ފަހު ވަގުތު ޗެލްސީ އިން ސިޓީއާ އެއްވަރު ކޮށްފި
މި ނަތީޖާ އާއެކު ސިޓީ އޮތީ ލީގު ތާވަލްގެ ދެ ވަނައިގަ އެވެ. އެއީ މިހާތަނަށް ކުޅެފައިވާ 20 މެޗުން 42 ޕޮއިންޓާ އެކު. ހަމަ އެ އަދަދަށް މެޗު ކުޅެގެން އެއް ވަަނައިގައި އާސެނަލް އަށް 48 ޕޮއިންޓު ލިބޭއިރު، ދެ ޓީމުގެ ދެ މެދުގައި ހަ ޕޮއިންޓުގެ ފަރަގެއް އެބަ އޮތް.
މެޗުގައި ލަނޑު ޖެހުމަށް ފަހު ޗެލްސީގެ އެންޒޯ ފެނާންޑޭސް އުފާ ފާޅު ކުރަނީ
އިނގިރޭސި ޕްރިމިއާ ލީގުގައި މެންޗެސްޓަރ ސިޓީ އާއި ޗެލްސީ ބައްދަލު ކުރި މެޗު އެއްވަރު ވެގެން ނިމިއްޖެ އެވެ.
ސިޓީގެ އަމިއްލަ ދަނޑު، އިއްތިހާދު ސްޓޭޑިއަމްގައި އާދީއްތަ ދުވަހުގެ ރޭ ކުޅުނު މެޗު ނިމުނީ ދެ ޓީމު 1-1 އިން އެއްވަރު ވެގެންނެވެ. މެޗުގައި ސިޓީ އިން ލަނޑު ޖަހައި ކުރި ހޯދާފައި ވަނިކޮށް، ޗެލްސީ އިން ވަނީ ފަހަތުން އަރައި ލަނޑު ޖަަހައިގެން ނަތީޖާ ހަމަހަމަ ކޮށްފަ އެވެ.
މެޗުގެ ފުރަތަމަ ހާފުގެ ފުރިހަމަ ވަގުތު ހަމަވާން ތިން މިނެޓަށް ވެފައި ވަނިކޮށް، ސިޓީ އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ޓިޖާނީ ރެއިންޖާސް އެވެ. އޭގެ ފަހުން ވެސް މެޗުގައި އިތުރު ލަނޑު ޖަހާނެ ފުރުސަތު ސިޓީ އަށް ވަނީ ލިބިފަ އެވެ.
މެޗުގައި ލަނޑު ޖަހައި ނަތީޖާ ހަމަހަމަ ކުރުމަށް ޗެލްސީ އިން ކުރި މަސައްކަތް ކާމިޔާބުވީ މެޗުގެ ފަހު ވަގުތުގަ އެވެ. އެގޮތުން މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ޗެލްސީ އަށް ނަތީޖާ ހަމަހަމަ ކޮށްދިނީ އާޖެންޓީނާގެ އެންޒޯ ފެނާާންޑޭސް އެވެ.
މިއީ ޗެލްސީގެ ކޯޗު ކަމުގެ މަގާމުން އެންޒޯ މަރެސްކާ ވަކިވި ފަހުން އެ ޓީމުން ކުޅުނު ފުރަތަމަ މެޗެވެ. ޗެލްސީގެ ނަތީޖާ ދަށްވެ، މަރެސްކާ އަށް ޕްރެޝަރު ބޮޑުވެ، އެތެރޭގެ މައްސަލަ ތަކެއް ޖެހިފައި ވަނިކޮށް އޭނާ ވަނީ ޗެލްސީ ދޫކޮށްލައިފަ އެވެ. ސިޓީއާ ދެކޮޅަށް ޗެލްސީ އިން ކުޅުނު މެޗުގައި އެ ޓީމަށް އިރުޝާދު ދިނީ ވަގުތީ ކޯޗު ކަލުމް މެކްފާލޭން އެވެ.
މެޗަށް ފަހު ވާހަކަ ދައްކަމުން ސިޓީގެ ކޯޗު ޕެޕް ގާޑިއޯލާ ބުނެފައި ވަނީ، މެޗުގެ ފުރަތަމަ ހާފުގައި ސިޓީ އިން ރަނގަޅަށް ކުޅުނު ކަމަށާއި، ދެ ވަނަ ހާފުގައި ވެސް އެ ޓީމުން ފުރުސަތު ތަކެއް ހޯދި ކަމަށެވެ. ނަމަވެސް، ސިޓީ އަށް ލިބުނު ދެ ފުރުސަތެއް ގެއްލުނީ ކަމަށާއި، އޭގެ ފަހުން ޗެލްސީ އިން ލަނޑު ޖަހައި ނަތީޖާ ހަމަހަމަ ކުރި ކަމަށް ގާޑިއޯލާ ފާހަގަ ކުރި އެވެ.
ޗެލްސީ އަކީ ދުނިޔޭގެ ޗެމްޕިއަން ޓީމުކަން ފާހަގަކޮށް ގާޑިއޯލާ ބުނީ، އެއީ އެކަޑަމީ ޓީމެއް ނޫން ކަމަށެވެ. ޗެލްސީއާ ދެކޮޅަށް ކުޅޭ ކޮންމެ މެޗެއްގެ މުޅި 90 މިނެޓު ވެސް އުނދަގޫ ވާނެ ކަމަށް ގާޑިއޯލާ ބުންޏެވެ. އޭނާ ބުނީ ސިޓީ އަށް ދިމާވި އެންމެ ބޮޑު މައްސަލަ އަކީ ދެ ވަނަ ހާފުގައި ލިބުނު ފުރުސަތު ތަކުގެ ބޭނުން ނުކުރެެވުން ކަމަށާއި، މެޗު އަތުން ދޫވީ އަމިއްލަ އަށް ހެދުނު ގޯސްތަކެއްގެ ސަބަބުން ކަމަށެވެ.
މި ނަތީޖާ އާއެކު ސިޓީ އޮތީ ލީގު ތާވަލްގެ ދެ ވަނައިގަ އެވެ. އެއީ މިހާތަނަށް ކުޅެފައިވާ 20 މެޗުން 42 ޕޮއިންޓާ އެކު އެވެ. ހަމަ އެ އަދަދަށް މެޗު ކުޅެގެން އެއް ވަަނައިގައި އާސެނަލް އަށް 48 ޕޮއިންޓު ލިބޭއިރު، ދެ ޓީމުގެ ދެ މެދުގައި ހަ ޕޮއިންޓުގެ ފަރަގެއް އެބަ އޮތެވެ. ސިޓީ އަތުން ހޯދި ޕޮއިންޓާ އެކު، ތާވަލްގެ ފަސް ވަނައިގައި ޗެލްސީ އޮތީ 31 ޕޮއިންޓާ އެކު އެވެ.
