ބޯންމައުތު ބަލިކޮށް، އެއް ވަނައިގައި އާސެނަލް އަށް ހަ ޕޮއިންޓުގެ ލީޑެއް

އިނގިރޭސި ޕްރިމިއާ ލީގުގައި ބޯންމައުތާ ދެކޮޅަށް ކުޅުނު މެޗުން މޮޅުވެ، އާސެނަލް އިން މަގާމު ދަމަހައްޓައި، އެއް ވަނައިގައި ހަ ޕޮއިންޓުގެ ލީޑެއް ނަގައިފި އެވެ.

ބޯންމައުތުގެ އަމިއްލަ ދަނޑުގައި ހޮނިހިރު ދުވަހުގެ ރޭ ކުޅުނު މެޗު އާސެނަލް އިން ކާމިޔާބު ކުރީ 3-2 އިންނެވެ. މެޗުގައި ބޯންމައުތުން ލަނޑު ޖަހައި ލީޑު ނަގާފައި ވަނިކޮށް، އާސެނަލް އިން ވަނީ ފަހަތުން އަރައި ތިން ލަނޑު ޖަހައިފަ އެވެ. އޭގެ ފަހުން ބޯންމައުތުން ވަނީ ތިން ވަނަ ލަނޑެއް ޖަހައިފަ އެވެ.

މެޗު ފަށައިގެން 10 ވަނަ މިނެޓުގައި ބޯންމައުތުން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ އެވަނިލްސަން އެވެ. ނަމަވެސް، އޭގެ ހަ މިނެޓު ފަހުން ގަބްރިއެލް މަގާޅައެސް ވަނީ ލަނޑު ޖަހައި އާސެނަލް އަށް މެޗުގެ ނަތީޖާ ހަމަހަމަ ކޮށްދީފަ އެވެ. 

މެޗުގެ ދެ ވަނަ ހާފު ފަށައިގެން ނުވަ ވަނަ މިނެޓުގައި އާސެނަލް އިން ވަނީ ދެ ވަނަ ލަނޑެއް ޖަހައި ލީޑު ނަަގައިފަ އެވެ. މާޓިން އޮޑެގާޑް ތަނަވަސްކޮށްދިން ފުރުސަތެއްގައި އާސެނަލް އަށް އެ ލަނޑު ޖަހައިދިނީ ޑެކްލަން ރައިސް އެވެ. 

އޭގެ ފަހުން މެޗުގެ 71 ވަނަ މިނެޓުގައި ރައިސް ވަނީ އާސެނަލްގެ ތިން ވަނަ ލަނޑު ޖަހައި އިތުރަށް ލީޑު ފުޅާ ކޮށްފަ އެވެ. އެ ލަނޑު ޖަަހަން ރައިސް އަށް ފުރުސަތު ތަނަވަސްކޮށްދިނީ ބުކަޔޯ ސަކާ އެވެ. އޭގެ ފަސް މިނެޓު ފަހުން ކްރޫޕީ ޖޫނިއާ ވަނީ ބޯންމައުތުގެ ދެ ވަނަ ލަނޑު ޖަހައިފަ އެވެ. 

މޮޅާއެކު އާސެނަލް އިން ވަނީ އެއް ވަނައިގައި ހަ ޕޮއިންޓުގެ ލީޑެއް ނަގައިފަ އެވެ. މިހާތަނަށް ކުޅެފައިވާ 20 މެޗުން އެ ޓީމަށް ލިބެނީ 48 ޕޮއިންޓެވެ. ހަމަ އެ އަދަދަށް މެޗު ކުޅެގެން ދެ ވަނައިގައި އޮތް އެސްޓަން ވިލާ އަށް ލިބެނީ 42 ޕޮއިންޓެވެ. ތިން ވަނައިގައި މެންޗެސްޓަރ ސިޓީ އަށް 41 ޕޮއިންޓު ލިބެނީ އެއް މެޗު މަދުން ކުޅެގެންނެވެ. 

މެޗަށް ފަހު ވާހަކަ ދައްކަމުން އާސެނަލްގެ ކޯޗު މިކޭލް އާޓެޓާ ބުނީ، މެޗުގެ ފުރަތަމަ ހާފަށް ބަލާއިރު އާސެނަލް އަށް އުނދަގޫ ތަކެއް ދިމާވި ކަމަށެވެ. ނަމަވެސް، ކަންކަން ދަސް ކުރުމަށް ފަހު ދެ ވަނަ ހާފަށް ނިކުމެ ކުޅުންތެރިން ދެއްކި ކުޅުމާ މެދު ހިތްހަމަ ޖެހޭ ކަމަށް އޭނާ ބުންޏެވެ. ޚާއްސަކޮށް އާސެނަލް އަށް ލިބުނު ފުރުސަތުގެ ބޭނުން އެންމެ ރަނގަޅު ގޮތުގައި ހިފުމަށް ކުޅުންތެރިން މަަސައްކަތް ކުރި މަންޒަރު ފެނުނު ކަމަށް އޭނާ ބުންޏެވެ. 

އާޓެޓާ ބުނީ މެޗަކުން މޮޅުވުމަށް ވަރަށް ގިނަ ކަންކަން ކުރަން ޖެހޭ ކަމަށާއި، އާސެނަލްގެ ކުޅުންތެރިން އެކަން ކުރި މަންޒަރު އޭނާ އަށް ފެނުނު ކަމަށެވެ. އެއް ލަނޑުން ފަހަތުގައި އޮއްވާ، އާސެނަލް އިން ފަހަތުން އަރައި ތިން ލަނޑު ޖެހީ ހަމަޖެހިލައިގެން ތިބެ ނޫން ކަމަށް އާޓެޓާ ބުންޏެވެ. އޭނާ ބުނީ އެކަންކަމާ މެދު ފުންކޮށް ވިސްނައި، ހުރިހާ ކަމަކަށް ނަޒަރު ހިންގާއިރު، ފެންނާނީ ކުޅުންތެރިން ކުރި މަސައްކަތް އަދި ދެއްކި ހިތްވަރު ކަމަށެވެ. 

މީގެ އިތުރުން އާޓެޓާ ބުނީ އާސެނަލްގެ ވަކި ވަކި ކުޅުންތެރިން ވެސް، ކުޅުމުގެ ފެންވަރު ރަނގަޅު ކުރަން ވަރަށް ގިނަ މަސައްކަތް ކުރާ ކަމަށެވެ. އެ މެޗުގައި ދެ ލަނޑު ޖެހި ރައިސް އަންނަނީ ރަނގަޅު ކުޅުމެއް ދައްކަމުންކަން ފާހަގަކޮށް އާޓެޓާ ބުނީ، ގެބްރިއަލް ވެސް މެޗުގައި ރަނގަޅު ކުޅުމެއް ދެއްކި ކަމަށެވެ. އޭނާ ބުނީ އަބަދު ވެސް މަސައްކަތް ކުރަން ވާނީ ޓީމެއްގެ ގޮތުގައި ކުރިއަށް ދާން ކަމަށާއި، އާސެނަލް އިން ވަރަށް ގިނަ ކަންކަން ޙާސިލު ކުރަން ޖެހިފައިވާ ކަމަށެވެ.