މި އަހަރުގެ މިހާތަނަށް ރަޝިޔާ އިން ޔުކްރެއިނަށް ދިން އެންމެ ވަރުގަދަ ހަމަލާތައް އަންގާރަ ދުވަހުގެ ފަތިހު ދީފި

އަންގާރަ ދުވަހުގެ ފަތިހު ރަޝިޔާގެ އަސްކަރިއްޔާ އިން ޔޫކްރެއިންގެ އެންމެ ބޮޑު ދެ ސިޓީއަށް އަމާޒުކޮށް ވަރުގަދަ މިސައިލް ހަމަލާތަކެއް ދީފި އެވެ.

މިއީ މިއަހަރުގެ މިހާތަނަށް ދިން އެންމެ ނުރައްކާތެރި ހަމަލާތައް ކަމަށް ޔޫކްރެއިންގެ އޮފިޝަލުންނާއި މީޑިއާތަކުން ރިޕޯޓްކުރެ އެވެ. މި ހަމަލާތަކުގެ ސަބަބުން އިރުއުތުރުގެ ސިޓީއެއް ކަމަށްވާ ހާކީވް އިން ހަތަރު މީހަކު މަރުވެފައިވާ ކަމަށް މައުލޫމާތު ލިބެ އެވެ.

ޔޫކްރެއިންގެ ހާލަތު މޮނިޓަރ ކުރާ ޓެލެގްރާމް ޗެނަލްތަކުން ބުނާ ގޮތުގައި، ރޭގަނޑުގެ ވަގުތެއްގައި ގަޑިއެއްހާއިރުގެ ތެރޭގައި ގާތްގަނޑަކަށް 20 ބެލިސްޓިކް މިސައިލް ވަނީ ފޮނުވާލާފަ އެވެ. އެ ފަރާތްތަކުން މި ހަމަލާ ސިފަކޮށްފައި ވަނީ މިއަހަރުގެ މިހާތަނަށް ޔޫކްރޭނަށް ދިން އެންމެ ވަރުގަދަ އަދި މެދުނުކެނޑި ދިން ހަމަލާގެ ގޮތުގަ އެވެ.

ޔޫކްރެއިންގެ ސިފައިން މި ހަމަލާގެ ފުރިހަމަ ތަފްސީލާ ގުޅޭގޮތުން ވަގުތުން އެއްޗެއް ބުނެފައެއް ނުވެއެވެ. މީގެ އިތުރުން، ރަޝިޔާގެ ފަރާތުން ވެސް މި ހަމަލާތަކާ ގުޅިގެން އެއްވެސް ބަހެއް ބުނެފައެއް ނުވެއެވެ.

ރަޝިޔާގެ ބޯޑަރާ 30 ކިލޯމީޓަރު (18 މޭލު) ކައިރީގައި އޮންނަ އަދި ގިނަގިނައިން ހަމަލާތައް އަމާޒުވާ ހާކީވްގެ ރީޖަނަލް ގަވަރުނަރު ވިދާޅުވީ، ސިޓީގެ ބޭރު ސަރަހައްދަށް ދިން ހަމަލާއެއްގައި ހަތަރު މީހަކު މަރުވެ، ހަ މީހަކަށް އަނިޔާވެފައިވާ ކަމަށެވެ.

2022 ވަނަ އަހަރުގެ ފެބްރުއަރީ މަހު ރަޝިޔާއިން ޔޫކްރެއިނަށް އަރައިގަތީއްސުރެ، އެގައުމުގެ ސިޓީތަކަށް ދަނީ ތަކުރާރުކޮށް މިސައިލާއި ޑްރޯން ހަމަލާތައް ދެމުންނެވެ. މި ހަމަލާތަކުގައި މައިގަނޑު ގޮތެއްގައި ހަކަތަ އުފައްދާ ވަސީލަތްތަކަށް އަމާޒުކުރުމުގެ ސަބަބުން، ފިނި މޫސުމުގެ ދުވަސްވަރު އެތައް މިލިއަން ބަޔަކު ވަނީ ކަރަންޓާއި ހޫނުކުރާ ނިޒާމުތަކުން މަހުރޫމުވެފަ އެވެ.