ކައުންސިލް އަދި ޑަބްލިއުޑީސީ އަށް ވާދަކުރާ ކެންޑިޑޭޓުންގެ ފޯމު މެނުއަލްކޮށް ވެސް ބަލައިގަތުމަށް އެމްޑީޕީ އިން ގޮވާލައިފި

ކުރިޔަށް އޮތް ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީ (ޑަބްލިއުޑީސީ) ގެ އިންތިހާބަށް ވާދަކުރާ ކެންޑިޑޭޓުންގެ ފޯމު މެނުއަލްކޮށް ވެސް ބަލައިގަތުމަށް މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން އިލެކްޝަންސް ކޮމިޝަނަށް ގޮވާލައިފި އެވެ.

އިންތިހާބަށް ކުރިމަތިލުމަށް ދީފައިވާ މުއްދަތު ކުޑަކަމުން އަދި އޮންލައިންކޮށް ފޯމު ހުށަހެޅުމުގައި ގިނަ ދަތިތަކެއް ކުރިމަތިވާތީ މިފަދަ ފިޔަވަޅު އެޅުމަށް އެ ޕާޓީ އިން ވަނީ ގޮވާލާފަ އެވެ.

ކައުންސިލް އިންތިހާބަށް އެމްޑީޕީން ހަމަޖައްސާފައިވާ ތަރުޖަމާން ދިއްދޫ ދާއިރާގެ ރައީސް އަބްދުﷲ ވަހީދު އެކްސްގައި ކުރެއްވި ޕޯސްޓެއްގައި ވިދާޅުވީ މެނުއަލްކޮށް ފޯމު ބަލައިގަތުމުގެ އިންތިޒާމު ހަމަޖައްސަން އީސީ އަށް ގޮވާލާ ކަމަށެވެ. އޭނާ ވިދާޅުވީ އިންތިހާބުގައި ވާދަކުރުމަށް އޮންލައިންކޮށް ކުރިމަތިލުމަށް ގިނަ ދަތިތަކެއް ކުރިމަތިވާތީ 24 ގަޑިއިރު އޮންލައިންކޮށް ފޯމް ބަލައިގަތުމުގެ އިންތިޒާމް ހަމަޖެއްސުމަށް ވެސް އީސީ އަށް ގޮވާލާ ކަމަށެވެ.

އެމްޑީޕީގެ އިތުރުން ޕީއެންއެފް އިން ވެސް ވަނީ އެ ޕާޓީގެ ކަންބޮޑުވުންތައް އީސީއަށް ހުށަހަޅާފަ އެވެ. ކައުންސިލް އިންތިހާބުގައި ކެންޑިޑޭޓުންނަށް އީސީން ވަނީ ޤާނޫނާއި ހިލާފު ޝަރުތުތަކެއް ކުރިމަތިކުރުވާފައި ކަމަށާއި އެކަން ބަދަލު ނުކުރާނަމަ ކޯޓަށް މައްސަލަ ހުށަހަޅާނެ ކަމަށް އެ ޕާޓީން ބުނެފައިވެ އެވެ.

ޕީއެންއެފް އިން ބުނީ ހަމައެކަނި އޮންލައިންކޮށް ކެންޑިޑޭޓުންނަށް ފޯމު ހުށަހެޅޭ ގޮތަށް އިންތިޒާމްތައް ހަމަޖެއްސުމަކީ ބަލައިގަނެވޭ ކަމެއް ނޫން ކަމަށާއި އީސީއަށް ގޮސްގެން ފޯމު ހުށަހެޅުމުގެ މަސައްކަތް ކުރެވޭނެ މަގު ފަހިކޮށްދޭން ޖެހޭނެ ކަމަށެވެ. އެ ޕާޓީން ވަނީ ދެ ހުށަހެޅުމެއް އީސީއަށް ހުށަހަޅާފަ އެވެ. އެއީ އީފާސް ޝަރުތެއްގެ ގޮތުގައި އޮތުމަށް ބަދަލު ގެނައުމާއި މިނިވަން ކެންޑިޑޭޓުންނަށް ތާއީދުކުރާ 50 މީހުންގެ ފޯމު މެނުއަލްކޮށް ފުރައިގެން ހުށަހެޅުމަށް ފުރުސަތު ދިނުމެވެ.

އީސީ އިން މިހާރު ކަނޑައަޅާފައިވާ ގޮތުން އިންތިހާބަށް ކުރިމަތިލުމަށް އޮންލައިން ކޮށް ފޯމު ހުށަހެޅޭނީ ހުކުރު ދުވަސް ފިޔަވައި ކޮންމެ ދުވަހަކު ހެނދުނު 8:30 އިން ފެށިގެން މެންދުރުފަހު 15:30 އަށް އަދި ހުކުރު ދުވަހު މެންދުރުފަހު 15:30 އިން ފެށިގެން އިރުއޮއްސި 18:00 އަށެވެ. 

އީސީން ބުނީ ކައުންސިލް އިންތިހާބަށް ކުރިމަތިލުމުގެ ފުރުސަތު ހުޅުވާލާފައިވަނީ 17 ޖެނުއަރީން ފެށިގެން 01 ފެބްރުއަރީ ވާ އާދީއްތަ ދުވަހުގެ 15:30 ގެ ނިޔަލަށް ކަމަށެވެ. ލޯކަލް ކައުންސިލްތަކުގެ އިންތިހާބާއި ޑަބްލިއުޑީސީ އިންތިހާބުގެ ވޯޓުލުން އެޕްރީލް 4 ގައި ކުރިއަށްދާނީ ހެނދުނު 8:00 އިން ފެށިގެން ހަވީރު 16:00 އަށެވެ.

އިންތިހާބުގެ ރަސްމީ ނަތީޖާ އިއުލާންކުރުމަށް ހަމަޖެހިފައިވަނީ އެޕްރީލް 11 ވާ ހޮނިހިރު ދުވަހު އެވެ.