ރައީސް ސޯލިހު ގެ ސަރުކާރުން 2021 ވަނަ އަހަރު މަސައްކަތް ހަވާލުކުރި، ސްކޫލެއް ހުޅުވައި އެއީ ރައީސް މުއިއްޒުގެ ދެ އަހަރު ތެރޭ ހުރިހާ މަސައްކަތެއް ކުރި ތަނެއްކަން ދައްކާ ހަގީގަތް އޮޅުވާލަން ދައުލަތުގެ މީޑިޔާ އިން މަސައްކަތް ކޮށްފި

ރައީސް އިބްރާހިމް މުހައްމަދު ސޯލިހު ގެ ސަރުކާރުން 2021 ވަނަ އަހަރު މަސައްކަތް ހަވާލުކުރި، ޝަހީދު ޢަލީ ސްކޫލް ހުޅުވައި އެއީ ރައީސް މުއިއްޒުގެ ދެ އަހަރު ތެރޭ ހުރިހާ މަސައްކަތެއް ކުރި ތަނެއްކަން ދައްކާ ރައްޔިތުންނަށް ހަގީގަތް އޮޅުވާލަން ދައުލަތުގެ މީޑިޔާ އިން މަސައްކަތް ކޮށްފި އެވެ. 

މި އަހަރުގެ ދިރާސީ އާ އަހަރާއެކު އަންގާރަ ދުވަހު ހުޅުމާލެ ދެވަނަ ފިޔަވަހީގައި ހުޅުވާ މި ސްކޫލް ގެ މަސައްކަތް، ރައީސް ސޯލިހު ގެ ސަރުކާރުން 2021 ވަނަ އަހަރުގެ ޖުލައި މަހުގެ 21 ވަނަ ދުވަހު ޑިޒައިން އެންޑް ބިލްޑް އުސޫލުން ޢިމާރާތް ކުރުމަށް ޙަވާލު ކޮށްފައިނީ އާރުސީސީ އާ އެވެ. 

Advertisement

ހުޅުމާލެ ދެވަނަ ފިޔަވަހީގައި ތަރައްޤީކޮށްފައިވާ މި ސްކޫލަކީ މި ސަރުކާރުން ތަރައްޤީކޮށް ހުޅުވާ ފުރަތަމަ ސްކޫލްއެވެ. އާރްސީސީއާ ހަވާލުކޮށްގެން ތަރައްޤީކުރި މި ސްކޫލްގެ މަސައްކަތް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފައްޓަވައިދެއްވީ 2023 ވަނަ އަހަރުގެ ޑިސެމްބަރު މަހުގައެވެ. އަދި 2 އަހަރުގެ ތެރޭގައި ސްކޫލްގެ މަސައްކަތް ނިންމާ ކިޔަވައިދިނުމަށް މިހާރު ވަނީ ތައްޔާރުވެފައެވެ.  

ދައުލަތުގެ މީޑިއާ އިން ޝާއިިއު ކުރި ހަބަރެއްގެ ތަންކޮޅެއް 

މި މަޝްރޫއު އާއުސީސީ އާއި އެމްޑީޕީ ސަރުކާރުން ހަވާލުކޮށްފައިވަނީ 243،119،269.20 (ދުއިސައްތަ ސާޅީސް ތިން މިލިއަން އެއްލައްކަ ނަވާރަ ހާސް ދުއިސައްތަ ފަސްދޮޅަސް ނުވަ ރުފިޔާ ވިހި ލާރި) އަށެވެ. އަދި މި މަސައްކަތް ހަވާލު ކުރީ ކޮންޓްރެކްޓަރ ފައިނޭންސް ގެ އުސޫލުން ފަސް އަހަރަށް ބަހާލައިގެން ރިފައިނޭންސް ކުރެވޭ ގޮތަށެވެ. 

މި އެއްބަސްވުމުގައި ސަރުކާރުގެ ފަރާތުން 2021 ވަަނަ އަހަރު ސޮއި ކުރި އޭރުގެ އެޑިއުކޭޝަން މިނިސްޓްރީ ގެ ސްޓޭޓް މިނިސްޓަރ، މިހާރުގެ ރައްޔިތުންގެ މަޖިލީހުގެ ޕީއެންސީ މެމްބަރު އަޙްމަދު ރިޔާޒް ވަނީ މިކަން ރާއްޖެ އެމްވީ އަށް ކަށަވަރު ކޮށްދެއްވާފަ އެވެ. 

