ވީކްއެންޑް ނުނިމޭތީ އަދިވެސް ބޯހިޔާވަހިކަމުގެ ސިޔާސަތު ގެ މައުލޫމާތު ސަރުކާރަށް ދެވޭ ވަރެއް ނުވޭ! ބުނަނީ 30 މިނިޓު ކޯލްގައި މަޑުކޮށްލަން!

"ބޯހިޔާވަހިކަން އެންމެންނަށް" ސިޔާސަތުގެ ވާހަކަ އިސްތިހާރު ކުރާތާ މި ވީ މަދު ދުވަހެއް ނޫނެވެ. އެކި ޕޯޑިއަމްތަކާއި އެކި ޕްލެޓްފޯމުތަކުގައި މި ވާހަކަ ސަރުކާރުން ދައްކާތާ ކިތަންމެ ދުވަހެކެވެ. 

ސަރުކާރުން ބުނާގޮތުން އާއިލީ ބޯހިޔާވަހިކަމުގެ ޕްރޮގްރާމްގެ އެންމެ މުހިންމު މަޤްޞަދަކީ ކޮންމެ ދިވެހި އާއިލާއަކީވެސް އަބުރުވެރި ދިރިއުޅުމެއް އުޅެވޭނެފަދަ އަމިއްލަ ބޯހިޔާވަހިކަމެއް ލިބިފައިވާ އާއިލާއަކަށް ހެދުމަކީ މި ސްކީމްގެ މަގްސަދެވެ. "ބޯހިޔާވަހިކަން އެންމެންނަށް" ސިޔާސަތުގެ "އާއިލީ ބޯހިޔާވަހިކަން" މި މަހުގެ 14 ވަނަ ދުވަހު އިއުލާންކުރައްވާނެ ކަމަށް ރައީސް ޑރ.މުހައްމަދު މުއިއްޒު އޮތީ ކުރިން ވިދާޅުވެފަ އެވެ.

މި ފަހަރު އެ ވިދާޅުވި ވިދާޅުވުން އަނބުރާ ނުގެންދަވަ އެވެ. އެ ދުވަހު ރައީސް ވިދާޅުވި ގޮތަށް އިއުލާން ކުރައްވާ އެތައް ނަމްބަރުތަކެއް ހޮޓްލައިންގެ ގޮތުގައި އިއުލާންކުރެއްވި އެވެ. ބޯހިޔާވަހިކަން އެންމެންނަށް" ސިޔާސަތުގެ ދަށުން ކުރިއަށް ގެންދާ "ޢާއިލީ ބޯހިޔާވަހިކަން" ޕްރޮގްރާމުން ދޫކުރުމަށް ހަމަޖެހިފައިވާ ފްލެޓާއި ގޯއްޗަށް އެދި ހުށަހަޅަން ބޭނުންފުޅުވާ ފަރާތްތައް އިތުރު މައުލޫމާތު ސާފުކޮށްލަން ބޭނުންފުޅުވާނަމަ އެ ކޯލް ސެންޓަރގެ ނަންބަރުތަކަށް ގުޅުމަށް ސަރުކާރުން އެދުނެވެ.

އެ ނަމްބަރުތަކަށް އިސާހިތަކު އާއްމުން ގުޅަން ވެސް ފަށައިފި އެވެ. ކަމަކު ދާކަށް ނެތެވެ. ބުނަނީ 30 މިނިޓު މަޑު ކޮށްލާށެވެ. ދެން އިވުނީ އެ މަރުހަލާ އިހަށް މަޑު ޖައްސާލި ވާހަކަ އެވެ. ބަހަނާ އަކަށް ވީ ހަފްތާ ބަންދު ނުވަތަ ވީކް އެންޑަށް ވުމުން ޖަވާބު ދޭން އުނދަނގޫ ވާހަކަ އެވެ. އެ ބުނާ ވީކް އެންޑް ނިމި އަލުން ހޮޓްލައިންގެ ޚިދުމަތް ފެށީ އާދިއްތަ ދުވަހު އެވެ. ވީކް އެންޑް ވެސް ނިމުނީ އެވެ. ނުނިމުނީ މައުލޫމާތު ހޯދަން 30 މިނިޓު މަޑުކޮށްލަން ބުނާ ބުނުމެވެ. މިކަމުން އެނގެނީ އިންތިޒާމްތަކުގެ ދޯދިޔާކަމާއި ދޯހަޅިކަމެވެ.

ދެން މިހާރު ދަރުބާރު ގޭގައި ހެލްޕް ޑެސްކެއް ޤާއިމްކޮށްފި އެވެ. އެކަމަކު ހެލްޕް ޑެސްކަކުން އެކަނި މައުލޫމާތު އޮޅުން ފިލުވުމަކީ 2.0ގެ ރާއްޖެ ދައްކަން އުޅޭ ސަރުކާރަކަށް ނިކަން ލަދުވެތި ކަމެއް ނޫންތޯއެވެ. 

އަނެއްކާ ހައުސިން މިނިސްޓަރ ޑރ.އަބްދުﷲ މުއްތަލިބު މިވަރުގެ ބޮޑު ސްކީމެއްގެ ވާހަކަ ކުޑަ ނޫސް ބަޔާނަކުން ނިންމަވާލެއްވުމަކީ ވެސް ހައިރާންވާ ވަރު ކަމެކެވެ. "ބޯހިޔާވަހިކަން އެންމެންނަށް" ސިޔާސަތުގެ ދަށުން ކުރިއަށް ގެންދާ "ޢާއިލީ ބޯހިޔާވަހިކަން" ޕްރޮގްރާމުން ދޫކުރުމަށް ހަމަޖެހިފައިވާ ފުލެޓާއި ބިމަށް އެދި އެޕްލިކޭޝަން ހުށަހެޅުމަށް ހުޅުވާލުން އިއުލާން ކުރުމަށް އިއްވީ އެންމެ 5 މިނިޓުގެ ބަޔާނެކެވެ. ބޯހިޔާވަހިކަމުގެ ސްކީމްގެ މައުލޫމާތު ހޯދަން ވެސް އެ ނޫން ސުވާލެއް ކުރަން ވެސް ނޫސްވެރިއަކަށް ވެސް ފުރުސަތެއް ނުދެއްވަ އެވެ. އެހާވެސް ނޫސްވެރިންނާއި، އާއްމުންނާއި ބީރަށްޓިއްސެވެ. މައުލޫމާތު ދިނުމަކީ ސަރުކާރުން އެންމެ ބިރު ގަންނަ ކަމަށް މިއޮތީ ވެފަ އެވެ.