ރައީސް މުއިއްޒު މަސައްކަތް ކުރައްވަނީ ކައުންސިލްތަކަކީ ރައީސް އޮފީހުން އަންގާ އެންގުންތައް އެކަނި ތަންފީޒު ކުރާ އިދާރާއަކަށް ހެދުމަށް: ނިޔާޒު
ނިޔާޒު ވިދާޅުވީ ރައީސް މުއިއްޒު ކައުންސިލަރުންގެ ބޮލުގައި ދޮގު އިލްޒާމު އަޅުވައި އަގު ވައްޓާލުމަށް މަސައްކަތް ކުރައްވާ ކަމަށް.
އެމްޑީޕީގެ ނޫސްވެރިންގެ ބައްދަލުވުމުގައި ރައްޔިތުންގެ މަޖިލީހުގެ ހުޅުމާލެ ދާއިރާގެ ކުރީގެ މެންބަރު އަލީ ނިޔާޒު ވާހަކަ ދައްކަވަނީ | ރާއްޖެއެމްވީ
ރައީސް ޑރ.މުހައްމަދު މުއިއްޒު މަސައްކަތް ކުރައްވަނީ ކައުންސިލްތަކަކީ ރައީސް އޮފީހުން އަންގާ އެންގުންތައް އެކަނި ތަންފީޒު ކުރާ އިދާރާއަކަށް ހެދުމަށް ކަމަށް ރައްޔިތުންގެ މަޖިލީހުގެ ހުޅުމާލެ ދާއިރާގެ ކުރީގެ މެންބަރު އަދި ނިމިދިޔަ ރައްޔިތުން މަޖިލީހުގެ ލާމަރުކަޒީ ކޮމެޓީގެ ކުރީގެ މުގައްރިރު އަލީ ނިޔާޒު ވިދާޅުވެއްޖެ އެވެ.
ބުރާސްފަތި ދުވަހު އެމްޑީޕީން ބޭއްވި ނޫސްވެރިންގެ ބައްދަލުވުމުގައި ނިޔާޒު ވަނީ ރައީސް މުއިއްޒު ކައުންސިލަރުންގެ ބޮލުގައި ދޮގު އިލްޒާމު އަޅުވައި، ކައުންސިލަރުންގެ އަގު ވައްޓާލުމަށް މަސައްކަތް ކުރާ ކަމަށް ވިދާޅުވެފަ އެވެ.
ތަރައްގީގެ މަޝްރޫއުތައް ކުރިއަށް ނުދަނީ ކައުންސިލަރުންގެ ސަބަބުން ކަމަށް ރައީސް މުއިއްޒު ވިދާޅުވެފައިވާތީ އެކަމަށް ވެސް ފާޑު ވިދާޅުވި އެވެ. އަދި ވިދާޅުވީ މިއީ ރައްޔިތުންނަށް އޮޅުވާލައި، މަޝްރޫއުތައް ކުރިއަށް ނުގެންދިއުމަށް ދައްކާ ވާހަކަތަކެއް ކަމަށެވެ.
ނިޔާޒު ވިދާޅުވީ ރައީސް މުއިއްޒު މަސައްކަތް ކުރައްވަނީ ކައުންސިލުތަކުގެ ބާރު ކަނޑުވާލައި، އެއީ ހަމައެކަނި ރައީސް އޮފީހުން އަންގާ ކަންކަން ތަންފީޒު ކުރަން އޮންނަ އިދާރާއަކަށް ބަދަލު ކުރުމަށް ކަމަށެވެ.
މިއީ ރައީސް މުއިއްޒު ހުންނަވައިގެން ކައުންސިލުތަކުގެ އަގު ވައްޓާލާ ކައުންސިލްތަކަކީ ހަމައެކަނި ރައީސުލްޖުމްހޫރިއްޔާ އޮފީހުން އަންގާ އެންގުންތައް އެކަނި ތަންފީޒު ކުރަން އޮންނަތަނެއްގެ ގޮތުގައި ހެދުމަށްޓަކައި ހިންގާ ކެންޕޭނެއްގެ ތެރެއިން ކުރާ ކަމެއް. އެކަމުގައި އިސްވެ ހުންނެވީ ރައީސް މުއިއްޒު. ދެން ހުންނެވީ ލޯކަލް ގަވަރމަންޓް މިނިސްޓަރު އާދަމް ޝަރީފް. އެހެން މިދަންނަވަން ޖެހެނީ ގާނޫނުގައި ވަރަށް ރަނގަޅަށް ކަނޑައެޅިފައި އެބައޮތް ކައުންސިލްތަކަކީ ކޮބައިކަން.
