ޓްރަމްޕް ދަތުރު ކުރައްވަމުން ގެންދެވި އެއާ ފޯސް ވަން، އިލެކްޓްރިކަލް މައްސަލަ އެއް ޖެހި އަނބުރާލަން ޖެހިއްޖެ

އެމެރިކާގެ ރައީސް ޑޮނަލްޑް ޓްރަމްޕް ދަތުރު ކުރައްވަމުން ގެންދެވި އެއާ ފޯސް ވަން އަށް މައްސަލަ އެއް ދިމާވެ އަނބުރާލަން ޖެހިއްޖެ އެވެ.

މި ހާދިސާ ހިނގާފައި ވަނީ ސްވިޒަލެންޑުގެ ޑާވޯސްގައި އޮތް ވޯލްޑް އިކޮނޮމިކް ފޯރަމް އަށް ޓްރަމްޕް ދަތުރު ކުރައްވަމުން ގެންދަވަނިކޮށެވެ. މި ހާދިސާ ހިނގާފައި ވަނީ ޓްރަމްޕް ދަތުރުފުޅު ފެއްޓެވިތާ ގާތް ގަނޑަކަށް އެއް ގަޑިއިރު ފަހުންނެވެ. 

އެމެރިކާގެ ރިޔާސީ ގަނޑުވަރު، ވައިޓް ހައުސްގެ ޕްރެސް ސެކްރެޓަރީ ކެރޮލިން ލެވިޓް ވިދާޅުވި ގޮތުގައި، ޓްރަމްޕް އާއި އެމަނިކުފާނުގެ މުވައްޒަފުން އަދި ނޫސްވެރިން ހިމެނޭ ގޮތަށް ދަތުރު ކުރަމުން ދިޔަ އެއާ ފޯސް ވަން އަންގާރަ ދުވަހުގެ ރޭ 11:00 ހާއިރު، މެރީލޭންޑްގެ ޖޮއިންޓް ބޭސް އެންޑްރޫސް އަށް އަނބުރާ ޖައްސާފައިވާ ކަމަށެވެ. އަދި އެއީ "ކުޑަ އިލެކްޓްރިކަލް މައްސަލައެއް" ހުރުމުގެ ސަބަބުން ކަމަށް ވެސް ލެވިޓް ވިދާޅުވި އެވެ. 

ފޯރަމް ގައި ބައިވެރިވެ ވަޑައިގަތުމަށް ޓްރަމްޕް ދަތުރު ކުރެއްވީ ބޯއިން 757 އެއްގަ އެވެ. މި ފްލައިޓު ފުރާފައި ވަނީ ބުދަ ދުވަހުގެ މެންދުރު 12:00 ހާއިރު ކަމަށް ބުނެފައިވެ އެވެ. މިއީ ފުރަތަމަ ފްލައިޓު ފުރިތާ ދެ ގަޑިއިރަށް ވުރެ ގިނަ ވަގުތު ފަހުންނެވެ. މި ބޯއިން 757 އާންމުކޮށް ބޭނުން ކުރަނީ ކުދި އެއާޕޯޓު ތަކުން ޤައުމީ ދަތުރުތައް ކުރުމަށެވެ. 

ޑާވޮސްގައި ކުރިއަށްދާ ފޯރަމްގައި ޓްރަމްޕް ބައިވެރިވެ ވަޑައިގަންނަވާއިރު، އެ ފޯރަމްގެ ތެރެއިން ދުނިޔޭގެ ގިނަ ލީޑަރުންނާ ޓްރަމްޕް ބައްދަލު ކުރައްވާނެ އެވެ. އަދި ފޯރަމްގައި ޓްރަމްޕް ތަޤުރީރު ކުރެއްވުމަށް ވެސް ވަނީ ހަމަޖެހިފަ އެވެ. 

ނޫ ކުލަ އަދި ހުދު ކުލައިގެ ކްލާސިކް ލިވަރީއާ އެކު، އެއާ ފޯސް ވަން އަކީ ދުނިޔޭގެ އެންމެ މަޝްހޫރު ފްލައިޓު ތަކުގެ ތެރޭގައި ހިމެނޭ ފްލައިޓެކެވެ. މިއީ އެމެރިކާގެ ރިޔާސީ ނިޝާނަކަށް ވާއިރު، މި ފްލައިޓަކީ އެމެރިކާގެ ރައީސް ކަމުގައި ހުންނަވާ ބޭފުޅަކު ބޭނުން ކުރެއްވުމަށް ޚާއްސަ ފްލައިޓެކެވެ. މިއީ ސަލާމަތީ ގޮތުން ވެސް ވަރަށް ބޮޑަށް ރައްކާތެރިކަން ދެވިފައިވާ ފްލައިޓެކެވެ.

އެއާ ފޯސް ވަންގެ ގޮތުގައި މިހާރު ބޭނުން ކުރަމުން އަންނަ ދެ ފްލައިޓު ދަތުރު ކުރުމަށް ބޭނުން ކުރަމުން އަންނަތާ 40 އަހަރުވެއްޖެ އެވެ. ބޯއިން އިން މި ފްލައިޓު ތަކަށް ބަދަލު ގެނައުމަށް މަސައްކަތް ކުރަމުން އަންނަ ނަމަވެސް، މި ޕްރޮގްރާމް އަށް ވަނީ ބޮޑު ލަސް ކަމެއް ކުރިމަތިވެފަ އެވެ. 

މި ފްލައިޓު ތަކުގައި ރޭޑިއޭޝަން ޝީލްޑިން އަދި އެންޓި މިސައިލް ޓެކްނޮލޮޖީ ހަރުކޮށްފައިވެ އެވެ. އަދި ދުނިޔޭގެ ކޮންމެ ތާކު އޮތް ނަމަވެސް، ރައީސް އާއި އަސްކަރިއްޔާއާ ގުޅުން ޤާއިމު ކުރެވޭނެ އެވެ. މީގެ އިތުރުން ރައީސް އަށް ބަރާބަލަށް މުވާސަލާތީ ގޮތުން ގުޅުންތައް ކުރިއަށް ގެންދެވޭނެ އެވެ.

މިދިޔަ އަހަރުގެ ތެރޭގައި ޤަތަރުން ވަނީ ލަގްޒަރީ ބޯއިން 8-747 ގެ ޖަމްބޯ ޖެޓެއް ޓްރަމްޕް އަށް ހަދިޔާ ކުރައްވައިފަ އެވެ. އެ ޖެޓު، އެއާ ފޯސް ވަންގެ ފްލީޓަށް އިތުރު ކުރުމަށް، މިހާރު އަންނަނީ ސެކިއުރިޓީ ބޭނުން ތަކަށް ރެޓްރޮފިޓް ކުރަމުންނެވެ. 

މިދިޔަ އަހަރުގެ ފެބްރުވަރީ މަހުގެ ތެރޭގައި އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ އެއާ ފޯސް ވަންގައި ޖަރުމަނަށް ދަތުރު ކުރައްވަމުން ގެންދަވަނިކޮށް، މެކޭނިކަލް މައްސަލައެއް ދިމާވެ، އަނބުރާ ވެރި ރަށް ވޮޝިންޓަން ޑީސީ އަށް އަންނަން މަޖުބޫރުވި އެވެ.