ބްރައިޓަން އަތުން ވެސް ސިޓީ ފުއްދާލަން ޖެހުނީ ޕޮއިންޓަކުން
ބްރައިޓަން އަތުން ސިޓީ އެއްވަރުވެފައިވާއިރު، އޭގެ ކުރިން ޗެލްސީއާ ދެކޮޅަށް ކުޅުނު މެޗުން ވެސް ސިޓީ ވަނީ އެއްވަރުވެފައި. މެޗުން ލިބުނު އެއް ޕޮއިންޓާ އެކު، ލީގު ތާވަލްގެ ދެ ވަނަ މަގާމުގައި ސިޓީ އޮތީ 21 މެޗުން 43 ޕޮއިންޓާ އެކު.
މެންޗެސްޓަރ ސިޓީ އާއި ބްރައިޓަން ވާދަ ކުރި މެޗުގެ ތެރެއިން | ރޮއިޓަސް
އިނގިރޭސި ޕްރިމިއަރ ލީގުގައި ބްރައިޓަންއާ ދެކޮޅަށް ކުޅުނު މެޗުން ވެސް، މެންޗެސްޓަރ ސިޓީ އެއްވަރުވެއްޖެ އެވެ.
ބުދަ ދުވަހުގެ ރޭ ކުޅުނު މެޗު ނިމުނީ ދެ ޓީމު 1-1 އިން އެއްވަރު ވެގެންނެވެ. ސިޓީގެ އަމިއްލަ ދަނޑު، އިއްތިހާދު ސްޓޭޑިއަމްގައި ކުޅުނު މެޗުގައި ފުރަތަމަ ލަނޑު ޖަހައި ލީޑު ނެގީ ވެސް ސިޓީ އިންނެވެ. ނަަމަވެސް ބްރައިޓަން އިން ވަނީ ފަހަތުން އަރައި ލަނޑު ޖަހައިގެން ސިޓީއާ އެއްވަރު ކޮށްފަ އެވެ.
މެޗުގެ ފުރަތަމަ ހާފުގެ ފުރިހަމަ ވަގުތު ހަމަވާން ހަތަރު މިނެޓަށް ވެފައި ވަނިކޮށް، ސިޓީ އަށް ލީޑު ނަގައިދިނީ ނޯވޭގެ އާލިން ހާލަންޑް އެވެ. އެއީ ސިޓީ އަށް ލިބުނު ޕެނަލްޓީއެއް ކާމިޔާބު ކޮށްގެން ހާލަންޑު ޖެހި ލަނޑެކެވެ.
އޭގެ ފަހުން ވެސް މެޗުގައި އިތުރު ލަނޑު ޖަހަން ސިޓީ އަށް ވަނީ ފުރުސަތު ލިބިފަ އެވެ. ނަމަވެސް، ސިޓީ އަށް ފުރުސަތުގެ ބޭނުން ކުރެވޭ ގޮތެއް ނުވި އެވެ. މެޗުގެ 60 ވަނަ މިނެޓުގައި ބްރައިޓަން އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ކައޯރޫ މިޓޯމާ އެވެ.
ބްރައިޓަން އަތުން ސިޓީ އެއްވަރުވެފައިވާއިރު، އޭގެ ކުރިން ޗެލްސީއާ ދެކޮޅަށް ކުޅުނު މެޗުން ވެސް ސިޓީ ވަނީ އެއްވަރުވެފަ އެވެ. މެޗުން ލިބުނު އެއް ޕޮއިންޓާ އެކު، ލީގު ތާވަލްގެ ދެ ވަނަ މަގާމުގައި ސިޓީ އޮތީ 21 މެޗުން 43 ޕޮއިންޓާ އެކު އެވެ. ސިިޓީ އަށް ވުރެ އެއް މެޗު މަދުން ކުޅެފައިވާ އާސެނަލް އެއް ވަނައިގައި އޮތްއިރު، މެޗުގެ އަދަދު ހަމަކޮށް ލީޑު ފުޅާ ކުރުމުގެ ފުރުސަތު އާސެނަލް އަށް އޮންނާނެ އެވެ.
މެޗަށް ފަހު ވާހަކަ ދައްކަމުން ސިޓީގެ ކޯޗު ޕެޕް ގާޑިއޯލާ ބުނެފައި ވަނީ، މެޗުގެ ނަތީޖާ އެއީ ނަތީޖާ ކަމަށެވެ. އޭނާ ބުނީ މެޗުން ސިޓީ އަށް މޮޅުވުން ހައްގުތޯ ނުވަތަ ނޫންތޯ އެއީ ދައްކަން މުހިންމު ވާހަކައެއް ނޫން ކަމަށެވެ. ސިޓީ އަށް ލިބުނީ އެއް ޕޮއިންޓުކަން ފާހަގަކޮށް ގާޑިއޯލާ ބުނީ، ކުރިން މެޗުތަކާ ދާދި އެއް ގޮތް ކަންތަކެއް ދިމާވި ކަމަށެވެ.
މެޗުގައި ސިޓީގެ އައު ކުޅުންތެރިންނަށް ގާޑިއޯލާ ފުރުސަތު ދީފައިވާއިރު، އޭނާ ބުނީ އެ ކުޅުންތެރިން ދެއްކި ކުޅުމާ މެދު ޖުމުލަ ގޮތެއްގައި ހިތްހަމަ ޖެހޭ ކަމަށެވެ. ނަމަވެސް، މެޗުގައި ސިޓީ އަށް ލަނޑު ޖަހާނެ އެތައް ފުރުސަތު ތަކެއް ލިބުނުއިރު ވެސް، ފުރުސަތުގެ ބޭނުން ނުކުރެވުނު ކަމަށް އޭނާ ބުންޏެވެ. އެކަން ފާހަގަކޮށް ގާޑިއޯލާ ބުނީ، އެއީ އެންމެ ކުޅުންތެރިޔެއް ނުވަތަ ދެ ކުޅުންތެރިޔެއްގެ ކަމެއް ނޫން ކަމަށާއި، އެއީ ހުރިހާ ކުޅުންތެރިންގެ ކަމެއް ކަމަށެވެ.
