އެމްއެމްޕީއާރުސީ ޚިޔާނާތުގެ ލިސްޓުގައި ނަން އޮތް ބޭފުޅުން ރައީސް މުއިއްޒުގެ ޕީއެންސީ އިން މިފަހަރުގެ ލޯކަލް ކައުންސިލް އިންތިހާބުގެ ކެނޑިޑޭޓުންގެ ގޮތުގައި ނެރެފައިވޭ: ގަފޫރު
އެމްއެމްޕީއާރުސީގެ ޚިޔާނާތުގެ ފައިސާ ލިބުނު ލިސްޓްގައި ޕީއެންސީ ގެ ފަރާތުން މާލޭ މޭޔަރު ކަމަށް ވާދަކުރާ މޫސާ އަލީ ޖަލީލުގެ ނަން ހިމެނޭ އިރު، މި މައްސަލައިގައި އޭނާގެ މައްޗަށް މަނީ ލޯންޑްރިންގެ ދައުވާ ކޮށްދިނުމަށް އޭސީސީ އިން ޕީޖީ އޮފީހަށް ފޮނުވާފައިވޭ.
ބުރާސްފަތި ދުވަހުގެރޭ އެމްޑިޕީ އިން ބޭއްވި ހަރުގެ ޖަލްސާގައި ގަފޫރު ވާހަކަ ދައްކަވަނީ | ރާއްޖެ އެމްވީ
އެމްއެމްޕީއާރުސީ މެދުވެރިކޮށް ހިންގި ބިޔަ ޚިޔާނާތުގެ ފައިސާ ލިބުނު މީހުންގެ ލިސްޓްގައި ހިމެނޭ ބޭފުޅުން، ރައީސް މުއިއްޒުގެ ޕީއެންސީ އިން މިފަހަރުގެ ލޯކަލް ކައުންސިލް ތަކުގެ އިންތިހާބުގެ ކެނޑިޑޭޓުންގެ ގޮތުގައި ނެރެފައިވާ ކަމަށާއި، އެބޭފުޅުންނަށް ދިވެހިރައްޔިތުން ދޭނެ ވޯޓެއް ނޯންނާނެ ކަމަށް އެމްޑީޕީގެ ވަގުތީ ޗެއަރޕާސަން އަބްދުލް ގަފޫރު މޫސާ (ގަޕޯ) ވިދާޅުވެއްޖެ އެވެ.
އެމްޑީޕީ އިން ބުރާސްފަތި ދުވަހުގެރޭ ބޭއްވި ހަރުގެ ޖަލްސާގައި ވާހަކަ ދައްކަވަމުން ހަނިމާދޫ ދާއިރާގެ ރައްޔިތުންގެ މަޖިލީހުގެ މެމްބަރުގެ ގޮތުގައި ވެސް ހުންނެވި ގަފޫރު ވިދާޅުވީ، ސަރުކާރުން ނެރެގެން އުޅޭ ކެނޑިޑޭޓުންގެ ނަން އެމްއެމްޕީއާރުސީގެ ވައްކަމުގެ ލިސްޓްގައި އޮންނާނެ ކަމަށެވެ. ގަފޫރު ވިދާޅުވީ، މި ބޭފުޅުންނަށް ދިވެހި ރައްޔިތުން ވޯޓު ދޭނެ ކަމަށް ހީކުރެއްވިޔަސް ޚިޔާނާތުގެ ބައިވެރިންނަށް ދިވެހިރައްޔިތުން ވޯޓު ނުދޭނެ ކަމުގަ އެވެ. އެއްވެސް ރައްޔިތަކު މިއިން ބޭފުޅަކަށް ދޭނެ ވޯޓެއް ނޯންނާނެ ކަމަށް އޭނާ ތަކުރާރުކޮށް ވިދާޅުވި އެވެ.
ތިބޭފުޅުން ބައްލަވާ މިބޭފުޅުން ނެރުއްވައިގެން އުޅުއްވާ ކެނޑިޑޭޓުގެ ނަން އޮންނާނެ އެމްއެމްޕީއާރުސީ ގެ ވައްކަމުގެ ލިސްޓްގަ. ބައްލަވާ، އަޅުގަނޑު މިބުނީ އޮންނާނެ އޭ. އެ ލިސްޓްގަ މި ސަރުކާރުގެ ކެނޑިޑޭޓުންގެ ނަން، ދިވެހި ރައްޔިތުންގެ ފައިސާ އިން އެމްއެމްޕީއާރުސީ ގެ ފައިސާ އަށް ޚިޔާނާތްތެރިވި މީހުންގެ ތެރޭގަ އެބޭފުޅުންގެ ނަން އޮންނާނެ . އަޅުގަނޑު މިބުނީ އޮންނާނެ އޭ. ދެން މި ބޭފުޅުންނަށް ދިވެހި ރައްޔިތުން ވޯޓު ދެއްވާނެ ކަމަށްތޯ ހީފުޅު ކުރައްވަނީ. ނޫން ނުދޭނެ. ހަމަ އެއްވެސް ރައްޔިތަކު ނުދޭނެ. އެއްވެސް ރައްޔިތަކު މިއިން ބޭފުޅަކަށް ދޭނެ ވޯޓެއް ނޯންނާނެ. ރައްޔިތުން މިތިބީ ގަދަޔަށް މި އަނިޔާވެރިކަމުން ސަލާމަތްވުމަށްޓަކާ ކުރަންޖެހޭ އެންމެހާ މަސައްކަތް ކުރުމަށް ތައްޔާރަށް.އެމްޑީޕީގެ ވަގުތީ ޗެއަރޕާސަން އަބްދުލްގަފޫރު މޫސާ
މި ފަހަރު މިނެގޭ ކައުންސިލް ވޯޓުގައި ރައްޔިތުން މި ސަރުކާރަށް ބޮޑު ތަނުން ނޫނެކޭ ބުނާނެ ކަމަށް ކުރިން ސިފައިންގެ ޚިދުމަތުގައި އުޅުއްވުމަށް ފަހު ސިޔާސީ ދާއިރާ އަށް ނުކުންނެވި ގަފޫރު ވިދާޅުވި އެވެ. ދެން އަންނަ އެމްޑީޕީ ސަރުކާރެއް ގައި ލާމަރުކަޒީ ނިޒާމުގެ ފޮނިމީރުކަން ރައްޔިތުން ބޭނުންވާ ގޮތަށް އެމްޑީޕީ އިން ފޯރުކޮށްދޭނެ ކަމަށް ވެސް ގަފޫރު ވިދާޅުވި އެވެ.
