ބިލް ކްލިންޓަން އާއި ހިލަރީ ކްލިންޓަން އަށް ފިޔަވަޅު އަޅަން ކޮމެޓީ އިން ފާސްކޮށްފި

އެމެރިކާގެ ކުރީގެ ރައީސް ބިލް ކްލިންޓަން އާއި، އޭނާ ގެ އަނބިކަނބަލުން އަދި ކުރީގެ ސެކްރެޓަރީ އޮފް ސްޓޭޓް ހިލަރީ ކްލިންޓަން އަށް ފިޔަވަޅު އެޅުމަށް، އޯވަސައިޓް ކޮމެޓީ އިން ފާސްކޮށްފި އެވެ. 

މިއީ ޖިންސީ ކުށްވެރިޔާ އެޕްސްޓައިންގެ މައްސަލައިގައި ކުރިއަށް ގެންދާ ތަހުގީގަށް އެއްބާރުލުން ދިނުމަށް އެދި ފޮނުވާފައިވާ ޗިޓު ތަކަށް އިހުތިރާމް ކޮށްފައި ނުވާތީ ނިންމި ނިންމުމެކެވެ. 

އެމެރިކާގެ ރިޕަބްލިކަން ޕާޓީ އިން ކޮންޓްރޯލް ކުރާ ހައުސް އޯވަސައިޓް ކޮމެޓީ އިން މި ފިޔަވަޅަށް ތާއީދު ކުރީ ބައެއް ޑިމޮކްރަޓިކް ޕާޓީގެ މެންބަރުންގެ ތާއީދާ އެކު އެވެ. މިހާރު މި މައްސަލަ ހައުސް ރެފްރެޒެންޓޭޓިވްސް އަށް ވަނީ ހުށަހަޅައިފަ އެވެ. އެ ތަނުން އެ މައްސަލަ ފާސްވެއްޖެ ނަމަ، ދެން އެ މައްސަލަ ފޮނުވާނީ އެމެރިކާގެ ޖަސްޓިސް ޑިޕާޓްމަންޓް އަށެވެ. 

ކޮމެޓީ އިން ކްލިންޓަންގެ ދެމަފިރިންނަށް ހާޒިރުވުމަށް އަންގާފައި ވަނީ އެޕްސްޓައިންގެ މައްސަލައާ ގުޅޭ ގޮތުން ސުވާލު ކުރުމަށެވެ. ބިލް ކްލިންޓަން އާއި އެޕްސްޓައިން އެކުގާ ނަގާފައިވާ ފޮޓޯ ތަކެއް ލީކުވެފައިވާއިރު، އެއީ 1990 އާއި 2000 ގެ ކުރީ ކޮޅު ނަގާފައިވާ ފޮޓޯ ތަކެއް ކަމަށް ބެލެވެ އެވެ. 

ނަމަވެސް، މި މައްސަލައިގައި އެޕްސްޓައިންއާ ގުޅޭ ގޮތުން ދެކެވިފައިވާ ވާހަކަ ތަކުގައި ބިލް ކްލިންޓަންގެ މައްޗަށް އެއްވެސް ތުހުމަތެއް ކޮށްފައި ނުވެ އެވެ. އަދި އެޕްސްޓައިންގެ ޖިންސީ ކުށްތަކާ ބެހޭ ގޮތުން އޭނާ އަށް އެއްވެސް މައުލޫމާތެއް އެނގެން ނެތް ކަަމަށް ވެސް ބުނެފައިވެ އެވެ. 

އެކަމާ ގުޅޭ ގޮތުން ބިލް ކްލިންޓަންގެ ޤާނޫނީ ވަކީލުން ބުނެފައި ވަނީ، އޯވަސައިޓު ކޮމެޓީގެ ޗިޓުތަކަކަކީ ތަންފީޒު ކުރެވޭނެ ކަމެއް ނޫން ކަމަށެވެ. އަދި އެޕްސްޓައިންއާ ގުޅޭ ގޮތުން ކްލިންޓަންގެ ދެމަފިރިންނަށް އެނގެނީ ވަރަށް މަދު މައުލޫމާތެއް ކަމަށާއި، އެ މައުލޫމާތުތައް ކޮމެޓީއާ ހިއްސާ ކޮށްފައިވާ ކަމަށް ވެސް ބުނެފައިވެ އެވެ. 

ބިލް ކްލިންޓަންއާ ދެކޮޅަށް ފިޔަވަޅު އެޅުމަށް ބުދަ ދުވަހު ކޮންގްރެސް އިން ނިންމާފައިވާއިރު، ރިޕަބްލިކަން މެމްބަރުންގެ އިތުރުން، ޑިމޮކްރަޓިކް ޕާޓީގެ ނުވަ މެމްބަރަކު ވެސް ވޯޓު ދީފައިވެ އެވެ. އަދި ހިލަރީ ކްލިންޓަންއާ ދެކޮޅަށް ޑިމޮކްރަޓިކް ޕާޓީގެ ތިން މެމްބަރުން ވަނީ ވޯޓު ދީފަ އެވެ. 

ހައުސްގެ ފުރިހަމަ ތާއީދާ އެކު ފިޔަވަޅު އަޅަން ނިންމައިފި ނަމަ، ޖަސްޓިސް ޑިޕާޓްމަންޓް އިން ނިންމާނީ މި ތުހުމަތުތައް ކުރިއަށް ގެންދިޔުމާާ މެދު ގޮތެއް ނިންމުމަށެވެ. މިއީ 100،000 (އެއް ލައްކަ) އެމެރިކާ ޑޮލަރާ ހަމައަށް ޖޫރިމަނާ ކުރެވޭނެ މައްސަލަ އެކެވެ. އަދި އެއް އަހަރު ދުވަހުގެ ޖަލު ޙުކުމެއް ވެސް ކުރިމަތި ވެދާނެ މައްސަލަ އެކެވެ. 

އޯވަސައިޓް ކޮމެޓީގެ ރައީސް ޖޭމްސް ކޯމަރު ވިދާޅުވީ، ކްލިންޓަންގެ ދެމަފިރިންނަށް ފިޔަވަޅު އެޅުމަށް ހައުސް އިން ފުރިހަމަ އަށް ވޯޓު ދިނުމަށް އެދޭ ކަމަށެވެ. އަދި އޭނާގެ ކޮމެޓީ އިްނ ސާފު މެސެޖެއް ފޮނުވާފައިވާ ކަމަށާއި، ޤާނޫނުގެ ކުރިމަތީގައި އެންމެން ވެސް ހަމަހަމަ ވާނެ ކަމަށް އޭނާ ވިދާޅުވި އެވެ. އަދި މިއީ އިންސާފު ޤާއިމު ކުރުމަށް ދެވޭނެ މެސެޖެއް ކަމަށް ވެސް ވިދާޅުވެފައިވެ އެވެ. 

ކްލިންޓަންގެ ދެމަފިރިން ވިދާޅުވެފައި ވަނީ، އެއީ އެމެރިކާގެ މިހާރުގެ ރައީސް ޑޮނަލްޑް ޓްރަމްޕްގެ އިރުޝާދުގެ ދަށުން، ސިޔާސީ ގޮތުން ކުރިއަށް ގެންދާ ކަމެއް ކަމަށެވެ.