އިލެކްޝަން ކޮމިޝަންގެ "މައި ޕޯޓަލް" އަށް ޕީއެންސީ އަށް އެކްސަސް އެބައޮތް ކަމަށް އެމްޑީޕީން ބުނުމުން އީސީ އިން އެ ޕާޓީ އަށް ރައްދު ދީފި
ބުރާސްފަތި ދުވަހު އެމްޑީޕީން ބޭއްވި ނޫސްވެރިންގެ ބައްދަލުވުމުގައި ވިލިނގިލި ދާއިރާގެ ރައީސް ހުސައިން ހަސަން ވިދާޅުވީ އިލެކްޝަން ކޮމިޝަންގެ މައި ޕޯޓަލް އަށް ޕީއެންސީ އަށް އެކްސެސް އެބައޮތް ކަމަށާއި މިއީ ވަރަށް ބޮޑު މައްސަލަ އެއް ކަމަށް.
ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީ އަށް މަސައްކަތްކުރާ ކޮމިޓީގެ އިންތީޚާބު 2026 އާ ގުޅޭގޮތުން މަޢުލޫމާތު ޙިއްސާކުރުމަށް ބޭއްވި ޕްރެސް ކޮންފަރެންސްގެ ތެރެއިން. | އިލެކްޝަންސް ކޮމިޝަން
ލޯކަލް ކައުންސިލަށް ކުރިމަތިލާ ކެނޑިޑޭޓުން ފޯމު ހުށަހަޅާ "މައި ޕޯޓަލް" އަށް ސަރުކާރުގެ ޕާޓީ، ޕީއެންސީ އަށް އެކްސަސް އެބައޮތް ކަމަށް އެމްޑީޕީން ބުނުމާއި ގުޅިގެން އިލެކްޝަން ކޮމިޝަނުން އެކަން ދޮގުކޮށް އެ ޕާޓީ އަށް ރައްދު ދީފި އެވެ.
ބުރާސްފަތި ދުވަހު އެމްޑީޕީން ބޭއްވި ނޫސްވެރިންގެ ބައްދަލުވުމުގައި އިލެކްޝަން ކޮމިޝަންގެ "މައި ޕޯޓަލް" އަށް ޕީއެންސީ އަށް އެކްސަސް އެބައޮތް ކަމަށް އެމްޑީޕީގެ ވިލިނގިލި ދާއިރާގެ ރައީސް ހުސައިން ހަސަން ވިދާޅުވުމުން އެކަން ދޮގުކޮށް އިލެކްޝަން ކޮމިޝަނުން ނެރުނު ނޫސްބަޔާނެއްގައި ބުނީ، އެކޮމިޝަނުން ގާއިމުކޮށްފައިވާ ނިޒާމުތަކުގައިވާ މައުލޫމާތުތަކަކީ ރައްކާތެރިކަމާ އެކު، އެމައުލުމާތު ބޭނުން ކުރަންޖެހޭ ހާލަތްތަކުގައި ހުއްދަ ލިބިފައިވާ ފަރާތްތަކަށް އެކަނި ބޭނުންކުރެވޭ ގޮތަށް ފަރުމާ ކޮށްފައިވާ ނިޒާމެއް ކަމަށެވެ.
އިލެކްޝަން ކޮމިޝަނުން އެކަން ދޮގުކުރި ނަމަވެސް އެމްޑީޕީ އިން ބޭއްވި ނޫސްވެރިންގެ ބައްދަލުވުމުގައި ހުސައިން ވިދާޅުވީ އީސީގެ މައި ޕޯޓަލް އަށް ހުށަހަޅާ ފޯމާއި، އެ މައުލޫމާތުތައް ޕީއެންސީ އަށް ލިބޭ ކަމަށާއި، މިއީ ވަރަށް ބޮޑު މައްސަލަ އެއް ކަމަށެވެ. އެހެންކަމުން އެ ޕާޓީ އަށް މި ޕޯޓަލްގެ އެކްސެސް އެބައޮތް ކަމަށް އޭނާ ވިދާޅުވި އެވެ. އަދި ވިދާޅުވީ މައުލޫމާތު ލީކުވާ ކެންޑިޑޭޓުން އަމިއްލަ އަށް އައިސް އެ ވާހަކަތައް ހިއްސާ ކުރާ ކަަމަށެވެ.
އިލެކްޝަން ކޮމިޝަން އިން ނެރުނު ނޫސްބަޔާނުގައި އިތުރަށް ބުނީ، އިންތިހާބަށް ކުރިމަތިލުމަށް އެދޭ މީހާ އެކަމަށް އެދި ހުށަހަޅާ ލިޔުން އިލެކްޝަންސް ކޮމިޝަން އަށް ލިބޭތާ 5 ދުވަހުގެ ތެރޭގައި، ހުށަހެޅުމާ މެދު ނިންމިގޮތް އަންގަންވާނެ ކަމަށް ބަޔާންކޮށްފައިވީ ނަމަވެސް ކެނޑިޑޭޓަކަށް ވުމަށް އެދި ފޯމު ލިބެމުންދާ މިންވަރަކުން 5 ދުވަސް ކުރިން ޖަވާބު ދެމުންގެންދާ ކަމަށެވެ.
