އެއް އަހަރު ދުވަހުން ނިންމާނަމޭ ބުނި ހެނބަދޫ މިސްކިތުގެ މަސައްކަތް، ބިންގާ އެޅިފަހުން 6 މަސް ވީއިރު ނުވެސް ނުފަށާ
ރައީސް މުއިއްޒު 2025 ވަނަ އަހަރުގެ ޖުލައި މަހު ހެނބަދޫގައި 11.6 މިލިއަން ރުފިޔާގެ މިސްކިތެއްގެ ބިންގާ އަޅުއްވައިދެއްވި. މި މަޝްރޫޢު ފެނަކައާ ހަވާލުކޮށްފައިވަނީ 1 އަހަރު ދުވަހުން ނިންމާގޮތަށް. ބިންގާ އެޅިފަހުން 6 މަސް ދުވަސް ވީއިރު ވެސް މަސައްކަތް ނުފަށާ ކަމަށް ރަށު ކައުންސިލުން ހާމަކުރޭ.
ރައީސް މުއިއްޒު ވަޑައިގެން ހެނބަދޫ ގައިި މިސްކިތެއް އިމާރާތް ކުރުމަށް ބިންގާ އެޅި ސަރަހައްދު: 1 އަހަރު ދުވަހުން ނިންމުމަށް ފެނަކަ އާއި ހަވާލު ކުރި މި މިސްކިތުގެ މަސައްކަތް، 7 މަސް ދުވަސް ފާއިތުވެގެން ދިޔަ އިރުވެސް ނުފަށާ. | ރާއްޖެ އެމްވީ
މިސަރުކާރުން ފެނަކަ އާ ހަވާލުކޮށްގެން ކުރިޔަށް ގެންދިއުމަށް ނިންމާފައިވާ ނ. ހެނބަދޫ މިސްކިތުގެ މަސައްކަތް، ބިންގާ އެޅިފަހުން 6 މަސް ދުވަސް ވީއިރުވެސް ނުފަށާކަމަށް އެރަށު ކައުންސިލުން ހާމަކޮށްފި އެވެ.
ރައީސް މުއިއްޒު 2025 ވަނަ އަހަރުގެ ޖުލައި މަހު ހެނބަދޫ އަށް ކުރެއްވި ދަތުރުފުޅުގައި، އެމަނިކުފާނުގެ ހާޒިރުގައި މި މިސްކިތުގެ ބިންގާ އަޅުއްވައިދެއްވީ އިސްލާމިކް މިނިސްޓަރ ޝަހީމް ގެ އިތުރުން ޕީއެންސީ އަށް ނިސްބަތްވާ އެ ދާއިރާގެ މަޖްލިސް މެމްބަރެވެ.
މި މަޝްރޫއު ގެ ބިންގާ އެޅުމުގެ ރަސްމިއްޔާތުގައި ރައީސް މުއިއްޒު ގެ އިތުރުން ދައުލަތުގެ ގިނަ އަދަދެއްގެ ވަޒީރުން ވެސް ބައިވެރިވެ ވަޑައިގަތުމުން، ހެނބަދޫ ރައްޔިތުން ހީކުރި ރައީސް މުއިއްޒު ވިދާޅުވި 1 އަހަރު ދުވަހުގެ މުއްދަތުގެ ކުރިން މިސްކިތުގެ މަސައްކަތް ފެނަކަ އިން ނިންމާލާނެ ކަމަށެވެ.
ހެނބަދޫ ގައި އަލަށް އިމާރާތް ކުރާ މިސްކިތުގެ މަސައްކަތާ ގުޅޭ ގޮތުން ރާއްޖެ ޓީވީ އަށް މައުލޫމާތު ދެއްވަމުން އެރަށު ކައުންސިލް ގެ ރައީސް ޙުސައިން އަބޫބަކުރު ވިދާޅުވީ ރައީސް މުއިއްޒު އެރަށަށް ވަޑައިގެން، މިސްކިތުގެ ބިންގާ އެޅި ފަހުން، އެތަކެއް މަހެއް ފާއިތުވެގެން ދިޔަ އިރުވެސް މިސްކިތް އިމާރާތް ކުރުމުގެ އެއްވެސް މަސައްކަތެއް ކުރިޔަށް ނުދާ ކަމުގަ އެވެ.
ހަމަ އެކަނި ބިންގާ އަޅާލިކަން، އިތުރު އެއްވެސް މަސައްކަތެއް ނުހިނގާ، ދެން މިތާ ހުންނާނެ ޖޭމު ގަސް ކަހަލަ ބައެއް ކަހަލަ ގަސްތައް ކޮންމެވެސް ވަރަކަށް. ދެން އެ ގަސްތައް ނަގާ ބިން ސާފުކޮށްލާފަ އޮތީ. އިތުރު މަސައްކަތެއް ނުކުރޭ. ބިންގާ އަޅާފަ ރައީސް ވަޑައިގެންނެވި ފަހުން ފެނަކައިން މި މަސައްކަތައް މީހުން ނަގާފަ ތަނުގެ ވަށައިގެން މި ވަނީ ޓިނުން ފެންސެއް ޖަހާފަ.ނ. ހެނބަދޫ ކައުންސިލް ގެ ރައީސް ޙުސައިން އަބޫބަކުރު
މިނިސްޓަރ ޝަހީމް، މިސްކިތުގެ ބިންގާ އެޅި ދުވަހު، އެއްވެސް ކަހަލަ ހުއްޓުމެއް ނެތި މިސްކިތުގެ މަސައްކަތް ނިންމަދޭނެ ކަމުގެ ޔަގީން ކަން ދެއްވި ކަމަށާއި، ނަމަވެސް މިހާރު މިސްކިތުގެ މަސައްކަތް ވެސް ހިމެނޭހެން ރަށަށް ގެނެސްފައިވާ ސިމެންތި ބަސްތާ ތައްވެސް ގާ ވާން ފަށައިފި ކަމަށް އަބޫބަކުރު ވިދާޅުވި އެވެ.