ގަފޫރު ގެ ވާހަކައިގައި އިޝާރާތް ކުރެއްވީ ކޮން ކެނޑިޑޭޓެއް ކަމެއް ވިދާޅެއް ނުވެ އެވެ. އެހެން ނަމަވެސް، އެމްއެމްޕީއާރުސީ ގެ ޚިޔާނާތުގެ ފައިސާ ލިބުނި މީހުންގެ ލިސްޓްގައި، މާލެ ސިޓީގެ މޭޔަރު ކަމަށް ސަރުކާރު ހިންގާ ޕީއެންސީ ޓިކެޓުގައި ވާދަކުރާ ކުރީގެ ޗީފް އޮފް ޑިފެންސް ފޯސް އަދި ކުރީގެ ޑިފެންސް މިނިސްޓަރު މޫސާ އަލީ ޖަލީލުގެ ނަން ހިމެނޭ ކަން ކުރިން ވަނީ ހާމަވެފަ އެވެ. އެ ލިސްޓްގައި ވާ ގޮތުން ފިނިފެންމާ ލޯންޗް ގޮވި ހާދިސާ ހިނގި ދުވަހު މެންދުރު، ސްޓެލްކޯ ކައިރިން 500،000 (ފަސް ލައްކަ) ރުފިޔާ މޫސާ އަލީ ޖަލީލު ހޯދާފައިވާ ކަމަށް ރިޕޯޓު ކޮށްފައިވެ އެވެ. 2014 އަދި 2015 ވަނަ އަހަރު ވެސް އެކި ފަހަރު މަތިން ޖުމްލަ 1،500،000 (ދޮޅު މިލިއަން) ރުފިޔާ މޫސާ އަލީ ޖަލީލު ހޯދާފައިވާ ކަމަށް އެމްއެމްޕީއާރުސީ ލިސްޓް ގައިވެ އެވެ.
އެމްއެމްޕީއާރުސީ ހިޔާނާތާއި ގުޅިގެން ކުރީގެ ޑިފެންސް މިނިސްޓަރު މޫސާ އަލީ ޖަލީލުގެ މައްޗަށް ދައުވާކޮށްދިނުމަށް ފޮނުވައިފި
މި މައްސަލައިގައި 2023 ވަނަ އަހަރު މޫސާ އަލީ ޖަލީލްގެ މައްޗަށް ދައުވާކޮށްދިނުމަށް އެދި އެންޓި ކޮރަޕްޝަން ކޮމިޝަން (އޭސީސީ) އިން ޕްރޮސިކިއުޓަރ ޖެނަރަލްގެ އޮފީހަށް ވެސް ފޮނުވާފައިވެ އެވެ. އޭސީސީ އިން އޭރު މީޑިއާތަކަށް ފޮނުވި މެސެޖެއްގައި ބުނީ، ޓޫރިޒަމްގެ ބޭނުމަށް ރަށްތަކާއި ފަޅުތައް ކުއްޔަށް ދޫކޮށްގެން އެމްއެމްޕީއާރުސީ އަށް ލިބުނު ފައިސާގެ ތެރެއިން އަހުމަދު އަދީބު އަބްދުލް ގަފޫރު މެދުވެރިކޮށް މޫސާ އަލީ ޖަލީލަށް ލިބިފައިވާ ފައިސާ އަކީ ކުށްކޮށްގެން ހޯދާފައިވާ ފައިސާ ކަމަށެވެ.
އެއީ އެކަށީގެންވާ ސަބަބުގެ މައްޗަށް ބިނާކޮށް ޝައްކުކުރެވޭ ހާލަތުގައި ހުރެ މޫސާ އަލީ ޖަލީލު ހޯދާފައިވާ ފައިސާކަމާއި، އެ ފައިސާ އޭނާގެ އަމިއްލަ ބޭންކް އެކައުންޓަށް ޖަމާކޮށް އަމިއްލަ ބޭނުންތަކަށް ބޭނުންކޮށްފައިވާކަން ތަހުގީގަށް ހޯދިފައިވާ ކަމަށް އޭސީސީ އިން ބުނެފައިވެއެވެ.
މި މައްސަލައިގައި މޫސާ އަލީ ޖަލީލުގެ މައްޗަށް ދައުވާކޮށްދިނުމަށް އެދި ޕީޖީ އޮފީހަށް ފޮނުވާފައިވަނީ މަނީ ލޯންޑްރިން އަދި ޓެރަރިޒަމްއަށް ފައިނޭންސްކުރުން ހުއްޓުވުމުގެ ގާނޫނުގެ 5 ވަނަ މާއްދާގެ (ހ) ގައި ބަޔާންކޮށްފައިވާ މަނީ ލޯންޑްރިންގެ ކުށުގެ ދައުވާ އެވެ.
