އައްޑޫ ލިންކް ރޯޑުގެ މަސައްކަތް ހުއްޓި ރައްޔިތުންގެ ފުރާނަ ނުރައްކަލަކަށް ހުށަހެޅިފައި، މިހާލަތަށް ގެންދިޔައީ ރައީސް މުއިއްޒު: މެންބަރު އަހުމަދު ދީދީ
މެންބަރު އަހުމަދު ދީދީ ވިދާޅުވީ ރައީސް މުއިއްޒު އައްޑޫގެ ތަރައްގީއަށް ވެވަޑައިގެންނެވި އެއްވެސް ވައުދެއް މިހާތަނަށް ފުއްދާފައިނުވާ ކަމަށް. އަދި ކުރިއަށް އޮތް ކައުންސިލް އިންތިޚާބަކީ ރައްޔިތުންގެ ތާއީދު މިސަރުކާރަށް ނެތްކަން ހާމަ ކުރުމަށް ލިބޭ ވަރަށް ބޮޑު ފުރުސަތެއް ކަމަށާއި، ގައުމުގެ ހާލަތަށް ބަލާއިރު، ސަރުކާރުގެ ކެންޑިޑޭޓުންނަށް ވޯޓު ދޭން ޖެހޭ އެއްވެސް ސަބަބެއް ނެތް ކަމަށް އޭނާ ވިދާޅުވި.
އެމްޑީޕީން ކުރިއަށް ގެންދިޔަ ހަރުގެ ޖަލްސާގައި ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އަހުމަދު ދީދީ ވާހަކަ ދައްކަވަނީ | ރާއްޖެއެމްވީ
ރައީސުލްޖުމްހޫރިއްޔާ ޑރ.މުހައްމަދު މުއިއްޒު އައްޑޫ ސިޓީގެ ތަރައްގީ އަށް ވެވަޑައިގެންނެވި އެއްވެސް ވައުދެއް މިހާތަނަށް ފުއްދާފައިނުވާ ކަމަށާއި، މިއީ ގައުމެއްގެ ހަޔާތުން ބޭކާރުވި ދެއަހަރާ ބައި ކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އަހުމަދު ދީދީ ވިދާޅުވެއްޖެ އެވެ.
ބުރާސްފަތި ދުވަހުގެ ރޭ އެމްޑީޕީން ކުރިއަށް ގެންދިޔަ ހަރުގެ ޖަލްސާގައި މެންބަރު އަހުމަދު ދީދީ ވިދާޅުވީ ރައީސް މުއިއްޒު ވަމުންދާ ވައުދުތަކަކީ މިއަދު ނޫން މާދަމާގެ ވައުދުތަކެއް ކަމަށާއި، މިވެރިކަމުގައި ދެ އަހަރާއި ބަޔަކީ ބޭކާރު ވެގެން ދިޔަ ދުވަސްތަކެއް ކަމަށެވެ.
އައްޑޫ ސިޓީއަށް އިޝާރާތް ކުރައްވައި މެންބަރު އަހުމަދު ދީދީ ވިދާޅުވީ ރައީސް މުއިއްޒު އައްޑޫގެ ތަރައްގީއަށް ވެވަޑައިގެންނެވި އަދި ވައުދުނާމާގައި ލިޔުއްވާފައިވާ އެއްވެސް ވައުދެއް މިހާތަނަށް ފުއްދާފައިނުވާ ކަމަށާއި، މިހާރު އެ މަޝްރޫއުތައް ކުރިއަށް ގެންދާނެ ކަމާމެދު ސުވާލު އުފެދިފައިވާ ކަމަށެވެ.
