ވައުދުވާ މޫސުން ނިމިއްޖެ، ކައުންސިލް އިންތިޚާބުގައި ރައްޔިތުން ނުކުމެ ވަރަށް ރަނގަޅަށް ސަރުކާރަށް ރިޕޯޓު ދޭން ޖެހޭ: އަމްރު
މިސަރުކާރަށް ދެ އަހަރާއި ބައި ވެގެންދާއިރު، ހުރިހާ ކަމެއް ދަނީ އިދިކޮޅަށްކަން ފާހަގަކުރައްވައި އަމްރު ވިދާޅުވީ ކުރިއަށް އޮތް ކައުންސިލް އިންތިޚާބުގައި ސަރުކާރުގެ ކެންޑިޑޭޓުންނަށް ވޯޓު ދިނުމުގައި ރައްޔިތުން ވިސްނަން ޖެހޭ ކަމަށް. އަމްރު ވިދާޅުވީ ވިދާޅުވީ މިސަރުކާރު އައިފަހުން މިހާތަނަށް ރައްޔިތުން ޓެކްސްގެ ގޮތުގައި 100 ބިލިއަނަށް ވުރެ ގިނަ ފައިސާ ދެއްކި ނަމަވެސް ގައުމާއި ރައްޔިތުންނަށް ލިބުނު ކުރިއެރުމެއް ނެތް ކަމަށް.
އެމްޑީޕީން ބޭއްވި ނޫސްވެރިންގެ ބައްދަލުވުމުގައި އެސްޓީއޯގެ ކުރީގެ މެނޭޖިންގ ޑިރެކްޓަރު ހުސައިން އަމްރު ވާހަކަ ދައްކަވަނީ | ރާއްޖެއެމްވީ
ވައުދުވާ މޫސުން ނިމިފައިވާ ކަމަށާއި، ކުރިއަށް އޮތް ލޯކަލް ކައުންސިލް އިންތިޚާބުގައި ރައްޔިތުން ނުކުމެ ވަރަށް ރަނގަޅަށް ސަރުކާރަށް ރިޕޯޓު ދޭން ޖެހޭ ކަމަށް އެސްޓީއޯގެ ކުރީގެ މެނޭޖިންގ ޑިރެކްޓަރު ހުސައިން އަމްރު ވިދާޅުވެއްޖެ އެވެ.
ބުރާސްފަތި ދުވަހު އެމްޑީޕީން ބޭއްވި ނޫސްވެރިންގެ ބައްދަލުވުމުގައި އަމްރު ވިދާޅުވީ، ރައީސް ޑރ.މުހައްމަދު މުއިއްޒު ވެރިކަމަށް ވަޑައިގެންނެވުމަށްފަހު އެންމެ ފުރަތަމަ ރައްޔިތުންގެ ކިބައިން އެދުނީ ރައްޔިތުންގެ މަޖިލީހުގެ މެޖޯރިޓީ ސަރުކާރަށް ދިނުމަށް ކަމަށެވެ.
މަޖިލީހުގެ މެޖޯރިޓީ ނުލިބި ރައްޔިތުންނަށް ޚިދުމަތް ނުދެވޭނެ ކަމަށާއި، މިހާރު ރަނގަޅު ކުރަން ޖެހޭ ކަންކަން ރަނގަޅު ނުކުރެވޭނެ ކަމަށް އެމަނިކުފާނު ވިދާޅުވި ކަމަށެވެ.
އެގޮތުން މަޖިލިސް ސަރުކާރަށް ލިބިއްޖެ ނަމަ، ތަކެތީގެ އަގު ދަށް ކުރުމާއި، އިތުރު އިންވެސްޓްމަންޓުތައް ރާއްޖެއަށް ގެނައުމާއި، ބޯހިޔާވަހިކަމުގެ މައްސަލައަށް ހައްލު ހޯދުމާއި، ޑޮލަރުގެ އަގާއި، ތާށިކަމަށް ހައްލު ހޯދައިދޭނެ ކަމުގެ ޔަގީންކަން ރައްޔިތުންނަށް ދިން ކަމަށް އަމްރު ވިދާޅުވި އެވެ.
