އެއާ ފްރާންސާއި ކޭ.އެލް.އެމް އިން ދުބާއީ އާއި އިޒްރޭލް ހިމެނޭހެން މެދުއިރުމަތީގެ ދަތުރުތައް މެދުކަނޑާލައިފި

ވިލާތުގެ މަދުވެގެން ދެ އެއާލައިނަކުން މެދުއިރުމަތީގެ ސިޓީތަކަށް ކުރާ ދަތުރުތައް ވަގުތީ ގޮތުން ހުއްޓާލައިފިއެވެ.

މީގެ ތެރެއިން އެއާ ފްރާންސުން ބުނި ގޮތުގައި، ސަރަހައްދުގެ "ޖިއޯޕޮލިޓިކަލް ހާލަތު" ބަލަމުންދާތީ، ދުބާއީ އަށް ކުރާ ދަތުރުތައް ވަގުތީ ގޮތުން މެދުކަނޑާލަން ވަނީ ނިންމާފައި ކަމަށެވެ.

ނެދަލޭންޑްސްގެ ދައުލަތުގެ މީޑިއާ، އެން.އޯ.އެސް އިން ރިޕޯޓްކޮށްފައިވާ ގޮތުގައި، އެ ގައުމުގެ ކޭ.އެލް.އެމް އެއާލައިނުން ވެސް ވަނީ އިޒްރޭލް، ޔޫ.އޭ.އީ އަދި ސައުދީ އަރަބިއްޔާގެ ބައެއް ސިޓީތަކަށް ކުރާ ދަތުރުތައް ވަކި ގޮތެއް އަންގަންދެން މެދުކަނޑާލާފަ އެވެ. އަދި އިރާގާއި އީރާން ހިމެނޭހެން އެ ސަރަހައްދުގެ ބައެއް ގައުމުތަކުގެ ވައިގެ ސަރަހައްދު ބޭނުންކުރުން ވެސް އެ އެއާލައިނުން ވަނީ ހުއްޓާލާފަ އެވެ.

ފްރާންސްގެ ގައުމީ އެއާލައިން، އެއާ ފްރާންސުން އޭ.އެފް.ޕީ ނިއުސް އެޖެންސީ އަށް ހުކުރު ދުވަހު ދިން ބަޔާނެއްގައި ބުނީ، މި ބަދަލުތައް ގެނައީ "މެދުއިރުމަތީގެ މިހާރުގެ ހާލަތަށް" ރިއާޔަތްކޮށް ކަމަށެވެ. އަދި ދުބާއީގެ ދަތުރުތައް ވަގުތީ ގޮތުން ހުއްޓާލުމަށް ކުންފުނިން މިހާރު ވަނީ ނިންމާފަ އެވެ.

"އެއާ ފްރާންސުން ދަނީ ހާލަތު ވަގުތުން ވަގުތަށް ބަލަމުން. އަދި ދަތުރުތަކުގެ ތާވަލަށް އަންނަ ބަދަލުތައް އިތުރަށް ހާމަކުރަމުންދާނެ،" އެ އެއާލައިނުން ބުންޏެވެ.

ކޭ.އެލް.އެމް އިން ހުކުރު ދުވަހު ބުނި ގޮތުގައި، ތެލް އަވީވް، ދުބާއީ، ދައްމާމް އަދި ރިޔާޟް އަށް ކުރާ ދަތުރުތައް މިހާރު ވަނީ މެދުކަނޑާލާފަ އެވެ. އަދި އިރާގު، އީރާން، އިޒްރޭލް އަދި ގަލްފުގެ ބައެއް ގައުމުތަކުގެ މަތިން ދަތުރުކުރުން ވެސް ވަނީ ހުއްޓާލާފަ އެވެ.

އެ އެއާލައިނުން ދަތުރުތައް ހުއްޓާލި ސީދާ ސަބަބެއް ހާމަކޮށްފައެއް ނުވެ އެވެ. ނަމަވެސް، މިކަމާ ގުޅިގެން ނެދަލޭންޑްސްގެ ކަމާބެހޭ ފަރާތްތަކާ ގުޅިގެން މަސައްކަތް ކުރަމުންދާ ކަމަށް އެން.އޯ.އެސް އިން ބުނެފައިވެ އެވެ.

މި ބަދަލުތައް އައިސްފައިވަނީ، އެމެރިކާގެ އަސްކަރީ މަނަވަރުތަކުގެ "ބޮޑު ފައުޖެއް" ގަލްފު ސަރަހައްދަށް ދަތުރުކުރަމުންދާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ބުރާސްފަތި ދުވަހު ވިދާޅުވެފައިވާ ދަނޑިވަޅެއްގަ އެވެ. މިއީ އީރާނާ ދެކޮޅަށް އަސްކަރީ ފިޔަވަޅު އެޅުމާ ގުޅޭގޮތުން ދައްކަވަމުން ގެންދެވި އިންޒާރުތަކަށް ފަހު ޓްރަމްޕް ދެއްވި ބަޔާނެކެވެ.

"އަޅުގަނޑުމެން މިދަނީ އީރާނުގެ ކަންކަން ވަރަށް ގާތުން ބަލަމުން،" ސްވިޒަލޭންޑްގެ ޑާވޯސް ގައި ބޭއްވި ވޯލްޑް އިކޮނޮމިކް ފޯރަމް ނިންމަވާލެއްވުމަށް ފަހު އެނބުރި ވަޑައިގަންނަވަމުން، އެއާ ފޯސް ވަންގައި ނޫސްވެރިންނާ ވާހަކަދައްކަވަމުން ޓްރަމްޕް ވިދާޅުވި އެވެ.

އޭނާ އިތުރަށް ވިދާޅުވީ، "އަޅުގަނޑުމެންގެ ގިނަ އަދަދެއްގެ މަނަވަރުތައް އެ ސަރަހައްދަށް އެބަދޭ. އީރާނާ ދިމާލަށް ވަރަށް ބޮޑު އަސްކަރީ ފައުޖެއް އެބަ ދަތުރުކުރޭ،" ކަމަށެވެ.