އިރާގުގެ ބޮޑު ވަޒީރަކަށް، ކުރީގެ ބޮޑު ވަޒީރު އަލް މާލިކީ ގެންނަން ތާއީދު ކޮށްފި

އިރާގުގެ ބޮޑު ވަޒީރަކަށް، އެ ޤައުމުގެ ބާރުގަދަ ސިޔާސީ ލީޑަރު އަދި ކުރީގެ ބޮޑު ވަޒީރު ނޫރީ އަލް މާލިކީ ގެންނަން ޤާނޫނު ހަދާ މަޖިލީހުން ތާއީދު ކޮށްފި އެވެ. 

ޝިއާ އިއްތިހާދުގެ އަޣުލަބިއްޔަތު ޤާނޫނު ހަދާ މަޖިލީހުގައި އޮންނައިރު، ހޮނިހިރު ދުވަހު އެ އިއްތިހާދުން ވަނީ އެ ޤައުމުގެ ބޮޑު ވަޒީރަކަށް އަލް މާލިކީ ގެންނަން ތާއީދު ކޮށްފަ އެވެ. 

މި ނޮމިނޭޝަންއާ އެކު، މިހާރު އުމުރުފުޅުން 75 އަހަރުގެ އަލް މާލިކީ އަށް އަނެއްކާ ވެސް އިރާގުގެ ބޮޑު ވަޒީރުކަން ލިބޭނެ ކަމަށް ވަރަށް ބޮޑަށް ބެލެވެ އެވެ. އަލް މާލިކީ ވަނީ މީގެ 10 އަހަރު ކުރިން ވެސް އިރާގުގެ ބޮޑު ވަޒީރުކަން ކުރައްވައިފަ އެވެ. އެގޮތުން 2006 ވަނަ އަހަރުން ފެށިގެން، 2024 ވަނަ އަހަރަށް އޭނާ ވަނީ އެ ޤައުމުގެ ބޮޑު ވަޒީރުކަން ކުރައްވައިފަ އެވެ. 

އަލުން އަނބުރާ ބޮޑު ވަޒީރު ކަމުގެ މަގާމަށް އަލް މާލިކީ ވަޑައިގަންނަވާނެ ކަމަށް ބެލެވިފައިވާއިރު، މިއީ މެދު އިރުމަތީގައި ބޮޑު ބަދަލު ތަކެއް އަންނަ ދަނޑިވަޅެކެވެ. ސަރަހައްދުގައި އީރާންގެ ނުފޫޒު ދަށްވަމުން އަންނަ ކަމަށް މާހިރުން ބުނަމުން އަންނައިރު، އެމެރިކާ އާއި އީރާންއާ ދެމެދު ވަނީ ނުތަނަވަސްކަން އުފެދިފަ އެވެ. 

އީރާންއާ ތަފާތު ގުޅުންތައް އޮންނަ ޝިއާ ފެކްޝަން ތަކުގެ އިންތިހާދެއް ކަމަށްވާ ކޯޑިނޭޝަން ފްރޭމްވޯކް އިން ނެރުނު ބަޔާނެއްގައި ބުނީ، ޤާނޫނު ހަދާ މަޖިލީހުގެ އެންމެ ބޮޑު ބްލޮކްގެ ކެންޑިޑޭޓުގެ ގޮތުގައި، ބޮޑު ވަޒީރުގެ މަގާމަށް އަލް މާލިކީ ނޮމިނޭޓު ކުރުމަށް އަޣުލަބިއްޔަތުން ނިންމާފައިވާ ކަމަށެވެ. އެ ބަޔާނުގައި ވަނީ އަލް މާލިކީގެ ސިޔާސީ އަދި އިދާރީ ތަޖުރިބާ އާއި، ދައުލަތް ހިންގެވުމުގައި އޭނާގެ އަތުގައި އޮތް ފުރިހަމަ ރެކޯޑު ވެސް ފާހަގަ ކޮށްފަ އެވެ. 

މިދިޔަ އަހަރުގެ ނޮވެމްބަރު މަހުގެ ތެރޭގައި އިރާގުގެ ޤާނޫނު ހަދާ މަޖިލީހަށް މެމްބަރުން އިންތިޚާބު ކުރުމަށް ބޭއްވި އިންތިޚާބަށް ފަހު، އަލް މާލިކީ ހިމެނޭ ކޯޑިނޭޝަން ފްރޭމްވޯކް އިން ވަނީ އަޣުަލަބިއްޔަތު ހޯދައިފަ އެވެ. އެއަށް ފަހު، ދެން ބޮޑު ވަޒީރު ކަމަށް ވަޑައިގަންނަވާނެ ބޭފުޅެއް ކަނޑައެޅުމަށް ވަނީ "ހޫނު" މަޝްވަރާ ތަކެއް ކުރިއަށް ގެންގޮސްފަ އެވެ. 

މިދިޔަ ޑިސެމްބަރު މަހުގެ ތެރޭގައި އިރާގުގެ ޤާނޫނު ހަދާ މަޖިލީހުން ވަނީ ސްޕީކާ އަކު އިންތިޚާބު ކޮށްފަ އެވެ. އެއަށް ފަހު ޤައުމުގެ ރައީސަކު ހޮވަން ޖެހޭއިރު، މިހާރުގެ ބޮޑު ވަޒީރު މުޙައްމަދު ޝިޔާއު އަލް ސުދާނީގެ ބަދަލުގައި ބޮޑު ވަޒީރަކު އައްޔަން ކުރައްވާނީ އައު ރައީސް އެވެ. 

އިރާގުގެ ޤާނޫނު އޮންނަ ގޮތުން ބޮޑު ވަޒީރުގެ މަގާމު ލިބޭނީ ޝިއާ މުސްލިމަކަށެވެ. ޤާނޫނު ހަދާ މަޖިލީހުގެ ސްޕީކަރަކީ ސުންނީ އަކަށްވާއިރު، ރަމްޒީ މަގާމެއްގެ ގޮތުގައި އޮންނަ ރައީސްކަން ލިބެނީ ކުރުދީންގެ މީހަކަށެވެ.