އެމެރިކާގެ ރައީސް ޓްރަމްޕްގެ އަތްޕުޅުގައި ނޫފައިގެންފައި ހުރި ނިޝާންތަކެއް ފެނުމާ ގުޅިގެން އެއީ މޭޒެއްގައި އަތްޕުޅު ޖެހިގެން ދިމާވި ކަމެއް ކަމަށް އޭނާ ވިދާޅުވެއްޖެ
އުމުރުން 79 އަހަރުގެ ޓްރަމްޕަކީ އެމެރިކާގެ ތާރީޚުގައިވެސް މަގާމާ ހަވާލުވި އެންމެ ދޮށީ ރައީސް ކަމަށްވާއިރު، އޭނާގެ އަތްޕުޅުން ފެންނަ މިފަދަ ނިޝާންތަކާއި، ފައިންޕުޅު ދުޅަވުމާއި، އަދި ބައެއް ރަސްމީ ޖަލްސާތަކުގައި ނިދިޖެހޭ މަންޒަރު ފެނުމުން އޭނާގެ ސިއްހީ ހާލަތާ މެދު ގިނަ ބަޔަކު ދަނީ ކަންބޮޑުވުން ފާޅުކުރަމުން.
ޑާވޯސް ގައި "ބޯޑް އޮފް ޕީސް" އިނިޝިއޭޓިވްގެ ޗާޓަރު އިއުލާނު ކުރެއްވުމަށް ބޭއްވި ރަސްމިއްޔާތުގައި އެމެރިކާގެ ރައީސް ޑޮނަލްޑް ޓްރަމްޕްގެ އަތްޕުޅުގައި ނޫފައިގެންފައިވާ ތަނެއް ވަނީ ފާހަގަ ވެފައި - ޖެނުއަރީ 22، 2026. | ރޮއިޓަސް
އެމެރިކާގެ ރައީސް ޑޮނަލްޑް ޓްރަމްޕްގެ އަތްޕުޅުގައި ނޫފައިގެންފައި ހުރި ނިޝާންތަކެއް ފެނުމާ ގުޅިގެން އޭނާގެ ސިއްހީ ހާލަތާ މެދު ގިނަ ބައެއްގެ މެދުގައި ސުވާލު އުފެދުނު ނަމަވެސް، އެއީ މޭޒެއްގައި އަތްޕުޅު ޖެހިގެން ދިމާވި ކަމެއް ކަމަށް ވިދާޅުވެ 79 އަހަރުގެ ރައީސް އެ ވާހަކަތައް ދޮގުކުރައްވައިފި އެވެ.
ވައިޓް ހައުސް އަށް އެނބުރި ވަޑައިގަތް ފަހުން ޓްރަމްޕްގެ ކަނާތްޕުޅުން މިފަދަ ނޫފައިގަތުމުގެ ނިޝާންތައް ގިނަގިނައިން ފެންނަމުން ދާއިރު، ގިނަ ފަހަރަށް އެ ނިޝާންތައް ފޮރުއްވަނީ ބެންޑޭޖް ނުވަތަ މޭކަޕް ބޭނުންކުރައްވައިގެންނެވެ.
ވައިޓް ހައުސް އިން ހާމަކުރި ގޮތުގައި، މިކަން މިހެން ދިމާވަނީ ގިނަގިނައިން މީހުންނާ ސަލާމްކުރެއްވުމުގެ ސަބަބުންނާއި، ހިތުގެ ދުޅަހެޔޮކަމަށްޓަކައި ބޭނުންކުރައްވާ އެސްޕިރިން ބޭހުގެ ސަބަބުން ހަންގަނޑު ތުނިވެ ނޫފައިގަތުމަށް ފަސޭހަވާތީ ކަމަށެވެ.