އިތުބާރު ހުރި މަސްދަރުތަކުން ރާއްޖެ އެމްވި އަށް މައުލޫމާތު ދެއްވި ގޮތުގަ، މީގެ އިތުރުން ވެސް ހުޅުމާލޭގައި އިތުރު ސްކޫލެއްގެ މަސައްކަތް ވެސް ރައީސް ސޯލިހުގެ ސަރުކާރުން ވަނީ  ހަވާލުކޮށްފަ އެވެ. އަދި އިތުރު 2 ސްކޫލެއްގެ މަސައްކަތަށް އެމްޑީޕީ ސަރުކާރުން ބަޖެޓް ކޮށް ވަނީ ބިން ވެސް ހަމަޖައްސާފަ އެވެ.

ޝަހީދު ޢަލީ ސްކޫލަކީ 5 ފަންގިފިލާއަށް ތަރައްޤީ ކޮށްފައިވާ، 50 ކްލާސްރޫމުގެ ސްކޫލެކެވެ. މިސްކޫލްގައި މަލްޓިޕަރޕަސް ހޯލަކާއި، ޒަމާނީ ވަޞީލަތްތަކުގެ އިތުރުން ޓަރފްދަނޑަކާއި އިންޑޯ ކުޅިވަރުތައް ކުޅޭވޭނެ ގޮތްވެސް ވަނީ ހަމަޖައްސާފަ އެވެ. މި ސްކޫލަކީ 1،500 ކުދިންގެ ޖާގައިގެ ސްކޫލެއް ނަމަވެސް ދެ ދަންފަޅިއަށް ކިޔަވައިދޭ ނަމަ 2500 ކުދިންނަށް ކިޔަވައިދެވޭނޭ ކަމަށް ތަޢުލީމީ ވުޒާރާ އިން ވަނީ ކުރިން ބުނެފަ އެވެ. 

ދެ ދަންފަޅިިއަށް ކިޔަވާދޭގޮތަށް އަންގާރަ ދުވަހު ރަސްމީކޮށް މި ސްކޫލް ހުޅުވާއިރު "ޝަހީދު ޢަލީ" ސްކޫލްގައި ކިޔެވުމަށްޓަކައި މިހާތަނަށް 1950 ދަރިވަރަކަށް ޖާގަ ދީފައިވާމަށް ތަޢުލީމީ ވުޒާރާ އިން ހާމަކޮށްފައިވެ އެވެ.

ރައީސް މުއިއްޒު ހައުސިންގ މިނިސްޓަރަކަށް ހުންނަވައިގެން ތަރައްގީ ކުރަންފެށި ހުޅުމާލެ ދެވަނަ ފިޔަވަހީގައި ޓަވަރުތަކެއް އެޅީ ރައްޔިތުންނަށް ބޭނުންވާ ގިނަ އަސާސީ ހިދުމަތްތަކުން މަހުރޫމް ވާ ގޮތަށް އެއްވެސް ކަހަލަ ރޭވުންތެރިކަމެއް ނެތި އެވެ. މިކަން ކަމަށް ހައްލެއް ހޯދައިދިނުމުގެ ގޮތުން އެމްޑީޕީ ސަރުކާރުން ވަނީ މިސްކިތްތަކާ ސްކޫލް ތައް އިމާރާތްކޮށް ނިންމާ، އަދި އިތުރު މިސްކިތްތަކާ ސްކޫލް ތަކުގެ މަސައްކަތް ފަށާފަ އެވެ. 

ރައީސް މުއިއްޒު ގެ ސަރުކާރަށް ދެ އަަހަރު ވެގެން ދިޔަ އިރު، ހަގީގީ މާނައިގައި ރައްޔިތަކަށް ފައިދާހުރި އެއްވެސް ކަމެއް ކޮށްދީފައިނުވާ އިރު، ހީލަތްތެރި ކަމާ އެކު ރައްޔިތުންނަށް ހަގީގަތް އޮޅުވާލާ، ކުރީ ސަރުކާރުން ކުރި ގިނަ މަސައްކަތް ތަކެއްގެ ކްރެޑިޓް ނަގަން މަސައްކަތް ކުރާ ކަމަށް ގިނަ ބަޔަކު ތުހުމަތު ކުރެ އެވެ.