ފަރަންސޭސި ރައީސް މެކްރޮން ޓްރަމްޕަށް ފޮނުއްވި ޕްރައިވެޓް މެސެޖްތަކެއް ޓްރަމްޕް ސޯޝަލް މީޑިއާގައި ލީކު ކޮށްލައްވައިފި

ފަރަންސޭސި ވިލާތުގެ ރައީސް އެމަނުއެލް މެކްރޯން އެމެރިކާގެ ރައީސް ޑޮނަލްޑް ޓްރަމްޕަށް ފޮނުއްވި ޕްރައިވެޓް މެސެޖްތަކެއް ޓްރަމް ސޯޝަލް މީޑިއާގައި ލީކު ކޮށްލައްވައިފި އެވެ.

ފަރަންސޭސި ރައީސް އިމަނުއެލް މެކްރޮން، އެމެރިކާގެ ރައީސް ޑޮނަލްޑް ޓްރަމްޕަށް ފޮނުއްވި މެސެޖެއްގައި، ކުރި އަށް އޮތް ބުރާސްފަތި ދުވަހުގެ މެންދުރުފަހު ޕެރިހުގައި ޖީ7 ގެ ބައްދަލުވުމެއް އިންތިޒާމު ކުރެވިދާނެ ކަމަށް ވިދާޅުވެފައިވެ އެވެ. ޓްރަމްޕް އޭނާގެ 'ޓްރޫތް ސޯޝަލް' ޕްލެޓްފޯމުގައި އާންމުކުރި މި މެސެޖުގެ ސްކްރީންޝޮޓްގައިވާ ގޮތުން، ގްރީންލޭންޑާ ގުޅޭގޮތުން ޓްރަމްޕް ގެންގުޅުއްވާ ސިޔާސަތުތަކާ މެދު މެކްރޮން ވަނީ ސުވާލު އުފައްދަވައި، އެކަން ވިސްނައިގަންނަން ދަތި ކަމަށް ވިދާޅުވެފަ އެވެ.

މި މެސެޖުތަކުގައިވާ ގޮތުން، އެ ބައްދަލުވުމުގެ ހަވާސާގައި ޔޫކްރެއިން، ޑެންމާކް، ސީރިއާ އަދި ރަޝިއާ ބައިވެރިވުމުގެ ފުރުސަތު އޮތް ކަމަށް މެކްރޮން ވިދާޅުވެފައިވެ އެވެ.  ސީރިއާ ގެ މައްސަލައިގައި ދެ ގައުމުގެ ވިސްނުން އެއްގޮތް ކަމަށާއި އަދި އީރާނާ ގުޅޭ ގޮތުން ވަރަށް މުހިންމު އަދި ބޮޑެތި ކާމިޔާބީތަކެއް ގުޅިގެން ހާސިލުކުރެވިދާނެ ކަމަށް ވެސް މެކްރޮން ވިދާޅުވެފައިވެ އެވެ. މީގެ އިތުރުން، ބުރާސްފަތި ދުވަހުގެ ރޭގަނޑުގެ ފަރިއްކޮޅަކަށް ޕެރިހަށް ވަޑައިގަތުމަށް ވެސް މެކްރޮން ވަނީ ޓްރަމްޕަށް ދައުވަތު އަރުވާފަ އެވެ.

ޓްރަމްޕް އާންމުކުރެއްވި ސްކްރީންޝޮޓްގައި އޭނާ މެކްރޮނަށް ދެއްވި އެއްވެސް ޖަވާބެއް ފެންނާކަށް ނެތެވެ. އަދި މި މައްސަލައާ ގުޅޭގޮތުން ވައިޓް ހައުސްއިންނާއި މެކްރޮންގެ އޮފީހުން ރަސްމީކޮށް އެއްވެސް އެއްޗެއް ބުނާކަށް ބޭނުމެއް ނުވި އެވެ.

މެކްރޮންގެ އަރިސް މަސްދަރަކުން ކަށަވަރުކޮށްދީފައިވާ ގޮތުގައި، ޓްރަމްޕް ހިއްސާކުރި އެ މެސެޖަކީ ސައްހަ މެސެޖެކެވެ.

ގްރީންލޭންޑް މިލްކުކުރުމަށް ޓްރަމްޕް ކުރައްވާ މުއާމަލާތްތަކާ ގުޅިގެން، ޔޫރަޕްގެ ބައެއް ގައުމުތަކުން އެތެރެކުރާ މުދަލުން ބޮޑެތި ޓެކްސްތަކެއް ނަގާނެ ކަމަށް ވިދާޅުވެ ޓްރަމްޕް ވަނީ އިންޒާރު ދެއްވާފައެވެ. މި ނުތަނަވަސްކަމާ ގުޅިގެން، ޔޫރަޕިއަން ޔޫނިއަން (އީޔޫ) ގެ ލީޑަރުން ބުރާސްފަތި ދުވަހުގެ ރޭ ބްރަސަލްސްގައި ކުއްލި ސަމިޓެއް ބޭއްވުމަށް ވަނީ ތައްޔާރުވެފަ އެވެ.