އެވަޓަން އަތުން ބަލިވެ، އެސްޓަން ވިލާ އިން ފުރުސަތު ނަގާލައިފި

އިނގިރޭސި ޕްރިމިއާ ލީގުގައި އެވަޓަންއާ ދެކޮޅަށް ކުޅުނު މެޗުން ބަލިވެ، ލީގު ތާވަލްގެ ކުރިއަށް ޖެހިލަން ލިބުނު ފުރުސަތު އެސްޓަން ވިލާ އިން ނަގާލައިފި އެވެ.

އާދީއްތަ ދުވަހުގެ ރޭ އެސްޓަން ވިލާގެ އަމިއްލަ ދަނޑުގައި ކުޅުނު މެޗުގައި އެ ޓީމު ވަނީ، 1-0 އިން އެވަޓަން އަތުން ބަލިވެފަ އެވެ. މެޗުގައި އެވަޓަން އިން ލަނޑު ޖެހީ ވެސް މެޗުގެ ދެ ވަނަ ހާފުގަ އެވެ.

މެޗު ފަށައިގެން ވެސް އެވަޓަން އިން ރަނގަޅަށް ކުޅެފައިވާއިރު، ލަނޑު ޖެހުމަށް އެ ޓީމުން ފޮނުވާލި ދެ ހަމަލާއެއް އެސްޓަން ވިލާގެ ގޯލު ކީޕަރު އެމިލިއާނޯ މާޓިނޭޒް ވަނީ މަތަކޮށްފަ އެވެ. އޭގެ ފަހުން އެވަޓަން އިން ލަނޑެއް ޖެހި ނަމަވެސް، އެއީ އޮފްސައިޑު ލަނޑެއް ކަމަށް ވަނީ ނިންމައިފަ އެވެ.

މެޗުގެ ދެ ވަނަ ހާފު ފަށައިގެން 14 ވަނަ މިނެޓުގައި އެވަޓަން އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެވަޓަން އަށް ޖަހައިދިނީ ތިއާނޯ ބެރީ އެވެ. އެއީ އެސްޓަން ވިލާގެ ކީޕަރު މާޓިނޭޒް އަތުގައި ޖެހިފައި ރީ ބައުންސަށް އައި ބޯޅަ ގޮލަށް ފޮނުވާލައިގެން އޭނާ ޖެހި ލަނޑެކެވެ.

މެޗުން ބަލިވެ އެސްޓަން ވިލާ އޮތީ ލީގު ތާވަލްގެ ތިން ވަނަ މަގާމުގަ އެވެ. އެއީ މިހާތަނަށް ލީގުގައި ކުޅެފައިވާ 22 މެޗުން 43 ޕޮއިންޓާ އެކު އެވެ. ހަމަ އެ އަދަދަށް މެޗު ކުޅެގެން ދެ ވަަނައިގައި އޮތް މެންޗެސްޓަރ ސިޓީ އަށް ވެސް ލިބެނީ 43 ޕޮއިންޓެވެ. އެވަޓަން އަތުން މޮޅުވެ، ދެ ވަނަ އަށް ޖެހިލުމުގެ ފުރުސަތު އެސްޓަން ވިލާ އަށް އޮތް ނަމަވެސް، ބައްޔާ އެކު ވަނީ އެ ފުރުސަތު ގެއްލިފަ އެވެ.