ޓްރަމްޕް އާއި އަލް ޝަރާ ފޯނުން މަޝްވަރާ ކުރައްވައި، ވަރުގަދަ ސީރިއާ އަކަށް އެދިވަޑައިގެންފި

ސީރިއާގެ ރައީސް އަޙުމަދު އަލް ޝަރާ އާއި، އެމެރިކާގެ ރައީސް ޑޮނަލްޑް ޓްރަމްޕް މަޝްވަރާ ކުރައްވައިފި އެވެ.

ހޯމަ ދުވަހު އަލް ޝަރާ އާއި ޓްރަމްޕް ވާހަކަ ދައްކަވައި މަޝްވަރާ ކުރައްވާފައި ވަނީ ފޯނުން ގުޅުއްވައިގެންނެވެ. އެކަން ހާމަ ކޮށްފައި ވަނީ ސީރިއާގެ ރިޔާސީ އޮފީހުންނެވެ. 

ސީރިއާގެ ރިޔާސީ އޮފީހުން ބުނީ އަލް ޝަރާ އާއި ޓްރަމްޕް، ބާރުވެރި އަދި އެކުވެރި ސީރިއާ އެއް ބިނާ ކުރުމަށް އެދިވަޑައިގެން މަޝްވަރާ ކުރައްވާފައިވާ ކަމަށެވެ. ހަމަ އެހެންމެ، ސަރަހައްދީ އަދި ބައިނަލްއަޤުވާމީ ގޮންޖެހުންތަކާ ކުރިމަތިލުމުގެ ޤާބިލުކަން ސީރިއާ އަށް ލިބިގެންދާނެ ކަމަށް ދެ ރައީސުން ވެސް އުންމީދު ކުރައްވާ ކަމަށް އެ އޮފީހުން ވަނީ ބުނެފަ އެވެ. 

މީގެ އިތުރުން ސީރިއާގެ ދައުލަތުގެ ތެރޭގައި ކުރުދީޝް ރައްޔިތުންގެ ހައްގުތައް ރައްކާތެރި ކުރުމާާ ގުޅޭ ގޮތުން ވެސް ދެ ރައީސުން ވާހަކަ ދައްކަވާފައިވާ ކަމަށާއި، އައިސިސް ޖަމާއަތާ ދެކޮޅަށް މަސައްކަތް ކުރުމުގައި އެއްބާރުލުން ދިނުމުގައި ދެމި ތިބުމަށް އެއްބަސްވެ ވަޑައިގެންފައިވާ ކަމަށް ވެސް ސީރިއާގެ ރިޔާސީ އޮފީހުން ބުނެފައިވެ އެވެ. 

ޓްރަމްޕް އާއި އަލް ޝަރާ ފޯނުން ގުޅުއްވައި މަޝްވަރާ ކުރައްވާފައި ވަނީ، ސީރިއާގެ ސަރުކާރާއި ކުރުދީންގެ ލީޑަރުންގެ ބެލުމުގެ ދަށުން ހިންގާ ސީރިއާ ޑިމޮކްރެޓިކް ފޯސަސް އެކުވެރި ކުރުމުގެ މުހިންމު އެއްބަސްވުމަކަށް އައި ފަހުންނެވެ. އެހެން ނަމަވެސް، އެ އެއްބަސްވުމަށް ފަހު ވެސް ދެ ފަރާތުގެ ދެމެދުގައި އަދިވެސް ނުތަނަވަސްކަން އޮތް ކަމަށް ރިޕޯޓުތައް ބުނެ އެވެ. 

ސީރިއާގެ ރިޔާސީ އޮފީހުން ބުނެފައިވާ ގޮތުގައި އަލް ޝަރާ އާއި ޓްރަމްޕް ވަނީ ސީރިއާގެ ސަރަހައްދީ ހިމާޔަތާއި، މިނިވަންކަން ރައްކާތެރި ކުރުމުގެ މުހިންމު ކަމަށް ވެސް ބާރު އަޅުއްވައިފަ އެވެ. އަދި ސީރިއާގައި ސުލްހަ އާއި އަމާންކަން ޤާއިމު ކުރުމަށް ކުރާ ހުރިހާ މަސައްކަތަކަށް ތާއީދު ކުރައްވާ ކަމަށް ޓްރަމްޕް ވިދާޅުވެފައިވާ ކަމަށް ވެސް ހާމަ ކޮށްފައިވެ އެވެ. 

ސީރިއާގެ ވެރިކަމާ އަލް ޝަރާ ހަވާލުވެ ވަޑައިގެންނެވި ފަހުން، އެމެރިކާ އިން އަންނަނީ އެ ޤައުމާ އެކު ގުޅުން ބަދަހި ކުރުމަށް މަސައްކަތް ކުރަމުންނެވެ. ސީރިއާގެ ރިޔާސީ އޮފީހުން ބުނީ އެ މަޝްވަރާގައި، ސީރިއާ އަށް ފުރިހަމަ ފުރުސަތު ތަކެއް ދިނުމުގެ މުހިންމު ކަމަށް ބާރު އަޅުއްވާފައިވާ ކަމަށެވެ. އަދި ރަނގަޅު މުސްތަޤުބަލަކާ ދިމާލަށް ސީރިއާ ދިޔުމަށް އެހީތެރިވުމުގެ މުހިންމު ކަމަށް ދެ ރައީސުން ވެސް ބާރު އަޅުއްވާފައިވާ ކަމަށް ބުނެފައިވެ އެވެ. 

މާހިރުން ފާހަގަ ކޮށްފައިވާ ގޮތުގައި ޓްރަމްޕް އާއި އަލް ޝަރާގެ މި ފޯނު ކޯލަކީ މުހިންމު މަޝްވަރާ އަކަށް ވާނެ އެވެ. ޚާއްސަކޮށް ދެ ޤައުމުގެ ދެ މެދުގައި އޮތް ގުޅުން ރަނގަޅު ކުރުމާ އެކު، އެކުގައި މަސައްކަތް ކުރުމުގެ ބާރަކަށް ވާނެ ކަމަށް މާހިރުން ދެކެ އެވެ.