މުޒަހާރާ ކުރާ މީހުން ހައްޔަރު ކުރާ ނަމަ، ވަރުގަދަ ފިޔަވަޅު ތަކެއް އަޅުއްވާނެ ކަމަށް ޓްރަމްޕް ވިދާޅުވެއްޖެ

އީރާންގައި އެ ޤައުމުގެ ސަރުކާރާ ދެކޮޅަށް ކުރަމުން އަންނަ މުޒާހަރާ ތަކުގައި ބައިވެރިވާ މީހުން ހައްޔަރު ކުރާ ނަމަ، އެމެރިކާ އިން އެކަމާ ދެކޮޅަށް ވަރުގަދަ ފިޔަވަޅު އަޅުއްވާނެ ކަމަށް އެ ޤައުމުގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

އަންގާރަ ދުވަހު ސީބީއެސް ނިއުސް އަށް ދެއްވި އިންޓަވިޔުއެއްގައި ޓްރަމްޕް ވިދާޅުވީ، އީރާން އިން އެފަދަ ކަމެއް ކޮށްފި ނަމަ އެމެރިކާ އިން ހަގީގަތުގައި ވެސް އެކަމާ ދެކޮޅަށް ފިޔަވަޅު އަޅުއްވާނެ ކަމަށެވެ. އެއީ އީރާންގައި މުޒާހަރާ ކުރާ މީހުން ހައްޔަރު ކުރުން ބުދަ ދުވަހު ފެށޭނެ ކަމަށް ކޮށްފައިވާ ރިޕޯޓަށް އިޝާރާތްކޮށެވެ. 

ޓްރަމްޕް ވިދާޅުވީ އެތައް ހާސް ބަޔަކު މަރާލާފައިވާ ކަމަށާއި، އަނެއްކާ މިހާރު މީހުން ހައްޔަރު ކުރުމުގެ ވާހަކަ ފެތުރެމުން އަންނަ ކަމަށެވެ. އެކަން އެހެން ވެއްޖެ ނަމަ، ދެން ކަންތައް ވާނެ ގޮތެއް ބަލަން ތިބުމަށް ވެސް ޓްރަމްޕް ވަނީ ވިދާޅުވެފަ އެވެ. 

މީގެ އިތުރުން މުޒާހަރާގެ ތެރެއިން މިހާތަނަށް މަރުވެފައިވާ މީހުން އަދަދު ކަށަވަރު ކުރެވިފައި ނުވާ ކަމަށާއި، އެމެރިކާ އިން އީރާންގެ ރައްޔިތުުންނަށް އެހީތެރިކަމާއި އެއްބާރުލުން ދެއްވާނެ ކަމަށް ވެސް ޓްރަމްޕް ވިދާޅުވި އެވެ. މީގެ ކުރިން ވެސް ސޯޝަލް މީޑިއާ މެދުވެރިކޮށް ޓްރަމްޕް ވަނީ އެހެން ވިދާޅުވެފަ އެވެ. 

އެގޮތުން ޓްރަމްޕް ވިދާޅުވީ އޭނާ އަށް އިވެނީ އެކި އަދަދު ތަކުން މީހުން މަރާލާފައިވާ ވާހަކަ ކަމަށެވެ. އެންމެ މީހަކު މަރުވުމަކީ ވެސް ވަރަށް ބޮޑު ކަމެއްގެ ގޮތުގައި ފާހަގަ ކުރައްވައި ޓްރަމްޕް ވިދާޅުވީ، އޭނާ އަށް އަޑު އިވެނީ އެތައް ބަޔަކު މަރާލާފައިވާ ކަމަށް ބުނާ ވާހަކަ ކަމަށެވެ. ނަމަވެސް، ވަރަށް މަދު އަދަދެއްގެ ވާހަކަ ވެސް އިވޭ ކަމަށް ޓްރަމްޕް ވަނީ ފާހަގަ ކުރައްވައިފަ އެވެ. 

އޭގެ ފަހުން ބުދަ ދުވަހު ވޮޝިންޓަން އަށް އެނބުރި ވަޑައިގަންނަވަމުން ޓްރަމްޕް ވިދާޅުވީ، އީރާންއާ ގުޅޭ ގޮތުން ވަރަށް އަވަހަށް އޭނާ އަށް ބްރީފިންއެއް ލިބިވަޑައިގަންނަވާނެ ކަމަށެވެ. އެގޮތުން މަރުވެފައިވާ މީހުންގެ އަދަދު ވަރަށް ބޮޑަށް އިތުވެފައިވާ ކަމަށް ހީފުޅު ކުރެވޭ ކަމަށާއި، ނަމަވެސް އެކަން ކަށަވަރު ނުކުރެވޭ ކަމަށް ވިދާޅުވި އެވެ. ވަރަށް އަވަހަށް ފުރިހަމަ މައުލޫމާތު ލިބިވަޑައިގަންނަވާނެ ކަމަށާއި، އެއާ އެއްގޮތަށް އަމަލު ކުރައްވާނެ ކަމަށް ޓްރަމްޕް ވިދާޅުވި އެވެ. 

އީރާންގައި ކުރަމުން އަންނަ މުޒާހަރާ ތަކުގައި ބައިވެރިވާ މީހުންނަށް ހަމަލާ ދީ، އެ މީހުން ހައްޔަރުކޮށް އަދި މީހުން މަރާ ނަމަ އެކަމާ ދެކޮޅަށް އެމެރިކާ އިން ފިޔަވަޅު އަޅާނެ ކަމަށް މީގެ ކުރިން ވެސް ޓްރަމްޕް ވިދާޅުވެފައިވެ އެވެ. ނަމަވެސް، އީރާން އިން ބުނެފައި ވަނީ އެ މުޒާހަރާ ތަކުގެ މަޤުސަދު ގެއްލިފައިވާ ކަމަށާއި، އެއީ އެމެރިކާ އާއި އިސްރާއީލް އަޑީގައި އޮވެގެން ހިންގާ ޖަރީމާއެއް ކަމަށެވެ.

ނޯވޭގައި ހުންނަ އީރާން ހިއުމަން ރައިޓްސް ޖަމިއްޔާ އިން އަންގާރަ ދުވަހު ބުނެފައި ވަނީ، މުޒާހަރާ ތަކާ ގުޅިގެން ހިނގި ކަންތައް ތަކުގެ ތެރޭގައި މަދުވެގެން 734 މީހަކު މަރުވެފައިވާ ކަމަށް ކަށަވަރު ކުރެވިފައިވާ ކަމަށެވެ. ނަމަވެސް، އެ އަދަދު ހާހުން މައްޗަށް އަރައިގެން ގޮސްދާނެ ކަމަށް ލަފާ ކުރެވޭ ކަމަށް ވެސް ވަނީ ބުނެފަ އެވެ.