ވިލާތުގެ އިއްތިހާދުގެ އިސް ބޭފުޅުން އިންޑިއާ އަށް!

އިންޑިއާގެ ބޮޑު ވަޒީރު ނަރެންދުރަ މޯދީގެ ދައުވަތަކަށް، ޔޫރަޕިއަން ކައުންސިލްގެ ރައީސް އެންޓޯނިއޯ ކޮސްޓާ އާއި ޔޫރަޕިއަން ކޮމިޝަންގެ ރައީސާ އުރުސުލާ ވޮން ޑަ ލަޔަން، އިންޑިއާ އަށް ވަޑައިގަންނަވަން ހަމަޖެހިއްޖެ އެވެ.

އެކަން ހާމަ ކޮށްފައި ވަނީ އިންޑިއާގެ ޚާރިޖިއްޔާ އިންނެވެ. އެގޮތުން އެ ބޭފުޅުން އިންޑިއާ އަށް ވަޑައިގަންނަވާނީ މި ހިނގާ ޖަނަވަރީ މަހުގެ 25 ވަނަ ދުވަހުން، 27 ވަނަ ދުވަހަށް ކަމަށް ވަނީ ހާމަ ކޮށްފަ އެވެ.

އިންޑިއާގެ ޚާރިޖިއްޔާ އިން ބުނީ މި ބޭފުޅުން އިންޑިއާ އަށް ވަޑައިގަންނަވަނީ އެ ގައުމުގެ 77 ވަނަ ޖުމްހޫރީ ދުވަހުގެ މުނާސަބަތުގައި ބާއްވާ ހަރަކާތްތަކުގެ ޝަރަފުވެރި މެހެމާނުންގެ ގޮތުގަ އެވެ. މި ދަތުރުފުޅުގެ ތެރެއިން، ޖެނުއަރީ 17 ގައި ބޭއްވުމަށް ހަމަޖެހިފައިވާ 16 ވަނަ އިންޑިއާ-އީޔޫ ސަމިޓުގެ ރިޔާސަތު ވެސް މި ލީޑަރުން ބަލަހައްޓަވާނެ އެވެ.

މި ދަތުރުފުޅުގައި ކޮސްޓާ އާއި އުރުސަލާ، އިންޑިއާގެ ރައީސާ އާ ބައްދަލުކުރައްވައި، ބޮޑު ވަޒީރު މޯދީއާ އެކު މަތީ ފަންތީގެ މަޝްވަރާތައް ބާއްވަވާނެ އެވެ. މީގެ އިތުރުން، އިންޑިއާ-އީޔޫ ސަމިޓުގެ ހަވާސާ ގައި "އިންޑިއާ-އީޔޫ ބިޒްނަސް ފޯރަމް" އެއް ބޭއްވުމަށް ވެސް ވަނީ ހަމަޖެހިފަ އެވެ.

އިންޑިއާ އާއި ޔޫރަޕިއަން ޔޫނިއަން އަކީ 2004 ވަނަ އަހަރުން ފެށިގެން އިސްތިރާތީޖީ ބައިވެރިންނެވެ. 2025 ވަނަ އަހަރުގެ ފެބުރުވަރީ މަހު ޔޫރަޕިއަން ކޮމިޝަންގެ މަންދޫބުން އިންޑިއާ އަށް ކުރެއްވި ތާރީޚީ ޒިޔާރަތަށް ފަހު، އެކި ދާއިރާ ތަކުން ދެފަރާތުގެ ގުޅުން ވަނީ އިތުރަށް ބަދަހިވެ ފުޅާވެފަ އެވެ.

އިންޑިއާގެ 77 ވަނަ ޖުމްހޫރީ ދުވަހުގެ ޝަރަފުވެރި މެހެމާނުންގެ ގޮތުގައި ޔޫރަޕުގެ އިސް ލީޑަރުން ބައިވެރިވެ ވަޑައިގަތުމަކީ، އިންޑިއާ އާއި އީޔޫގެ އިސްތިރާތީޖީ ގުޅުން އިތުރަށް ވަރުގަދަވެ، ދެފަރާތުން އިސްކަންދޭ މުހިންމު ދާއިރާ ތަކުން އެއްބާރުލުން އިތުރުވެގެން ދާނެ ކަމެއް ކަމަށް އިންޑިއާގެ ޚާރިޖިއްޔާ އިން ބުންޏެވެ.