްކާލާފައިވާ ކަމަށް އޭނާ ވިދާޅުވި އެވެ.
20 އޮގަސްޓް 2023 ގައި އިންޑިއާގެ އެލްއޯސީގެ ދަށުން އިތުރު 4000 ފްލެޓު އަޅަން އެމްޑީޕީގެ ސަރުކާރުން ހަވާލު ކޮށްފައި އޮތީ. މިބޭފުޅުން ވެރިކަމުގެ ކުރީ ކޮޅު އިންޑީއާ އައުޓް ކިޔަމުން އައިސް އިންޑިއާ ދުރަށް ލީ. ދުރަށްލާފައި އެއްބަސްވުމެއްގެ ދަށުން ކުރީ ސަރުކާރުން ހުޅުމާލޭގައި 21،000 ހެކްޓަރު ކަނޑައަޅާފައި އޮތީ 4000 ފްލެޓު އަޅަން. އޮއްވާ އިންޑިއާ ނުލާ ތިމަންނާ މިކަން ކުރާނަމޭ ކިޔާގެން ދެ އަހަރު ފަހުން ހަމަ އެ އެލްއޯސީގެ ދަށުން ހަމަ އެ 4000 ޔުުނިޓް ފުށިދިއްގަރުގައި އަޅަން އެ ނިންމީ ހުޅުމާލޭގައި އެ 4000 ޔުނިޓް އަޅަން އޮތް ތަން ޗައިނާގެ ކުންފުންޏަކަށް ހަ ދުވަސް ތެރޭގައި ވިއްކާލާފައި. މިއީ މީނާގެ އިހުލާސްތެރިކަން ރައްޔިތުންނާ މެދު ހުންނާނެ ގޮތް.ރައްޔިތުން މަޖިލީހުގެ ކެންދޫ ދާއިރާގެ މެންބަރު މައުރޫފް ޒާކިރު
މީގެ އިތުރުން މެންބަރު މައުރޫފް ވިދާޅުވީ ކުރިއަށް އޮތީ ލޯކަލް ކައުންސިލް އިންތިޚާބު ކަމަށާއި، މިދުވަސްވަރު ބޯހިޔާވަހިކަމުގެ އަޑުތައް ވަރަށް ގަދަވާނެ ކަމަށެވެ. އަދި ރާއްޖޭގައި ބޯހިޔާވަހިކަން ނުލިބޭ އެކަކު ވެސް ނުހުންނާނެ ކަމަށާއި، މިއީ މިސަރުކާރުން ހިންގާ ޖަރީމާކަން ރައްޔިތުންނަށް އެނގެން ޖެހޭ ކަމަށް އޭނާ ވިދާޅުވި އެވެ.
