އީރާނަށް އެެމެރިކާ އިން ހަމަލާ އެއް ދީފާނެ ކަމަށް އިޒްރޭލް ހައި އެލާޓް ގައި

އިރާނުގައި މިހާރު ކުރިއަށްދާ ސަރުކާރާ ދެކޮޅު ބޮޑެތި މުޒާހަރާތަކާ ގުޅިގެން، އެ ގައުމުގެ ދާޚިލީ ކަންކަމުގެ ތެރެއަށް އެމެރިކާ އިން ވަދެ، އީރާނަށް ހަމަލާ އެއް ދީފާނެ ކަމުގެ ފުރުސަތު ބޮޑުވެފައި އޮތުމާ އެކު އިޒްރޭލުން އޮތީ "ހައި އެލާޓް"  ގައި ކަމަށް މި ކަމުގެ މައުލޫމާތު ހުރި މަސްދަރުތަކާ ހަވާލާދީ ރޮއިޓާސް އިން ބުނެފިއެވެ.

މިދިޔަ ދުވަސްތަކުގައި އެމެރިކާގެ ރައީސް ޑޮނަލްޑް ޓްރަމްޕް ވަނީ އިރާނުގެ މުޒާހަރާތަކުގެ ތެރެއަށް ވަންނާނެ ކަމުގެ އިންޒާރު ތަކުރާރުކޮށް ދެއްވައި، މުޒާހަރާގެ ބައިވެރިންނާ ދެކޮޅަށް ބާރުގެ ބޭނުން ނުކުރުމަށް އިރާނުގެ ވެރިންނަށް ގޮވާލައްވާފަ އެވެ. އަދި ހޮނިހިރު ދުވަހު ޓްރަމްޕް ވިދާޅުވީ، އެހީތެރިކަން ފޯރުކޮށްދިނުމަށް އެމެރިކާ އޮތީ "ތައްޔާރަށް" ކަމަށެވެ.

އިޒްރޭލުގެ ސަލާމަތީ މަޝްވަރާތަކުގައި ބައިވެރިވި މަސްދަރުތަކުން ބުނާގޮތުގައި، މި ހާލަތާ ގުޅިގެން އިޒްރޭލުން ހާއްސަ ފިޔަވަޅުތަކެއް އަޅަމުންދިޔަ ނަމަވެސް، އޭގެ ތަފްސީލެއް ހާމައެއް ނުކުރެ އެވެ. ފާހަގަކޮށްލެވޭ ގޮތުގައި، ނިމިދިޔަ ޖޫން މަހު އިޒްރޭލާއި އިރާނާ ދެމެދު 12 ދުވަހުގެ ހަނގުރާމައެއް ހިނގާފައިވާއިރު، އެމެރިކާ އިން ވަނީ އިޒްރޭލާ ގުޅިގެން އިރާނަށް ވައިގެ ހަމަލާތަކެއް ދީފަ އެވެ.

ހޮނިހިރު ދުވަހު އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ އާއި އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ފޯނުން ގުޅުއްވައި، އިރާނުގެ މައްސަލައިގެ ތެރެއަށް އެމެރިކާ އިން ވަނުމާ ބެހޭގޮތުން މަޝްވަރާ ކުރެއްވި ކަމަށް އެ ބައްދަލުވުމުގައި ބައިވެރިވި މަސްދަރަކުން ކަށަވަރުކޮށްދޭ ކަމަށް ރޮއިޓާސް އިން ރިޕޯޓު ކޮށްފައިވެ އެވެ. އެމެރިކާގެ އޮފިޝަލަކު މި ދެ ބޭފުޅުން ވާހަކަދެއްކެވިކަން ކަށަވަރުކޮށްދެއްވި ނަމަވެސް، މަޝްވަރާކުރެވުނު ކަންކަމުގެ ތަފްސީލެއް ނުދެއްވައެވެ.

އިރާނުގެ ނިއުކްލިއާ އަދި ބެލިސްޓިކް މިސައިލް ޕްރޮގްރާމާ ގުޅިގެން ދެ ގައުމުގެ ދެމެދުގައި ބޮޑެތި ނުތަނަވަސްކަމެއް އުފެދިފައިވީ ނަމަވެސް، މިހާރު ކުރިއަށްދާ މުޒާހަރާތަކުގެ ތެރެއަށް ސީދާ ގޮތުން ވަންނާނެ ކަމެއް އިޒްރޭލުން މިހާތަނަށް ފާޅުކޮށްފައެއް ނުވެއެވެ. އެހެން ނަމަވެސް އީރާނުގެ މަސްއޫލުވެރިން ވިދާޅުވަނީ ހިނގަމުންދާ ހަމަނުޖެހުންތަކުގައި އިޒްރޭލާއި އެމެރިކާގެ ބައިވެރިވުން އޮތް ކަމަށެވެ.

ދާދި ފަހުން 'އިކޮނޮމިސްޓް' މަޖައްލާ އަށް ދެއްވި އިންޓަވިއުއެއްގައި ނަތަންޔާހޫ ވިދާޅުވީ، އިރާނުން އިޒްރޭލަށް ހަމަލާ އެއް ދީފިނަމަ، އޭގެ ނަތީޖާ އެ ގައުމަށް ވަރަށް ހިތިވާނެ ކަމަށެވެ. އަދި އިރާނުގެ ދާޚިލީ މުޒާހަރާތަކަށް އިޝާރާތް ކުރައްވައި އޭނާ ވިދާޅުވީ، އެ ގައުމުގެ އެތެރޭގައި ހިނގަމުންދާ ކަންކަން ވަރަށް ގާތުން ބަލަންޖެހޭ ކަމަށެވެ.