ޚާއްސަ އިސްކަމެއްދީގެން އައްޑޫ ސިޓީގެ ލިންކް ރޯޑު ތަރައްގީ ކުރަން ޖެހޭ ކަމަށާއި، އެގޮތަށް އެމަގު ބޭއްވުމަކީ މީހުންގެ ފުރާނައަށް އޮތް ނުރައްކަލެއް ކަމަށް އޭނާ ވިދާޅުވި އެވެ. އަދި ލިންކް ރޯޑުގެ އަމަލީ މަސައްކަތް 2024 ވަނަ އަހަރުގެ ތެރޭގައި ފަށާނެކަމުގެ ޔަގީންކަން ހައުސިން މިނިސްޓަރު ޑރ. އަބްދުﷲ މުއްތަލިބު ދެއްވި ކަމަށާއި، އަހަރެއް ފާއިތުވެގެން ދިޔައިރު ވެސް މަގުގެ އަމަލީ އެއްވެސް މަސައްކަތެއް ކޮށްފައިނުވާ ކަމަށެވެ.
މީގެ އިތުރުން މެންބަރު އަހުމަދު ދީދީ ވިދާޅުވީ، އައްޑޫ ތަމްސީލު ކުރާ މެންބަރެއްގެ ހައިސިއްޔަތުން އައްޑޫގެ ތަރައްގީ ހުއްޓިފައިވާތީ ކަންބޮޑުވާ ކަމަށާއި، މިއީ ރައްޔިތުންނަށް ނިކަމެތިކަން ލިބޭ ކަމަށެވެ.
އަޅުގަނޑުމެން އެންމެން އައްޑޫ ސިޓީ ރައްޔިތުން އެންމެ ބޮޑަށް ކަންބޮޑުވާ އެއް ކަމެއް އައްޑޫ ސިޓީގެ އަގުބޮޑެތި މުދާ ހަލާކުވެގެން މިދަނީ. ލިންކް ރޯޑު. އޭރު އެމްޑީޕީން ވިސްނާފައި ވަނީ އަދި މަސައްކަތް ކުރަމުން ގެންދިޔައީ އައްޑޫސިޓީގައި ހިންގަމުން ދިޔަ 114 ކިލޯމީޓަރުގެ ރޯޑު ޑިވަލޮޕްމަންޓް ޕްރޮޖެކްޓް ނިމޭއިރަށް ފޭސް-2ގެ ދަށުން ހަމަ އެނިމޭއިރަށް އެކުންފުންޏާ ހަވާލުކޮށްގެން ނޫނީ އެހެން ކުންފުންޏާ ހަވާލުކޮށްގެން ނަމަވެސް ލިންކް ރޯޑު އަލުން ހަދައި، އަދި ތާރު ނޭޅި ރަނގަޅު ފެންވަރަށް ނުހެދި ހުރިހާ މަގެއް ވެސް ހަދަން. ރައީސް މުއިއްޒު އައްޑޫއަށް ވަޑައިގެން ވިދާޅުވީ މިހުރިހާ ކަމެއް އެމްޑީޕީން ކުރަމުން މިގެންދާ ކަންތައްތަކަށްވުރެ މާރަނގަޅަށް ތިމަންމަނިކުފާނު ކޮށްދޭނަމޭ.މަރަދޫ ދާއިރާގެ މެންބަރު އަހުމަދު ދީދީ
މެންބަރު އަހުމަދު ދީދީ ވިދާޅުވީ ކުރިއަށް އޮތް ލޯކަލް ކައުންސިލް އިންތިޚާބަކީ ރައްޔިތުންގެ ތާއީދު މިސަރުކާރަށް ނެތްކަން ހާމަ ކުރުމަށް ލިބޭ ވަރަށް ބޮޑު ފުރުސަތެއް ކަމަށެވެ. ގައުމުގެ ހާލަތަށް ބަލާއިރު، ސަރުކާރުގެ ކެންޑިޑޭޓުންނަށް ވޯޓު ދޭން ޖެހޭ އެއްވެސް ސަބަބެއް ނެތް ކަމަށާއި، ގައުމުގެ ހައްގުގައި ރައްޔިތުން ތެދުވުމަށް އޭނާ ގޮވާލެއްވި އެވެ.
