ހަނގުރާމަ ހުއްޓާލުމާ ބެހޭ ގޮތުން ރަޝިޔާގެ ރައީސް ވްލަޑިމިއަރ ޕުޓިން އެމެރިކާގެ ތިން މަންދޫބުންނާ ބުރާސްފަތި ދުވަހުގެ ރޭ ބައްދަލުކުރައްވައިފި
ހަނގުރާމަ ހުއްޓާލުމަށް ކުރިއަށްދާ މަޝްވަރާތަކުގައި ހުރި މައިގަނޑު ހުރަސްތަކުގެ ތެރޭގައި ބިމުގެ މައްސަލަ ހިމެނޭ.
ރަޝިޔާގެ މޮސްކޯގެ ކްރެމްލިންގައި ރަޝިޔާގެ ރައީސް ވްލަޑިމިއާ ޕުޓިން އެމެރިކާގެ ރައީސް ޑޮނަލްޑް ޓްރަމްޕްގެ ޚާއްސަ މަންދޫބު ސްޓީވް ވިޓްކޮފް އާއި ޖެރެޑް ކުޝްނާއާ އެކު ބައްދަލުވުމެއްގައި ބައިވެރިވެވަޑައިގަންނަވަނީ -ޖެނުއަރީ 22، 2026 | ރޮއިޓަސް
ޔޫކްރެއިން ގައި ކުރިއަށްދާ ހަނގުރާމަ ނިމުމަކަށް ގެނައުމުގެ މަޝްވަރާތަކަށް، ރަޝިޔާގެ ރައީސް ވްލަޑިމިއަރ ޕުޓިން އެމެރިކާގެ ތިން މަންދޫބުންނާ ބުރާސްފަތި ދުވަހުގެ ރޭ ބައްދަލުކުރައްވައިފި ކަމަށް ކްރެމްލިން އިން ހާމަކޮށްފި އެވެ.
އެމެރިކާގެ މި ވަފުދުގައި ހިމެނެނީ ސްޓީވް ވިޓްކޮފް އާއި ޖެރެޑް ކުޝްނަރގެ އިތުރުން، ބައިނަލްއަގުވާމީ ހަމަޖެހުން ގާއިމުކުރުމަށް ރައީސް ޑޮނަލްޑް ޓްރަމްޕް އުފައްދަވާފައިވާ 'ބޯޑް އޮފް ޕީސް' ގެ ސީނިއަރ އެޑްވައިޒަރަކަށް އަލަށް އައްޔަންކުރެއްވި ޖޮޝް ގްރޫންބޯމް އެވެ.
މޮސްކޯ ގަޑިން މެންދަމުގެ ވަގުތެއްގައި ޕޫޓިން މި ވަފުދާ ބައްދަލުކުރެއްވިއިރު، ރައީސް ޓްރަމްޕް ވަނީ ހަނގުރާމަ ހުއްޓާލުމުގެ އެއްބަސްވުމަކާ "ވަރަށް ބޮޑަށް ގާތްވެފައިވާ" ކަމަށް ވިދާޅުވެފައެވެ. އަދި ވިޓްކޯފް ވިދާޅުވި ގޮތުގައި މަޝްވަރާތައް މިހާރު އޮތީ އެންމެ ފަހު މައްސަލަ އާ ހިސާބުގަ އެވެ.
ކްރެމްލިން އިން ބުނި ގޮތުގައި، ކުރީގެ ބައްދަލުވުންތަކެކޭ އެއްފަދައިން، މި ބައްދަލުވުމުގައި ވެސް ޕުޓިންގެ އަރިހުގައި ޚާރިޖީ ސިޔާސަތާ ބެހޭ އެހީތެރިޔާ ޔޫރީ އުޝާކޯވް އާއި ޚާއްޞަ މަންދޫބު ކިރިލް ޑްމިޓްރިއެވް ބައިވެރިވެވަޑައިގެންނެވި އެވެ. އާންމުކޮށްފައިވާ ކުރު ވީޑިއޯ ކްލިޕަކުން ފެންނަނީ ޕުޓިން އެމެރިކާގެ ތިން މަންދޫބުންނާ ސަލާމްކުރައްވައި، ބޮޑު އޯވަލް މޭޒެއްގެ ދޮށުގައި އިށީނުމަށް ދައުވަތު ދެއްވާ މަންޒަރެވެ.
ބިމުގެ މައްސަލަ އާއި ނޭޓޯގެ ރޭވުންތައް
ދެވަނަ ބޮޑު ހަނގުރާމައަށް ފަހު ޔޫރަޕް ގައި ހިނގާ އެންމެ ނުރައްކާތެރި މި ހަނގުރާމަ ނިމުމަކަށް ގެނައުމަށް ވޭތުވެދިޔަ އެއް އަހަރު ދުވަހު ޓްރަމްޕް ވަނީ ބާރުއަޅުއްވާފަ އެވެ. އެމަނިކުފާނު މިދިޔަ ބުދަ ދުވަހު ވިދާޅުވި ގޮތުގައި ޕުޓިން އާއި ޔޫކްރެއިންގެ ރައީސް ވޮލޮޑިމިއަރ ޒެލެންސްކީ އެއްބަސްވުމަކަށް ނާދެވިއްޖެނަމަ އެއީ ވަރަށް ބޮޑު "މޮޔަކަމެކެވެ".
