ބްރެންޓްފޯޑު ބަލިކޮށް، ޗެލްސީ ހަ ވަަނައިގައި

އިނގިރޭސި ޕްރިމިއާ ލީގުގައި ބްރެންޓްފޯޑްއާ ދެކޮޅަށް ކުޅުނު މެޗުން މޮޅުވެ، ޗެލްސީ އިން ލީގު ތާވަލްގެ ހަ ވަނަ މަގާމަށް ޖެހިލައިފި އެވެ.

ޗެލްސީގެ އަމިއްލަ ދަނޑުގައި ކުޅުނު މެޗު އެ ޓީމުން ކާމިޔާބު ކުރީ 2-0 އިންނެވެ. މެޗުގެ ފުރަތަމަ ހާފުގައި ޗެލްސީ އިން އެއް ލަނޑު ޖެހިއިރު، އަނެއް ލަނޑު އެ ޓީމުން ޖެހީ ދެ ވަނަ ހާފުގަ އެވެ.

މެޗު ފަށައިގެން ފުރަތަމަ ހާފުގެ 26 ވަނަ މިނެޓުގައި ޗެލްސީ އިން ވަނީ ލަނޑު ޖަަހައި ލީޑު ނަަގައިފަ އެވެ. އެ ލަނޑު އެ ޓީމަށް ޖަހައިދިނީ ޔާއޯ ޕެޑްރޯ އެވެ. އެއީ އާޖެންޓީނާގެ އެންޒޯ ފެނާންޑޭޒް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. މެޗުގެ ދެ ވަނަ ހާފުގައި ޗެލްސީގެ ދެ ވަނަ ލަނޑު، 76 ވަނަ މިނެޓުގައި ކޯލް ޕާމާ ޖެހީ އެ ޓީމަށް ލިބުނު ޕެނަލްޓީ ކާމިޔާބު ކޮށްގެންނެވެ. 

މެޗަށް ފަހު ވާހަކަ ދައްކަމުން ޗެލްސީގެ ކޯޗު ލިއަމް ރޮސެނިއާ ބުނީ، މެޗުގައި ޗެލްސީގެ އެންމެ މޮޅު ކުޅުމާއި ފެންވަރު ނުދެއްކުނު ނަމަވެސް، ޓީމުގެ ކުޅުންތެރިން ކުރި މަސައްކަތް ފާހަގަ ކުރާ ކަމަށެވެ. ޚާއްސަކޮށް މެޗުން ތިން ޕޮއިންޓު ހޯދުމަށް ޗެލްސީގެ ކުޅުންތެރިން ކުރި ހިތްވަރު އޭނާ ވަނީ ފާހަގަ ކޮށްފަ އެވެ.

ބްރެންޓްފޯޑަކީ ވެސް ރަނގަޅު ޓީމެއްކަން ފާހަގަކޮށް އޭނާ ބުނީ، ޗެލްސީގެ ކުޅުންތެރިން ދައްކައިދިނީ އެ ޓީމަށް މޮޅު ވެވޭނެކަން ކަމަށެވެ. އެންމެ އާދައިގެ ކަންކަމުން ފެށިގެން ގޮސް، އެންމެ މުހިންމު ކަންކަން ކުރުމަށް އިސްކަން ދޭން ޖެހޭ ަކމަށް ރޮސެނިއާ ވަނީ ބުނެފަ އެވެ. ރޮސެނިއާ ބުނީ އޭނާ އެންމެ ހިތްހަމަ ޖެހެނީ މެޗުގައި ދެ ލަނޑު ޖަހައި، އޭގެ އިތުރަށް ކުޅުންތެރިން ކުރި މަސައްކަތް ކަމަށެވެ.

މިއީ ޗެލްސީގެ ކޯޗުކަމާ ރޮސެނިއާ ހަވާލުވި ފަހުން އެ ޓީމުން ކުޅުނު ތިން ވަނަ މެޗެވެ. އޭގެ ތެރެއިން ދެ މެޗުން ޗެލްސީ މޮޅުވެފައިވާއިރު، އަނެއް މެޗުން ވަނީ އެއްވަރުވެފަ އެވެ. ބްރެންޓްފޯޑު އަތުން ހޯދި މޮޅާ އެކު، ޗެލްސީ އޮތީ ލީގު ތާވަލްގެ ހަ ވަަނައިގަ އެވެ. އެއީ މިހާތަނަށް އެ ޓީމު ކުޅެފައިވާ 22 މެޗުން 34 ޕޮއިންޓާ އެކު އެވެ.