ބޯންމައުތު އަތް ދަށުވެ، ލިވަޕޫލްގެ ރެކޯޑު ނިމުމަކަށް

އިނގިރޭސި ޕްރިމިއާ ލީގުގައި ބޯންމައުތާ ދެކޮޅަށް ކުޅުނު މެޗުން ބަލިވެ، އެންމެ ފަހުގެ ޗެމްޕިއަން ލިވަޕޫލްގެ ޙާލަތު ދަށް ވެއްޖެ އެވެ.

ބޯންމައުތުގެ އަމިއްލަ ދަނޑުގައި ކުޅުނު މެޗުގައި އެ ޓީމުން ވަނީ 3-2 އިން ލިވަޕޫލް ބަލިކޮށްފަ އެވެ. މެޗުގައި ބޯންމައުތުން ދެ ލަނޑުގެ ލީޑެއް ހޯދާފައި ވަނިކޮށް، ލިވަޕޫލް އިން ނަތީޖާ ހަމަހަމަ ވެސް ކުރި އެވެ. ނަމަވެސް، މެޗުގެ ފަހު ވަގުތުގައި ލަނޑު ޖަހައިގެން ބޯންމައުތު ވަނީ މެޗުން މޮޅުވެފަ އެވެ.

މެޗުގެ 26 ވަނަ މިނެޓުގައި ބޯންމައުތަށް ލަނޑު ޖަހައި ލީޑު ނަގައިދިނީ އެވަނިލްސަން އެވެ. އޭގެ ފަހުން މެޗުގެ 33 ވަނަ މިނެޓުގައި އަލެކްސް ހިނިމޭޒް ޖެހި ލަނޑާ އެކު، ބޯންމައުތުން ވަނީ ލީޑު ފުޅާ ކޮށްފަ އެވެ. މެޗުގެ ފުރަތަމަ ހާފުގެ ފަހު ވަގުތު ލިވަޕޫލްގެ ވާޖިލް ވެން ޑައިކް ވަނީ ލަނޑު ޖަހައި އެ ޓީމަށް ފަރަގު ކުޑަ ކޮށްދީފަ އެވެ. 

ދެ ވަނަ ހާފުގައި ލިވަޕޫލް އިން ރަނގަޅަށް ކުޅެން މަސައްކަތް ކުރިއިރު، ދެ ވަނަ ލަނޑެއް ޖަހައި ނަތީޖާ ހަމަހަމަ ވެސް ކުރި އެވެ. އެގޮތުން މެޗުގެ 80 ވަނަ މިނެޓުގައި ލިވަޕޫލް އަށް ނަތީޖާ ހަމަހަމަ ކޮށްދިނީ ޑޮމިނިކް ސޮބޮސްލާއީ އެވެ. ނަމަވެސް، މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި  އަމީން އަދްލީ ވަނީ ލަނޑު ޖަހައި ބޯންމައުތު މޮޅު ކޮށްދީފަ އެވެ.

ބޯންމައުތު އަތުން ވީ ބައްޔާ އެކު، އެންމެ ފަހުން ލީގުގައި ކުޅުނު ފަސް މެޗު ވެސް ލިވަޕޫލް އިން ނިންމާލަން ޖެހުނީ މޮޅެއް ނުހޯދި އެވެ. އަނެއްކޮޅުން ލީގުގައި ލިވަޕޫލް އިން ދަމަހައްޓަމުން އައި ބަލިނުވުމުގެ ރެކޯޑަށް ވެސް ވަނީ ނިމުން އައިސްފަ އެވެ. ލިވަޕޫލް ވަނީ ބަލި ނުވެ 13 މެޗު ހަމަ ކޮށްފަ އެވެ.

ބައްޔާ އެކު ލީގު ތާވަލްގެ ހަތަރު ވަނަ މަގާމުގައި ލިވަޕޫލް އޮތީ މިހާތަނަށް ކުޅެފައިވާ 23 މެޗުން 36 ޕޮއިންޓާ އެކު އެވެ. މިއީ މި ސީޒަންގެ ލީގުގައި ލިވަޕޫލްގެ ހަތް ވަނަ ބައްޔެވެ.