"މިސްކިތްތަކަށް ވެސް މީހުން ނެގުން މިސަރުކާރުން ވަނީ ހުއްޓުވާފަ" - މޭޔަރު އާދަމް އާޒިމް
މިހާރުގެ ރައީސުލްޖުމްހޫރިއްޔާ މާލެ ސިޓީ މޭޔަރު ކަމުގައި ހުންނެވި އިރު މިސްކިތްތަކާ މެދު ވަރަށް އިހާނެތިކޮށް ކަންތައް ކުރެއްވިކަން އާޒިމް ފާހަގަ ކުރެއްވި.
މާލެ ސިޓީގެ މޭޔަރު އާދަމް އާޒިމް | ރާއްޖެ އެމްވީ
މިސްކިތްތަކަށް ބޭނުންވާ މުވައްޒަފުން ނެގުންވެސް މިސަރުކާރުން ހުއްޓުވާފައިވާކަމަށް މާލެ ސިޓީގެ މޭޔަރު އާދަމް އާޒިމް ވިދާޅުވެއްޖެ އެވެ.
އެމްޑީޕީ ހަރުގެ ޖަލްސާގައި ބުރާސްފަތި ދުވަހުގެ ރޭ ވާހަކަ ދައްކަވަމުން މޭޔަރު އާޒިމް ވިދާޅުވީ، 2015 ވަނަ އަހަރު މާލެ ސިޓި ކައުންސިލް މަގުމަތި ކޮށްލީ މިހާރު ވެރިކަމުގައި ހުންނެވި މުއިއްޒުގެ މިނިސްޓަރު ކަމުގައި ކަމަށާއި އޭގެ ފަހުން ލާމަރުކަޒީ ނިޒާމުގެ ޗެމްޕިއަން އެމްޑީޕީ އިން 2018 ވަނަ އަހަރު ވެރިކަމާއި ހަވާލުވެ ކައުންސިލްތައް ބާރުވެރި ކުރުމަށްޓަކައި ކައުންސިލް ތަކަށް ބާރުތައް ދިން ކަމަށެވެ.
މޭޔަރު ވިދާޅުވީ އޭގެ ފަހުން އަނެއްކާ މުއިއްޒު ވެރިކަމަށް ވަޑައިގެން އަނެއްކާ ވެސް ކައުންސިލް ތަކަށް ލިބިދީފައި އޮތް ބާރު އަތުލާ 2015 ވަނަ އަހަރު ކަންކުރި ގޮތަށް ކަންކުރަން މިސްރާބު ހިފާފައިވާ ކަމަށެވެ. އަދި މިހާރުވަނީ ވަރަށް ބޮޑަށް ބާރުތައް ހަނިކޮށް މުވައްޒަފުން ނެގުން ހުއްޓުވާފައިވާ ކަން ފާހަގަކުރައްވާ މޭޔަރު ވިދާޅުވީ އެންމެ ކުޑަމިނުން މިސްކިތްތަކަށް ބޭނުންވާ މުވައްޒަފުން ވެސް ނުނެގޭ ކަމަށެވެ.
އާޒިމު ވިދާޅުވީ، މިސްކިތްތަކަށާއި ދީނީ ކަންކަމަށް އެންމެ ބޮޑަށް އިސްކަންދީފައިވަނީ އެމްޑީޕީގެ ވެރިކަމުގައި ކަމަށާއި އަދި އެމްޑީޕީ އަށް ނިސްބަތްވާ މޭޔަރެއްގެ ގޮތުން އޭނާ ގެ މޭޔަރު ކަމުގައި ކަމަށެވެ.
މާލެ ސިޓީގެ މިސްކިތްތަކަކީ މިއިން ޒަމާނަކު ރީތި ނުކުރާ ވަރަށް އަޅުގަނޑުމެން ރީތިކޮށްފައި ހުރި ތަންތަން. ދިވެހިން ނަގައިގެން ދިވެހިން ލައިގެން މި މިސްކިތްތައް ވަނީ ސާފުތާހިރު ކުރެވި ހުރިހާ ފާހަނަ ތަކެއް ހުރިހާ ތަށިމުށި ބަދަލުކޮށް ރީތިކޮށް ހަދާފަ މިވަނީ. އަދި ހަމަ ވުޟޫ ކުރާ ތަންތަން ރީތި ތަންތަނަށް ހަދާފަ މިވަނީ. އެއި ކީއްވެގެންތޯ. އެމްޑީޕީ އަކީ މިދީނަށް ލޯބިކުރާ ވަރުގަދަ ޝަހުސިއްޔަތެއް އޮތް ދީނަށް ލޯބިކުރާ މީހުންތަކެއް އޮތް ޕާޓީ އަކަށް ވާތީ.މޭޔަރު އާދަމް އާޒިމް
މީގެ އިތުރުން މޭޔަރު އާޒިމް ވަނީ މިހާރުގެ ރައީސުލްޖުމްހޫރިއްޔާ މާލެ ސިޓީ މޭޔަރު ކަމުގައި ހުންނެވި އިރު މިސްކިތްތަކާ މެދު ވަރަށް އިހާނެތިކޮށް ކަންތައް ކުރެއްވިކަން ފާހަގަ ކުރައްވާފަ އެވެ. އެ ގޮތުން މިސްކިތްތައް ސާފު ކުރަން ބޭރު މީހުން މަގުމަތިން ނަގާފައިވާކަމަށް އާޒިމް ވިދާޅުވި އެވެ. އެހެން ނަމަވެސް މިހާރު މަސައްކަތްތައް ކުރަމުން ދަނީ ހުސް ދިވެހިން ލައިގެން ކަން އާޒިމް ފާހަގަ ކުރެއްވި އެވެ. އޭގެ އިތުރުން މާލޭގެ އާސަހާރާ މިސްކިތް ތަޅާލާފައި ހުންނަތާ އަހަރެއް ވެގެން ދިޔައިރު އަދި މޭޔަރު ކަމަށް އޭނާ ވަޑައިގަންނަވަންދެން އެތައް ހުރީ އަޅާ ނުލާ ދޫކޮށްލާފައި ކަމަށެވެ. އަދި އެ މިސްކިތް ފުރިހަމަ ކޮށް ނިންމީ ވެސް އޭނާ ގެ ބެއްލެވުމުގެ ދަށުންކަން ފާހަގަ ކުރެއްވި އެވެ.
އާޒިމް ވިދާޅުވި މިސަރުކާރުން މުވައްޒަފުން ނެގުން ހުއްޓުވިޔަސް އަމިއްލަ އަށް ގޮސްގެން ވިޔަސް މިސްކިތްތައް ސާފުތާހިރުކޮށް ބަލަހައްޓާނަން ކަމަށާއި މިސްކިތްތައް ހަލާކުވާން ދޫކޮށްލައިގެން ނުތިބޭނެ ކަމަށެވެ.
