އެމެރިކާ އިން އީރާނަށް އާ އަސްކަރީ ހަމަލާތަކެއް ދީފާނެކަމަށް ބުނެ ދެމުންދާ އިންޒާރުތަކަކީ އެއްގޮތަކަށް ވެސް ބަލައިގަނެވޭނެ ކަންކަމެއް ނޫން: ރަޝިޔާ
އީރާނުގެ ދާޚިލީ ސިޔާސީ ކަންކަމުގެ ތެރެއަށް ބޭރުގެ ފަރާތްތަކުން ނޭދެވޭ ނުފޫޒު ފޯރުވުމަށް ކުރާ ކަންކަން ރަޝިޔާ އިން ވަނީ ކުށްވެރި ކޮށްފައި.
ތެހެރާނުގެ ފޮރިން މިނިސްޓްރީގެ މައި އޮފީހުގައި ބޭއްވި ޖޮއިންޓް ނޫސްވެރިންގެ ބައްދަލުވުމެއް ގައި އީރާނުގެ ފޮރިން މިނިސްޓަރު އައްބާސް އަރަގްޗީ ރަޝިޔާގެ ފޮރިން މިނިސްޓަރު ސަރްގޭ ލަވްރޯވް އާއި ސަލާމް ކުރައްވަނީ - ފެބްރުއަރީ 25، 2025. | ގެޓީ އިމޭޖަސް
އީރާނުގެ ދާޚިލީ ސިޔާސީ ކަންކަމުގެ ތެރެއަށް ބޭރުގެ ފަރާތްތަކުން ނޭދެވޭ ނުފޫޒު ފޯރުވުމަށް ކުރާ މަސައްކަތްތައް ކުށްވެރިކުރާ ކަމަށް ރަޝިޔާ އިން އަންގާރަ ދުވަހު ބުނެފިއެވެ.
އަދި އެމެރިކާ އިން އީރާނަށް އާ އަސްކަރީ ހަމަލާތަކެއް ދީފާނެކަމަށް ބުނެ ދެމުންދާ އިންޒާރުތަކަކީ އެއްގޮތަކަށްވެސް ބަލައިގަނެވޭނެ ކަންކަމެއް ނޫންކަމަށް ވެސް އެ ގައުމުން ބުނެފައިވެ އެވެ.
ރަޝިޔާގެ ފޮރިން މިނިސްޓްރީން ނެރުނު ބަޔާނެއްގައި ބުނެފައި ވަނީ، ބޭރުގެ ނުފޫޒުން އުފައްދާ ހަމަނުޖެހުންތައް ބަހަނާއަކަށް ދައްކައި، 2025 ވަނަ އަހަރުގެ ޖޫން މަހު އީރާނާ ދެކޮޅަށް ހިންގި އުދުވާނު ތަކުރާރުކުރަން ރާވާ ފަރާތްތަކުން، އެފަދަ އަމަލުތަކުގެ ސަބަބުން މެދުއިރުމައްޗަށާއި ބައިނަލްއަޤްވާމީ ސަލާމަތަށް ކުރިމަތިވެދާނެ ނުރައްކާތެރި ނަތީޖާތަކާ މެދު ވިސްނަން ޖެހޭނެ ކަމަށެވެ.
މަސްދަރު: ރޮއިޓާސް