ނަމަވެސް މިސަރުކާރަށް ދެ އަހަރާއި ބައި ވެގެންދާއިރު، ހުރިހާ ކަމެއް ދަނީ އިދިކޮޅަށްކަން ފާހަގަކުރައްވައި އަމްރު ވިދާޅުވީ ޑޮލަރު މާރު ކުރުމަށް ސަރުކާރުން މަޖުބޫރު ކުރުވައި، ގާނޫނަށް ގެނައި ބަދަލާއެކު ސަރުކާރަށް ގިނަ އަދަދެއްގެ ޑޮލަރު ވަންނަ ކަމަށާއި، ނަމަވެސް ރިޒާވުން ޑޮލަރު ނުފެންނަ ކަމަށެވެ. އަދި ވިދާޅުވީ ދެ އަހަރާ ބައިގެ ތެރޭގައި ޑޮލަރުގެ އަގު 25 ޕަސެންޓް ބޮޑު ވެފައިވާ ކަމަށާއި، ރައްޔިތުން ކުރަން ޖެހޭ ހަރަދު އިންތިހާއަށް ބޮޑުވެ ދިރިއުޅުން ދަތިވެފައިވާ ކަމަށެވެ. މިކަންކަމާ ގުޅޭގޮތުން ސުވާލު ކޮށްލާނެ ޕީއެންސީގެ މަޖިލިސް މެންބަރެއް ނެތް ކަމަށް އޭނާ ވިދާޅުވި އެވެ.
އެހެންކަމުން ކުރިއަށް އޮތް ކައުންސިލް އިންތިޚާބުގައި ސަރުކާރުގެ ކެންޑިޑޭޓުންނަށް ވޯޓު ދިނުމުގައި ރައްޔިތުން ވިސްނަން ޖެހޭ ކަމަށް އަމްރު ވިދާޅުވި އެވެ. އަދި ވިދާޅުވީ ދެ އަހަރާއި ބައިގެ ތެރޭގައި ކަންކަން ހިނގާފައިވާ ގޮތަށް ބަލައި، ރިޕޯޓު ދޭން ޖެހޭ ކަމަށާއި، މިހާރު ވައުދުވާ މޫސުން ނިމިފައިވާ ކަމަށެވެ.
އަމްރު ވިދާޅުވީ ކައުންސިލް އިންތިޚާބާ ދިމާކޮށް ސަރުކާރުން ގިނަ މަޝްރޫއުތައް ފަށައި، އެއްބަސްވުންތަކުގައި ސޮއިކުރި ނަމަވެސް އެއީ ރައްޔިތުންނަށް ދައްކާ ހުވަފެނެއް ކަމަށެވެ.
މިވީ ދެއަހަރާ ބައިގެ ތެރޭގައި މިއީ ވައުދުވާ މޫސުމެއް ނޫން. މިއީ ރިޕޯޓު ދޭ މޫސުން. އެހެންވީމަ ރައްޔިތުން ނުކުމެ މިފަހަރު ސަރުކާރަށް ރަނގަޅު ރައްދެއް ދޭން ޖެހޭ. ރަނގަޅު މެސެޖެއް ދޭން ޖެހޭ. ކަންކަން ގޯސްކޮށް ދާ ކަމަށްވަންޏާ އެވާހަކަ ދައްކަން އެބަ ޖެހޭ. ނިޔާޒު ފާހަގަކުރެވި ފަދައިން ކައުންސިލްތަކަކީ ސަރުކާރުގެ އެކްސްޓެންޝަނެއް ނޫން. އަދި ސަރުކާރަށް އެއްބާރުލުން ދޭން ޖެހޭ ބައެއް ނޫން. އެމީހުންގެ މަސައްކަތަކީ އެ މުޖުތަމައުއަށް ބޭނުންވާ ކަންކަން ފޯރުކޮށް ދިނުން. ރަނގަޅު ކޮށްދިނުން.އެސްޓީއޯގެ ކުރީގެ މެނޭޖިންގ ޑިރެކްޓަރު ހުސައިން އަމްރު
މީގެ އިތުރުން އަމްރު ވިދާޅުވީ ވިދާޅުވީ މިސަރުކާރު އައިފަހުން މިހާތަނަށް ރައްޔިތުން ޓެކްސްގެ ގޮތުގައި 100 ބިލިއަނަށް ވުރެ ގިނަ ފައިސާ ސަރުކާރަށް ދައްކާފައިވާ ކަމަށެވެ.
ނަމަވެސް ގައުމާއި ރައްޔިތުންނަށް ލިބުނު ކުރިއެރުމެއް ނެތް ކަމަށާއި، މީގެ ކުރިން ލިބުނު ބޭސް ވެސް ނުލިބި ސިއްހީ ޚިދުމަތް ހޯދުކަށް ތަކުލީފު އުފުލަން ޖެހިފައިވާ ކަމަށް އޭނާ ވިދާޅުވި އެވެ.
