ކައުންސިލް އިންތިހާބުގެ ކެމްޕެއިން އެމްޑީޕީ އިން ލޯންޗްކުރުން އަންނަ މަހު 12 ގައި ބާއްވަނީ

އިދިކޮޅު އެންމެ ބޮޑު ޕާޓީ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން އަންނަ މަހު 12، ގައި ލޯކަލް ކައުންސިލް އިންތިހާބުގެ ކެމްޕެއިން ލޯންޗުކުރުމަށް ނިންމައިފި އެވެ.

އެކަން ހާމަކޮށްފައި ވަނީ ބުރާސްފަތި ދުވަހު އެމްޑީޕީން ބޭއްވި ނޫސްވެރިންގެ ބައްދަލުވުމެއްގަ އެވެ. އެކަމާއި ގުޅޭ ގޮތުން ވާހަކަދައްކަވަމުން ކައުންސިލް އިންތިހާބަށް އެމްޑީޕީން ކަނޑައަޅާފައިވާ ތަރުޖަމާނު ދިއްދޫ ދާއިރާގެ ރައީސް އަބްދުﷲ ވަހީދު ވިދާޅުވީ ކެމްޕެއިން ލޯންޗުކުރުމުގެ ޖަލްސާ އަންނަ މަހު 12ގައި ބާއްވަން ނިންމާފައިވާ އިރު، ޕާޓީ އިން އިންތިޚާބަށް ވާން ޖެހޭ ހުރިހާ ތައްޔާރީތަކެއް އެހިސާބަށް ދާ އިރު ނިމިފައި ހުންނާނެ ކަމަށެވެ. 

މިހާރު ވެސް އެ ޕާޓީ އިން މަސައްކަތް ކުރަމުން ދަނީ ކައުންސިލް އިންތިހާބު ކާމިޔާބުކުރުމަށް ކަމަށް އޭނާ ވަނީ ވިދާޅުވެފަ އެވެ. އިތުރަށް އޭނާ ވިދާޅުވީ ކައުންސިލް އިންތިހާބުގައި އެމްޑީޕީގެ ކެންޑިޑޭޓުންނާއި ކެމްޕެއިން ޓީމުތަކަށް މުހިންމު ތަމްރީންތައް ދިނުމަށް ވެސް މަސައްކަތް ކުރާނެ ކަމަށެވެ. އަމާޒަކީ އިންތިހާބު ބޮޑުތަނުން އެމްޑީޕީއަށް ކާމިޔާބުކޮށްދިނުން ކަމަށް އޭނާ ވަނީ ވިދާޅުވެފަ އެވެ.

ކުރިއަށް އޮތް ލޯކަލް ކައުންސިލް އިންތިހާބުގައި ވޯޓު ދިނުމުގެ ހައްގު ލިބިގެން ވަނީ 294،937 މީހުންނަށެވެ. އޭގެ ތެރެއިން 150،410 މީހުންނަކީ ފިރިހެނުންނެވެ. އަދި 144،527 މީހުންނަކީ އަންހެނުންނެވެ. އިންތިހާބުގައި ޖުމްލަ 621 ވޯޓު ފޮށި ބެހެއްޓުމަށް ހަމަޖެހިފައިވާ ކަމަށް އިލެކްޝަންސް ކޮމިޝަނުން ބުނެފައިވެ އެވެ. ޖުމްލަ 225 ދާއިރާއަކަށް ލޯކަލް ކައުންސިލްތަކުގެ މެންބަރުންނާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ މެންބަރުން އިންތިޚާބުކުރުމަށް ވަނީ ހަމަޖެހިފަ އެވެ.