އަޅުގަނޑު ފާހަގަކޮށްލަން މިއީ 500 މީހުންގެ ޖާގައިގެ މިސްކިތެއް. ޑރ. ޝަހީމް ވިދާޅުވީ އެގޮތަށް. ބިންގާ އެޅި ދުވަހު ޝަހީމް ވިދާޅުވި އެއްވެސް މަސައްކަތެއް ހުއްޓުމެއް ނެތި ގޮސް މިސްކިތުގެ މަސައްކަތް ދީފަވާ ތާރީހުގެ ތެރޭ ނިންމަ ދެއްވާނެ ކަމަށް. މި ސަރަހައްދުގަ ވެސް މި އިމާރާތްކުރަން ބޭނުންވާ އެއްވެސް އެއްޗެއް ފެންނާކަށް ނެތް ނޫންތޯ. އޭރުގަ ބިންގާ އަޅާލަންވެގެން، ރައީސް މުއިއްޒު ވަޑައިގަންނަވަން ވެގެން މި ރަށަށް އެރުވި 100 އެއްހާ ބަސްތާ ސިމެންތި. ގުދަނުގަ ހުރެގެން މިހާރު އޭގެ ތެރެއިން ބޮޑުބައެއް ވަނީ ގާ ވެފަ، ބޭނުން ނުކުރެވޭ ވަރަށް.ނ. ހެނބަދޫ ކައުންސިލް ގެ ރައީސް ޙުސައިން އަބޫބަކުރު
އެއް އަހަރު ދުވަސް ތެރޭ ނިންމާ ގޮތަށް ފެނަކަ އާއި މި މަސައްކަތް ހަވާލު ކޮށްފައިވަނީ 11.6 މިލިއަން ރުފިޔާ އަށެވެ. ސަރުކާރުން ބުނިީ 500 މީހުންގެ ޖާގައިގެ މި މިސްކިތުގައި ލައިބްރަރީ އަކާއި ކްލާސް ރޫމެއް ވެސް ހިމެނޭނެ ކަމަށެވެ. އަދި މިސްކިތް ހުންނާނީ އޭސީ ކޮށްފަ ކަމަށާއި، މިސްކިތް އޭސީ ކުރާނީ އިރުގެ ހަކަތައިން ކަރަންޓު އުފައްދާ ނިޒާމުން ކަމަށެވެ. ނަމަވެސް މި މަސަައްކަތް ނިންމަން ބުނި މުއްދަތު ހަމަ ވާން މިހާރު 4 ވަރަކަށް މަހަށް ވެފައި ވާއިރު، ރައީސް މުއިއްޒު ވަޑައިގެން ބިންގާ އަޅަން ވެގެން ބޭއްވި ގާކޮޅު ބޭއްވުން ފިޔަވާ އިތުރު މަސައްކަތެއް ކޮށްފަ އެއް ނުވެ އެެވެ.
ރައީސް މުއިއްޒުގެ ވެރިކަމުގެ ފުރަތަމަ ދެ އަހަރު ފާއިތުވެގެން ގޮސްފައިވާއިރު، ހެނބަދޫގައި ތަރައްގީގެ އެއްވެސް މަޝްރޫއެއް އެކަށީގެންވާ ގޮތަށް ނުހިނގާކަމަށް އެރަށު ރައްޔިތުން ބުނެ އެވެ.
ނިމިދިޔަ އެމްޑީޕީ ސަރުކާރުން އެރަށުގައި ފަށާފައިވާ މަޝްރޫއުތައް ވެސް މިހާރު މަޑުޖެހިފައިވާކަމަށް ރައްޔިތުން ފާހަގަކޮށްފައިވެ އެވެ. ނިމިދިޔަ އެމްޑީޕީ ސަރުކާރުން ވަނީ ހެނބަދޫގައި ތަރައްގީގެ ގިނަ މަޝްރޫއުތަކެއް ނިންމާފަ އެވެ. އެގޮތުން އެރަށުގެ ފެނުގެ ނިޒާމާއި ބަނދަރު ހެދުމުގެ މަޝްރޫއުއާއި ގޮނޑުދޮށް ހިމާޔަތްކުރުމުގެ މަޝްރޫއުގެ އިތުރުން ފެނަކަ އައު އޮފީސް އިމާރާތާއި އިންޖީނުގޭގެ މަސައްކަތް ހިމެނެއެވެ.
އަތޮޅުތަކުގެ ރަށްރަށުގައި އަސާސީ ޚިދުމަތްތައް ގާއިމްކޮށް، ރައްޔިތުންގެ ދިރިއުޅުމުގެ ފެންވަރު މަތިކުރުމަށްޓަކައި އެމްޑީޕީ ސަރުކާރުން ވަނީ ރަށްރަށުގައި އުމްރާނީ ތަރައްގީގެ ވަރަށް ގިނަ މަޝްރޫއުތައް ހިންގާފަ އެވެ. އެހެން ނަމަވެސް، މި ސަރުކާރުން އެ މަޝްރޫއުތައް ކުރިޔަށް ގެންދިއުމުގައި ލަސްވެފައިވާކަން ރައްޔިތުން ފާހަގަކުރެ އެވެ.