މަޝްވަރާތަކުގައި ހުރި މައިގަނޑު ހުރަސްތަކުގެ ތެރޭގައި ބިމުގެ މައްސަލަ ހިމެނެއެވެ. ޚާއްޞަކޮށް، ޑޮނެޓްސްކް ސަރަޙައްދުގެ ޔޫކްރެއިންގެ ބާރުގެ ދަށުގައި އޮތް 20 އިންސައްތަ ދޫކޮށްލުމަށް ޕޫޓިން ބާރުއަޅުއްވާއިރު، ޒެލެންސްކީ ވަނީ ގިނަ އަހަރުތަކެއްގެ ހަނގުރާމައިގައި ބޮޑެތި ޤުރުބާނީތަކާއެކު ދިފާއުކޮށްފައިވާ އެއްވެސް ބިމެއް ދޫކޮށްލުމަށް އިންކާރު ކުރައްވާފަ އެވެ. މީގެ އިތުރުން، ޔޫކްރެއިން ނޭޓޯއާ ގުޅުމުގެ ޝައުގުވެރިކަން ދޫކޮށްލުމަށާއި، ސުލްހައިގެ އެއްބަސްވުމަކަށް ފަހު ޔޫކްރެއިންގެ ބިމުގައި ނޭޓޯގެ އެއްވެސް ސިފައިންގެ މީހަކު ހުރުމަށް ރަޝިޔާ ދެކޮޅު ހަދަ އެވެ.
ވިޓްކޮފް އާއި ކުޝްނަރ މޮސްކޯ އަށް ވަޑައިގަތީ ސްވިޒަލޭންޑްގެ ޑާވޯސް ގައި ޔޫކްރެއިންގެ އޮފިޝަލުންނާ ބައްދަލުކުރެއްވުމަށްފަހު އެވެ. އަދި ބުރާސްފަތި ދުވަހު ޓްރަމްޕް ވަނީ ޒެލެންސްކީ އާ ވެސް ބައްދަލުކުރައްވާފަ އެވެ.
އެ ބައްދަލުވުމަށްފަހު ޒެލެންސްކީ ވިދާޅުވީ ޔޫކްރެއިންގެ ސަލާމަތީ ކަންކަމާ ގުޅޭ ގޮތުން އެއްބަސްވުމަކަށް އާދެވިފައިވާ ކަމަށާއި، ނަމަވެސް ބިމުގެ މައްސަލަ އަދިވެސް އޮތީ ހައްލުނުވެ ކަމަށެވެ. މިހާރު ޔޫކްރެއިން ތަހައްމަލު ކުރަމުންދަނީ އެންމެ ފިނި މޫސުމެވެ. ރަޝިޔާ އިން ދަނީ އެގައުމުގެ ހަކަތަ އުފައްދާ މަރުކަޒުތަކަށް އަމާޒުކޮށް ވަރުގަދަ މިސައިލް އަދި ޑްރޯން ހަމަލާތައް ދެމުންނެވެ. ފިނިހޫނުމިން ސުމަކަށްވުރެ ދަށަށް ގޮސްފައިވާއިރު، ކީވް އާއި އެހެނިހެން ސިޓީތަކުގެ އެތައް ހާސް ބަޔަކު ތިބީ ކަރަންޓާއި ހޫނުކުރާ ނިޒާމުތަކުން މަހްރޫމްވެފަ އެވެ.
އުންމީދީ ނިޝާނެއްގެ ގޮތުން ޒެލެންސްކީ ވިދާޅުވީ، ރަޝިޔާ، ޔޫކްރެއިން އަދި އެމެރިކާގެ މަންދޫބުންގެ މެދުގައި ބާއްވާ ފުރަތަމަ ތިންފަރާތް ހިމެނޭ ބައްދަލުވުންތައް ހުކުރު އަދި ހޮނިހިރު ދުވަހު އަބޫދާބީގައި ކުރިއަށްދާނެ ކަމަށެވެ. އަދި ހަނގުރާމައަށް ފަހު އިގްތިސާދު އާރާސްތުކުރުމާ ގުޅޭ އެއްބަސްވުމެއް ވެސް ގާތްގަނޑަކަށް ތައްޔާރުވެފައިވާ ކަމަށް އޭނާ ވިދާޅުވި އެވެ.
ޕުޓިން އަށް ދޭން އޮތް މެސެޖަކީ ކޮބައިތޯ ސުވާލުކުރުމުން ޓްރަމްޕް ވިދާޅުވީ، "މި ހަނގުރާމަ ނިމެންޖެހޭނެ" ކަމަށެވެ.
