ވެނެޒުއެލާގެ ރައީސް ޑެލްސީ، އެމެރިކާ އަށް ވަޑައިގަންނަވަނީ

ވެނެޒުއެލާގެ ވަގުތީ ރައީސް ޑެލްސީ ރޮޑްރިގޭޒް، ވަރަށް އަވަހަށް އެމެރިކާ އަށް ވަޑައިގަންނަވާނެ ކަމަށް ރިޕޯޓު ކޮށްފި އެވެ. 

މީޑިއާ ތަކުގައި މިގޮތަށް ރިޕޯޓު ކޮށްފައި ވަނީ، އެމެރިކާގެ ރިޔާސީ ގަނޑުވަރު ވައިޓް ހައުސްގެ އިސް އޮފިޝަލަކާ ހަވާލާދީ އެވެ. މިއީ އެމެރިކާގެ ރައީސް ޑޮނަލްޑް ޓްރަމްޕް، ވެނެޒުއެލާއާ އެކު ގުޅުން ރަނގަޅު ކުރުމަށް މަސައްކަތް ކުރައްވަމުން އަންނަ ކަމުގެ ނިޝާނެއް ކަމަށް ވެސް މީޑިއާ ތަކުގައި ބުނެފައިވެ އެވެ. 

މިއީ އެމެރިކާގެ ނިއު ޔޯކުގައި ހުންނަ އދ ގެ މައި މަރުޒަކަށް ވަޑައިގެންނެވުން ފިޔަވައި، ފާއިތުވި 25 އަހަރަށް ވުރެ ގިނަ ދުވަސްގެ ތެރޭގައި ވެނެޒުއެލާގެ ރައީސް އަކު އެމެރިކާ އަށް ވަޑައިގަންނަވާ ފުރަތަމަ ފަހަރެވެ. ވެނެޒުއެލާގެ ވަގުތީ ރައީސް ކަމުގެ ހުވާ ޑެލްސީ ކުރެއްވީ، އެމެެރިކާ އިން ހިންގި އޮޕަރޭޝަނެއްގައި އެ ޤައުމުގެ ރައީސް ނިކޮލަސް މަދޫރޯ ހައްްޔަރު ކުރުމާ އެކު އެވެ. 

ބުދަ ދުވަހު ޑެލްސީ ވިދާޅުވެފައި ވަނީ، އެއްވެސް ބިރެއް އަދި ޖެހިލުމެއް ނެތި އޭނާ ގެންދަވަނީ އެމެރިކާއާ އެކު މަޝްވަރާތައް ކުރައްވަމުން ކަމަށެވެ. ތަފާތު ގިނަ ދަތި ކަންތައްތަކާ ކުރިމަތިލާން ޖެހުނު ނަމަވެސް، މަސައްކަތް ކުރަނީ ޑިޕްލޮމަސީގެ ރިވެތި އުސޫލުގެ ތެރެއިން ކަންކަން ކުރިއަށް ގެންދަން ކަމަށް ވެސް ޑެލްސީ ވިދާޅުވި އެވެ. 

ބައިނަލްއަޤުވާމީ މަސްރަހު ދިރާސާ ކުރަމުން އަންނަ ފަރާތްތަކުން ބުނެފައިވާ ގޮތުގައި، މި ކަމުގެ ސަބަބުން ދޭހަކޮށްދެނީ އެމެރިކާ އާއި ވެނެޒުއެލާއާ ދެމެދު ގޮތް ގުޅުމަށް ކޮންމެ ވެސް ވަރެއްގެ ބަދަލެއް އައިސްފައިވާ ކަމެވެ. އެގޮތުން މިއީ، އެމެރިކާ އިން ވެނެޒުއެލާގެ ރައީސް މަދޫރޯ ހައްޔަރު ކުރި ފަހުން އައިސްފައިވާ ބަދަލެއް ކަމަށް ވެސް މާހިރުން ފާހަގަ ކޮށްފައިވެ އެވެ. 

ޑެލްސީ އަކީ ވެނެޒުއެލާގެ ރައީސް ނިކޮލަސް މަދޫރޯގެ ނައިބު ރައީސް އެވެ. މަދޫރޯގެ ސަރުކާރާ އެމެރިކާ އިން އަބަދު ވެސް ދެކޮޅު ހަދަމުންް އައިސްފައިވާއިރު، ޑެލްސީ އަކީ އެ ސަރުކާރުގެ ނައިބު ރައީސް އެވެ. އަދި މަދޫރޯއާ އެންމެ އަރިސް، އަދި ވެނެޒުއެލާގައި ސިޔާސީ ގޮތުން ވެސް ނުފޫޒު ގަދަ ބޭފުޅެކެވެ. 

ބުދަ ދުވަހު ޑެލްސީ ވަނީ، ވެނެޒުއެލާގެ ސިފައިންގެ ލީޑާޝިޕް އަށް އިސްލާހީ ބަދަލު ތަކެއް ގެންނަވައިފަ އެވެ. އަދި ސަރަހައްދީ ކޮމާންޑު ތަަކަށް ވަނީ 12 އޮފިސަރަކު އައްޔަން ކުރައްވައިފަ އެވެ. 

ދާދި އަވަހަށް ޑެލްސީ އެމެރިކާ އަށް ވަޑައިގަންނަވާނެ ކަމަށް ހާމަ ކޮށްފައި ވީ ނަމަވެސް، ސީދާ ތާރީޚެއް ކަނޑައަޅާފައި ނުވާ ކަމަށް ވެސް ވައިޓް ހައުސްގެ މަސްދަރުން ވަނީ ބުނެފަ އެވެ.