ވޭތުވެދިޔަ ދެ އަހަރު ތެރޭގައި ދަރިވަރުންގެ ޑިގްރީ ޕްރޮގްރާމްތަކަށް 1 ބިލިއަނަށްވުރެ ގިނަ ރުފިޔާ ހޭދަވި: ރައީސް

ވޭތުވެދިޔަ ދެ އަހަރެއްހާ ދުވަހުގެ ތެރޭގައި މަތީ ތައުލީމް ފޯރުކޮށްދިނުމަށް ކޯސްތަކަށް ބިލިއަނަކަށްވުރެ ގިނަ ރުފިޔާ ހޭދަ ކުރެވުނުކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

ބައިނަލްއަޤްވާމީ ތައުލީމީ ދުވަހާ ގުޅިގެން އެކްސްގައި ކުރެއްވި ޕޯސްޓެއްގައި ރައީސް ވިދާޅުވީ، ސަރުކާރުގެ ސިޔާސަތުގައި ޤައުމީ ތަރައްޤީގެ އެންމެ މުހިންމު އެއް ބަހާއަކީ ތަޢުލީމު ކަމަށާއި، ވޭތުވެދިޔަ ދެ އަހަރެއްހާ ދުވަހުގެ ތެރޭގައި ހިލޭ ފުރަތަމަ ޑިގްރީއަށް ކިޔެވުމުގެ ފުރުސަތުގެ ދަށުން އެކަނިވެސް 6،000 އަށްވުރެ ގިނަ ދަރިވަރުން ދަސްވެނި ވެފައިވާކަމަށެވެ. އަދި އެ ދަރުވަރުންގެ ޑިގްރީ ޕްރޮގްރާމްތަކަށް 1 ބިލިއަނަށްވުރެ ގިނަ ރުފިޔާ ދޫކޮށްފައިވާ ކަމަށް ރައީސް ވިދާޅުވި އެވެ.

ރައީސް ވިދާޅުވީ ދެމެހެއްޓެނެވި ތަރައްގީ އާއި ދުނިޔޭގެ ތަރައްގީގެ ބިންގަލަކީ ތައުލީމު ކަމަށެވެ. އޭގެ ތެރެއިން، ރާއްޖޭގެ ތަރައްގީގެ އެންމެ މުހިއްމު ކަމަކަށް ތައުލީމް އިސްކޮށްފައިވާ ކަމަށް ރައީސް ވިދާޅުވި އެވެ. އަދި ތަޢުލީމީ ނިޒާމު ބައްޓަން ކުރުމުގައި ޒުވާނުންގެ ބައިވެރިވުން އިތުރުކޮށް، އެކުދިން ބާރުވެރިކުރުވުމަށާއި، އެންމެހައި ފަރާތްތަކަށް ހަމަހަމަ ފުރުޞަތު ލިބޭ، މުޖުތަމަޢާ ގުޅޭ، އަދި ހެޔޮ ބަދަލުތަކެއް ގެނެސްދޭފަދަ ތަޢުލީމީ ނިޒާމެއް ކަށަވަރުކުރަންޖެހޭކަމަށް ރައީސް ވިދާޅުވި އެވެ.

އޭގެއިތުރުން ރައީސް ވިދާޅުވީ، ދަރިވަރުންގެ ކުރިއެރުމަށް އިންވެސްޓްކޮށް، ތަޢުލީމީ ފުރުޞަތުތައް ފުޅާކުރުމަކީ ހަމައެކަނި ފަރުދުންގެ މުސްތަޤްބަލު ބައްޓަންކުރުމެއް ނޫން ކަމަށާއި، އެއީ ތަނަވަސް، ހަމަހަމަކަން ޤާއިމުވެފައިވާ، އަދި ދަތި ހާލަތްތަކުން އަރައިގަތުމުގެ ޤާބިލުކަން ލިބިގެންވާ ޤައުމެއް ބިނާކުރުމަށް އެޅޭ މުހިންމު ފިޔަވަޅެއް ކަމަށެވެ.

"ތަރުޖަމާނާ އެކު" ޕްރޮގްރާމްގައި ވާހަކަދައްކަވަމުން ހަޔާ އެޑިއުކޭޝަން މިނިސްޓަރު ޑރ. އަލީ ހައިދަރު ވިދާޅުވެފައިވަނީ،  ބޭރުގައި ކިޔަވާ ރާއްޖޭގެ ދަރިވަރުންނަށް ގަވައިދުން ފައިސާ ނުލިބޭތީ އެ ޝަކުވާ ކުރާ ކަމަށެވެ. އަދި ފައިސާ ދޫކުރަން ހަމަޖެހިފައިވާ މުއްދަތަށް ވުރެ ދެ މަސް ކުރިން އެ މަސައްކަތް ފެއްޓެވި ކަމަށް އޭނާ ވަނީ ވިދާޅުވެފަ އެވެ. އެހެން ނަމަވެސް އަށް ހަފުތާ ވަންދެން ދަރިވަރުންނަށް ފައިސާ ނުފޮނުވި ވާ ކަމަށް ހައިދަރު ވަނީ އެއްބަސްވެފަ އެވެ. އެކަން އެހެންވީ ބައެއް މައްސަލަތައް ދިމާވެގެން ކަމަށް ހައިދަރު ވަނީ ވިދާޅުވެފަ އެވެ.