75 ޤައުމެއްގެ ރައްޔިތުންނަށް އެމެރިކާ އަށް ހިޖުރަކުރުމަށް ދޫކުރާ ވިސާ ވަކި މުއްދަތެއް ނެތް ގޮތައް މެދުކަނޑާލަން ނިންމައިފި

އެމެރިކާ ގައި ދިރިއުޅޭއިރު އެ ޤައުމުގެ ސަރުކާރުގެ މާލީ އެހީތެރިކަމަށް ނުވަތަ އިނާޔަތްތަކަށް ބަރޯސާވާންޖެހިދާނެ ކަމަށް ބެލެވޭ 75 ޤައުމެއްގެ ރައްޔިތުންނަށް، އެމެރިކާ އަށް ހިޖުރަކުރުމަށް ދޫކުރާ "އިމިގްރަންޓް ވިސާ" ދޫކުރުން މެދުކަނޑާލަން ނިންމައިފިކަން އެމެރިކާގެ ސްޓޭޓް ޑިޕާޓްމަންޓުން ބުދަ ދުވަހު ހާމަކޮށްފި އެވެ.

ސެކްރެޓަރީ އޮފް ސްޓޭޓް މާކޯ ރޫބިއޯގެ އިރުޝާދުގެ ދަށުން އެޅި މި ފިޔަވަޅާ ބެހޭ ގޮތުން ސްޓޭޓް ޑިޕާޓްމަންޓުން ބުނެފައި ވަނީ، އެމެރިކާގެ ދައުލަތަށް ބުރައަކަށް ވެދާނެ ފަދަ މީހުން އެ ގައުމަށް ހިޖުރަކުރުން ހުއްޓުވުމަށް ނޮވެމްބަރު މަހު ނެރުނު ހަރުކަށި އަމުރާ އެއްގޮތަށް، މި ޤައުމުތަކުގެ ވިސާ އެޕްލިކޭޝަންތައް ކުރިއަށް ނުގެންދިއުމަށް ކޮންސިއުލާ އޮފިސަރުންނަށް މިހާރު އަންގާފައިވާ ކަމަށެވެ.

ޖެނުއަރީ މަހުގެ 21 ވަނަ ދުވަހުން ފެށިގެން އަމަލުކުރަން ފަށާ މި ނިންމުމުގެ ސަބަބުން، ފަތުރުވެރިކަމާއި ވިޔަފާރި ފަދަ ކަންކަމަށް ދޫކުރާ ވަގުތީ ވިސާތަކަށް (ނޮން-އިމިގްރަންޓް ވިސާ) އެއްވެސް ބަދަލެއް ނާންނާނެ އެވެ.

ސްޓޭޓް ޑިޕާޓްމަންޓުން ނެރުނު ބަޔާނެއްގައި ބުނެފައިވަނީ، ޓްރަމްޕްގެ ސަރުކާރުން މަސައްކަތް ކުރަމުންދަނީ އެމެރިކާގެ އިމިގްރޭޝަން ނިޒާމުގެ ނާޖާއިޒު ފައިދާ ނަގައި، އެމެރިކާގެ ރައްޔިތުންގެ މުއްސަނދިކަން "ފޭރޭ" މީހުން ހުއްޓުވުމަށެވެ. އަދި މި 75 ޤައުމުގެ ވިސާ މެދުކަނޑާލާފައިވަނީ، ދައުލަތުގެ އިނާޔަތްތަކާއި އެހީތަކަށް ބަރޯސާވާނެ ބޭރުގެ ރައްޔިތުން އެމެރިކާއަށް އެތެރެވުން ހުއްޓުވުމަށްޓަކައި ބަލަންޖެހޭ އުސޫލުތައް އިތުރަށް މުރާޖަޢާ ކުރުމަށް ކަމަށް ވެސް ބުނެފައިވެ އެވެ.

މި ނިންމުމުގެ އަސަރުކުރާނެ 75 ޤައުމުގެ ލިސްޓު އެ ބަޔާނުގައި ރަސްމީކޮށް ހާމަކޮށްފައި ނުވިނަމަވެސް، ރައީސް ޑޮނަލްޑް ޓްރަމްޕްގެ ސަރުކާރުން ވަނީ މީގެ ކުރިންވެސް އެފްރިކާގެ ގިނަ ޤައުމުތަކެއް ހިމެނޭހެން ދިހަވަރަކަށް ޤައުމުގެ ވިސާ ދޫކުރުން ވަރަށް ބޮޑަށް ހަރުކަށިކޮށްފަ އެވެ.

އެމެރިކާގެ އޮފިޝަލަކު ނަން ހާމަނުކުރުމަށް އެދި ވިދާޅުވި ގޮތުގައި، މި ލިސްޓުގައި ރަޝިޔާ، އީރާން، ސޯމާލިއާ، އަފްޣާނިސްތާން، ބްރެޒިލް އަދި މިޞްރު ފަދަ ޤައުމުތައް ހިމެނެ އެވެ. މި ލިސްޓު އަދި ރަސްމީކޮށް އާންމުކޮށްފައެއް ނުވެއެވެ.