އިޒްރޭލް އިން އެމެރިކާއާ އެކު 10 އަހަރުގެ ސަލާމަތީ އެއްބަސްވުމެއް ޤާއިމު ކުރަން މަޝްވަރާ ކުރަނީ

އެމެރިކާ އާއެކު ދިގު މުއްދަތުގެ ސަލާމަތީ އެއްބަސްވުމެއް ޤާއިމު ކުރުމަށް އިޒްރޭލް އިން މަޝްވަރާ ކުރުމަށް ތައްޔާރު ވަމުން އަންނަ ކަމަށް ރިޕޯޓު ކޮށްފި އެވެ. 

މިކަން ރިޕޯޓު ކޮށްފައި ވަނީ ފައިނޭންޝަލް ޓައިމްސްގަ އެވެ. އެ ރިޕޯޓުގައި ބުނެފައި ވަނީ، އެމެރިކާ ސަރުކާރާ އެކު އިޒްރޭލް އިން މަޝްވަރާ ކުރުމަށް ބޭނުން ވަނީ 10 އަހަރު ދުވަހުގެ ސަލާމަތީ އެއްބަސްވުމެއް އެކުލަވާލުމަށެވެ. ނަމަވެސް، އިޒްރޭލްގެ ލީޑަރުން ބޭނުން ވަނީ އެމެރިކާ އިން ހޯދަމުން އަންނަ ފައިސާގެ އެހީގެ އަދަދު މަދު ކުރަން ކަމަށާއި، އެއާ އެކު ވެސް އެމެރިކާ ސިފައިންގެ އެހީތެރިކަން ދިގު މުއްދަތަކަށް ގެންދިޔުމަށް އެދޭ ކަމަށް ބުނެފައިވެ އެވެ. 

އިޒްރޭލްގެ ސިފައިންނާއި، ދިފައީ ވުޒާރާގެ މާލީ މަޝްވަރާދޭ އިސް ބޭފުޅާގެ މަގާމުން ވަކިވުމުގެ ކުރިން ފައިނޭންޝަލް ޓައިމްސްއަ ވާހަކަ ދައްކަމުން ގިލް ޕިންޗަސް ބުނެފައި ވަނީ، އެ މަޝްވަރާތައް އަންނަ ހަފުތާ ތަކުގެ ތެރޭގައި އޮންނާނެ ކަމަށް ބެލެވޭ ކަމަށެވެ. އެގޮތުން އެ މަޝްވަރާ ތަކުގައި ފައިސާގެ އެހީ އަށް ވުރެ، ގުޅިގެން ކުރާ ސިފައިންގެ އަދި ދިފާއީ ޕްރޮޖެކްޓު ތަކަށް އިސްކަން ދިނުމަށް އިޒްރޭލް އިން ބޭނުންވާ ކަމަށް ބުނެފައިވެ އެވެ. 

އެކަމާ ގުޅިގެން، އެމެރިކާގެ ސްޓޭޓް ޑިޕާޓްމަންޓުގެ ބަހެއް ހޯދުމަށް ރޮއިޓާސް އިން ކުރި މަސައްކަތް ކާމިޔާބުވެފައި ނުވެ އެވެ. 

ފައިނޭންޝަލް ޓައިމްސްއާ ވާހަކަ ދައްކަމުން ޕިންޗަން ބުނެފައި ވަނީ، އެ ކޮންޓެކްސްޓުގައި މި ޕާޓްނާޝީޕް އަކީ ހަމައެކަނި ފައިސާގެ މައްސަލަ އަށް ވުރެ މުހިންމު ކަމެއް ކަމަށެވެ. އެގޮތުން ފައިސާއާ އެއްވަރުގެ ގިނަ ކަންކަން އެބަހުރި ކަމަށާއި، އެއީ އިތުރު ފުޅާ ކަމެއްގައި ކުރިއަށް ގެންދެވޭނެ ކަންކަން ކަމަށް އޭނާ ބުންޏެވެ. 

އެމެރިކާގެ އަސްކަރީ ހަތިޔާރުތައް ގަތުމަށް އިޒްރޭލަށް އަހަރަކު ބޭނުން ކުރެވޭ 3.3 ބިލިއަން އެމެރިކާ ޑޮލަރުގެ ސީދާ މާލީ އެހީ، ނުވަތަ "ފްރީ މަނީ" އަކީ އެއްބަސްވުމުގެ އެއްބައި ކަމަށްވާއިރު، އެއީ ހަލުވި ގޮތެއްގައި މަދު ވާނެ ކަމެއް ކަމަށް ވެސް އޭނާ ވަނީ ބުނެފަ އެވެ. 

2016 ވަނަ އަހަރުގެ ތެރޭގައި އެމެރިކާ އާއި އިޒްރޭލް އިން ވަނީ، 2028 ވަނަ އަހަރުގެ ސެޕްޓެމްބަރު މަހާ ހަމައަށް 10 އަހަރަށް 38 ބިލިއަން އެމެރިކާ ޑޮލަރިގެ ސިފައިންގެ އެހީތެރިކަން ދިނުމަށް މެމޮރެންޑަމް އޮފް އަންޑަސްޓޭންޑިން އެއް ގައި ސޮއި ކޮށްފަ އެވެ. މި އެހީގެ ތެރެއިން 33 ބިލިއަން އެމެރިކާ ޑޮލަރަކީ ސިފައިންގެ ހަތިޔާރު ގަތުމަށް ދޭ ގްރާންޓް ކަމަށްވާއިރު، ފަސް ބިލިއަން އެމެރިކާ ޑޮލަރަކީ ދިފާއީ ނިޒާމު ތަކަށް ދޭ އެހީ އެވެ. 

މި ހިނގާ ޖަނަވަރީ މަހުގެ ކުރީ ކޮޅު އިޒްރޭލްގެ ބޮޑު ވަޒީރު ބެންޖަމިން ނަތަންޔާހޫ ވިދާޅުވެފައި ވަނީ، އިޒްރޭލް އިން އެމެރިކާގެ އަސްކަރިއްޔާ އަށް ބާރޯސާވެފައިވާ އޮތުން، ކުރިއަށް އޮތް ދިހަ އަހަރުގެ ތެރޭގައި އިންތިހާ އަށް މަދު ކުރެވޭނެ ކަމަށް އުންމީދު ކުރައްވާ ކަމަށެވެ.