ކައުންސިލްތަކަކީ ގާނޫނީ ވަކި ޝަހުޝެއްކަން ފާހަގަކުރައްވައި ނިޔާޒު ވިދާޅުވީ ކައުންސިލްތަކަށް އަމިއްލައަށް ކަންކަން ކުރެވޭ ކަމަށެވެ.
ލާމަރުކަޒީ ގާނޫނުގައި ކައުންސިލްތަކަށް ކުރަން އޮންނަނީ މައިގަނޑު ދެ ކަމެއް ކަމަށާއި، އެއީ ރަށްވެހިކަމުގެ ޚިދުމަތް ދިނުމާއި، ރައްޔިތުންނާ މަޝްވަރާކޮށްގެން 5 އަހަރު ދުވަހުގެ ތަރައްގީގެ ޕްލޭން އެކުލަވާލުން ކަމަށް އޭނާ ވިދާޅުވި އެވެ. އަދި ވިދާޅުވީ ބިން ބޭނުންކުރާނެ ގޮތުގެ ޕްލޭން އެކުލަވާލާ ގައުމީ އިދާރާއަކުން ފާސް ކުރަންޖެހޭ ކަމަށެވެ.
ނިޔާޒު ވިދާޅުވީ ލާމަރުކަޒީ ނިޒާމާއެކު ކައުންސިލްތަކުގެ ޒިންމާ ވަރަށް ބޮޑު ކަމަށާއި، މިބާރުވެރިކަން ދިނުމުން މިމަސައްކަތް ވަރަށް ރަނގަޅަށް ކައުންސިލްތަކުން ކުރި ކަމަށެވެ. ނަމަވެސް މިސަރުކާރާއެކު ކައުންސިލްގެ މަސައްކަތްތަކަށް ހުރަސްއަޅައި، އެއް އަހަރު މަސައްކަތް ނުކުރެވޭ ގޮތަށް ގާނޫނު ބަދަލު ކޮށްފައިވާ ކަމަށެވެ.
މީގެ އިތުރުން ނިޔާޒު ވިދާޅުވީ ރަށްރަށުގެ ކަންކަމާ ގުޅޭގޮތުން ކައުންސިލަރުން ރައްޔިތުންނަށް ޖަވާބުދާރީވާން ޖެހޭ ކަމަށެވެ. އަދި މަދުވެގެން ކޮންމެ އަހަރަކު ކައުންސިލްތަކުން ރައްޔިތުންނާއެކު ދެ ބައްދަލުވުމެއް ބާއްވައި، ތަރައްގީގެ މަޝްރޫއުތަކާ ގުޅޭގޮތުންނާއި، އަދި ރައްޔިތުންގެ ކަންބޮޑުވުންތަކާއި، ސުވާލުތަކަށް ޖަވާބު ދޭން ޖެހޭ ކަމަށް އޭނާ ވިދާޅުވި އެވެ.
މި މައުލޫމާތުތައް ކައުންސިލްތަކަށް ލިބެން އޮތީ ސަރުކާރުގެ ފަރާތުން ކަމަށާއި، ނަމަވެސް މިސަރުކާރު ޖަވާބުދާރީ ކުރުމުގެ މަސައްކަތް ކައުންސިލްތަކަށް ނުކުރެވޭނެ ކަމަށް މިސަރުކާރުގެ ބޭފުޅުން ވިދާޅުވެފައިވާ ކަމަށް ނިޔާޒު ވިދާޅުވި އެވެ. އަދި ވިދާޅުވީ ކުރިއަށް އޮތް ކައުންސިލް އިންތިޚާބުގައި ރައްޔިތުންގެ ސުވާލުތަކަށް ޖަވާބު ބޭނުންވާ ކަމަށްވާނަމަ، ސަރުކާރާ ދެކޮޅަށް އެމްޑީޕީގެ ކެންޑިޑޭޓުންނަށް ވޯޓު ދޭން ޖެހޭ ކަމަށެވެ.
