އިރާނުގެ މުޒާހަރާތައް ހުއްޓުވުމަށް ބާރުގެ ބޭނުން ކުރި އިސްވެރިންނަށް އެމެރިކާ އިން ދަތިކުރުމުގެ ފިޔަވަޅު އަޅައިފި

އިރާނުގައި ސަރުކާރާ ދެކޮޅަށް ކުރަމުންދާ މުޒާހަރާތަކާ ގުޅިގެން، އެ ގައުމުގެ ސިޔާސީ އަދި ސަލާމަތީ އިސް މަސްއޫލުވެރިންނާ ދެކޮޅަށް އެމެރިކާ އިން ދަތިކުރުމުގެ އައު ފިޔަވަޅުތަކެއް އަޅައިފި އެވެ.

މި ފިޔަވަޅުތައް އަޅާފައި މިވަނީ، އެމެރިކާގެ ރައީސް ޑޮނަލްޑް ޓްރަމްޕް އިރާނާ ދެކޮޅަށް އަސްކަރީ ފިޔަވަޅެއް އެޅުމުގެ އިންޒާރު ދެއްވާފައިވާ ދަނޑިވަޅެއްގަ އެވެ.

އަންގާރަ ދުވަހު އެމެރިކާ އިން އެޅި މި ފިޔަވަޅުތައް މައިގަނޑު ގޮތެއްގައި އަމާޒުކޮށްފައި ވަނީ އިރާނުގެ ސުޕްރީމް ނޭޝަނަލް ސެކިއުރިޓީ ކައުންސިލްގެ ސެކްރެޓަރީ އަލީ ލަރިޖާނީގެ އިތުރުން ބައެއް އެހެން އިސްވެރިންނަށެވެ. އެމެރިކާ އިން ބުނާ ގޮތުގައި މި ފަރާތްތަކަކީ ތެހެރާނުން މުޒާހަރާގެ ބައިވެރިންނާ ދެކޮޅަށް ހިންގި "ލާއިންސާނީ" އަމަލުތައް ރޭވި މައިގަނޑު ފަރާތްތަކެވެ.

އެމެރިކާގެ ޓްރެޜަރީ ސެކްރެޓަރީ ސްކޮޓް ބެސެންޓް ނެރުއްވި ބަޔާނެއްގައި ވިދާޅުވީ، މިނިވަންކަމާއި އިންސާފަށް އެދި ގޮވާލަމުންދާ އިރާނުގެ ރައްޔިތުންނާއެކު އެމެރިކާ ސާބިތުކަމާއެކު އޮންނާނެ ކަމަށެވެ. އަދި ރައީސް ޓްރަމްޕްގެ އިރުޝާދުގެ ދަށުން، އިރާނުގެ ރައްޔިތުންނާ ދެކޮޅަށް ހިންގާ އަނިޔާވެރި އަމަލުތަކުގައި ބައިވެރިވާ އިސްވެރިންނަށް ފިޔަވަޅު އަޅަމުންދާނެ ކަމަށާއި، އިންސާނީ ހައްގުތަކަށް އަރައިގަންނަ ފަރާތްތަކާ ދެކޮޅަށް ހުރި ހުރިހާ ވަސީލަތެއްގެ ބޭނުން ހިފާނެ ކަމަށްވެސް އޭނާ ވިދާޅުވި އެވެ.

މި ފިޔަވަޅުތަކުގެ ދަށުން، އެމެރިކާގެ އިހުތިސާސް ހިނގާ ސަރަހައްދުތަކުގައި ހުރި މި ފަރާތްތަކުގެ މުދަލާއި ފައިސާ ފްރީޒް ކުރެވޭނެ އެވެ. އަދި އެމެރިކާގެ އެއްވެސް ރައްޔިތަކު މި ފަރާތްތަކާ އެކު ވިޔަފާރީގެ އެއްވެސް މުއާމަލާތެއް ކުރުމަކީ ގާނޫނީ ގޮތުން މަނާ ކަމެކެވެ.

އިރާނަކީ މިހާރުވެސް ދަތިކުރުމުގެ ގިނަ ފިޔަވަޅުތަކެއްގެ ދަށުގައި އޮތް ގައުމަކަށް ވުމުން، މިއީ ރަމްޒީ ފިޔަވަޅެއް ކަމަށް ބެލެވުނު ނަމަވެސް، މިއީ އިރާނަށް ދެމުންދާ ޕްރެޝަރު އިތުރުވަމުންދާ ކަމުގެ ނިޝާނެކެވެ. ފިޔަވަޅު އެޅުނު ލަރިޖާނީ އަކީ އިރާނުގެ ރޫހާނީ ލީޑަރު އާޔަތުﷲ އަލީ ޚާމަނާއީގެ ވަރަށް އަރިސް މުޝީރެކެވެ.

މި ހަފުތާގެ ކުރީކޮޅު ރައީސް ޓްރަމްޕް ވަނީ އިރާނުގެ ރައްޔިތުން ނުކުމެ ސަރުކާރުގެ އިދާރާތައް ހިފައި، "މީހުން މަރާ މީހުންނާއި އަނިޔާވެރިންގެ" ނަންތައް ހޯދައި ބެހެއްޓުމަށް ގޮވާލައްވާފަ އެވެ. މިކަމަށް ރައްދު ދެއްވަމުން ލަރިޖާނީ ވަނީ، އިރާނުގެ ރައްޔިތުން މަރަމުންދާ އަސްލު ގާތިލުންނަކީ ޓްރަމްޕާއި އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ކަމަށް ތުހުމަތު ކުރައްވާފަ އެވެ.

އޭނާ 'އެކްސް' (ކުރީގެ ޓްވިޓާ) ގައި ލިޔުއްވާފައި ވަނީ، "އިރާނުގެ ރައްޔިތުންގެ މައިގަނޑު ގާތިލުންގެ ގޮތުގައި އަހަރެމެން އިއުލާން ކުރަނީ: 1- ޓްރަމްޕް، 2- ނަތަންޔާހޫ" ކަމަށެވެ.