ނަމަވެސް، ސްވިޒަލޭންޑްގެ ޑާވޯސްގައި ބޭއްވުނު ވޯލްޑް އިކޮނޮމިކް ފޯރަމްގައި ނަގާފައިވާ ފޮޓޯތަކުން ފެންނަނީ، މިފަހަރު ޓްރަމްޕްގެ ވާތްޕުޅުގައިވެސް އެފަދަ ކުލަގަދަ ނޫފައިގަތުމުގެ ނިޝާންތަކެއް ހުރި މަންޒަރެވެ. މިއީ ޓްރަމްޕް އިސްނަންގަވައިގެން ފެއްޓެވި "ބޯޑް އޮފް ޕީސް" އިނީޝިއޭޓިވްގެ ރަސްމިއްޔާތުގެ ތެރެއިން ނަގާފައިވާ ފޮޓޯތަކެކެވެ. މި ފޮޓޯތައް ސޯޝަލް މީޑިއާގައި ވަރަށް ބާރަށް ފެތުރިގެން ދިޔަ އެވެ.
އެއަރ ފޯސް ވަންގައި ނޫސްވެރިން ކުރި ސުވާލުތަކަށް ޖަވާބު ދެއްވަމުން ޓްރަމްޕް ވިދާޅުވީ، އެއީ މޭޒެއްގައި އަތްޕުޅު ޖެހިގެން ވީކަމެއް ކަމަށެވެ. އަދި ހިތުގެ ބަލިން ރައްކާތެރިވާން ބޭނުން ނަމަ އެސްޕިރިން ބޭނުންކުރުމަށާއި، ނަމަވެސް އޭގެ ސަބަބުން ކުޑަކޮށް ނޫފައިގަތުން އެކަށީގެންވާ ކަމަށް އޭނާ ވިދާޅުވި އެވެ. މީގެ ކުރިން ވައިޓް ހައުސް އިން ވެސް ވަނީ މިކަމާ ގުޅޭގޮތުން މިފަދަ މޭރުމަކުން ޖަވާބު ދީފަ އެވެ.
އުމުރުން 79 އަހަރުގެ ޓްރަމްޕަކީ އެމެރިކާގެ ތާރީޚުގައިވެސް މަގާމާ ހަވާލުވި އެންމެ ދޮށީ ރައީސް ކަމަށްވާއިރު، އޭނާގެ އަތްޕުޅުން ފެންނަ މިފަދަ ނިޝާންތަކާއި، ފައިންޕުޅު ދުޅަވުމާއި، އަދި ބައެއް ރަސްމީ ޖަލްސާތަކުގައި ނިދިޖެހޭ މަންޒަރު ފެނުމުން އޭނާގެ ސިއްހީ ހާލަތާ މެދު ގިނަ ބަޔަކު ދަނީ ކަންބޮޑުވުން ފާޅުކުރަމުންނެވެ.
ޓްރަމްޕްގެ ފައިންޕުޅު ދުޅަވަނީ "ކްރޮނިކް ވީނަސް އިންސަފިޝިއެންސީ" ނަމަކަށް ކިޔާ ބައްޔެއްގެ ސަބަބުން ކަމަށް ސަރުކާރުން ވަނީ މިދިޔަ އަހަރު ހާމަކޮށްފަ އެވެ. މިއީ ލޭގެ ދައުރުވުމަށް ދިމާވާ މައްސަލައެއްގެ ސަބަބުން ފައި ދުޅަވެ، މަސްގަނޑަށް ތަދުވާ ބައްޔެއް ކަމަށްވެ އެވެ.
މިދިޔަ އަހަރު ކުއްލި ގޮތަކަށް ހޮސްޕިޓަލަށް ކުރެއްވި ޒިޔާރަތަކާ ގުޅިގެންވެސް އޭނާގެ ސިއްހީ ކަންކަން ސިއްރުކުރާ ކަމުގެ ޝައްކުތަކެއް އުފެދުނެވެ. ނަމަވެސް އޭގެ ހަފުތާތަކެއް ފަހުން ޓްރަމްޕްގެ ޑޮކްޓަރު ހާމަކުރި ގޮތުގައި، އެމް.އާރް.އައި ރިޕޯޓްތަކުން ދައްކާ ގޮތުގައި ރައީސްގެ ހިތާއި ލޭހިނގާ ނިޒާމުގެ ހާލަތު ވަރަށް ރަނގަޅެވެ.
