އެމެރިކާގެ ހަނގުރާމަމަތީ މަނަވަރުތައް ދެކުނު ޗައިނާ ކަނޑުން ފުރައިގެން މެދުއިރުމައްޗަށް މިސްރާބު ޖަހައިފި

އީރާނާއި އެމެރިކާ އާ ދެމެދު މަސްލަހަތު ގޯސްވެފައިވާ ދަނޑިވަޅެއްގައި، އެމެރިކާގެ މަތިންދާބޯޓު އުފުލާ މަނަވަރު "ޔޫ.އެސް.އެސް އަބްރަހަމް ލިންކަން" އާއި އެއާ އެކު ދަތުރުކުރާ ހަނގުރާމަމަތީ މަނަވަރުތައް ދެކުނު ޗައިނާ ކަނޑުން ފުރައިގެން މެދުއިރުމައްޗަށް މިސްރާބު ޖަހާފައިވާ ކަމަށް ނިއުޔޯކް ޓައިމްސް އިން ބުރާސްފަތި ދުވަހު ރިޕޯޓުކޮށްފި އެވެ.

ނަން ހާމަނުކުރުމަށް އެދި މައުލޫމާތު ދިން ދެ އޮފިޝަލަކާ ހަވާލާދީ އެ ނޫހުން ބުނެފައިވަނީ، ކުރިއަށް އޮތް ހަފުތާއެއްހާ ދުވަހުގެ ތެރޭގައި އެ މަނަވަރުތައް އެ ސަރަހައްދަށް ފޯރާނެ ކަމަށް ބެލެވޭ ކަމަށެވެ. މީގެ އިތުރުން، އެ ސަރަހައްދަށް ގިނަ އަދަދެއްގެ ހަނގުރާމަމަތީ ބޯޓުތައް ފޮނުވުމަށް ހަމަޖެހިފައިވާ ކަމަށާއި، އޭގެ ތެރޭގައި ފައިޓާ ޖެޓުތަކާއި، ހަމަލާދޭ ބޯޓުތަކުގެ އިތުރުން ތެޔޮ އަޅައިދޭ ބޯޓުތައް ހިމެނޭނެ ކަމަށް އޮފިޝަލުން ވިދާޅުވެފައިވެ އެވެ.

ހަމައެއާއެކު، މެދުއިރުމައްޗާއި ގަލްފު ސަރަހައްދުގައި ހުރި އެމެރިކާގެ އަސްކަރީ މަރުކަޒުތައް، ވަކިން ހާއްސަކޮށް ގަތަރުގައި ހުންނަ އަލް-އުދައިދު އެއާބޭސް ރައްކާތެރިކުރުމަށްޓަކައި ވައިގެ ދިފާއީ ނިޒާމުތަކާއި މިސައިލްތައް ފޮނުވުމަށް ޕެންޓަގަން އިން ދަނީ ތައްޔާރުވަމުންނެވެ.

ނިއުޔޯކް ޓައިމްސް އިން ރިޕޯޓުކޮށްފައިވާ ގޮތުގައި، މި ފިޔަވަޅުތަކުގެ ބޭނުމަކީ އީރާނުގައި މުޒާހަރާ ކުރާ ފަރާތްތަކާ ދެކޮޅަށް އެ ގައުމުގެ ސަރުކާރުން ހިންގާ އަނިޔާވެރި އަމަލުތައް ހުއްޓުވުމަށް ބާރުއެޅުމާއި، އީރާނަށް ހަމަލާދޭން ޖެހިއްޖެ ހާލަތެއްގައި ރައީސް ޓްރަމްޕަށް އިތުރު އިޚްތިޔާރުތަކެއް ފަހިކޮށްދިނުމެވެ.

އީރާނުގައި ސަރުކާރާ ދެކޮޅަށް ބޮޑެތި މުޒާހަރާތަކެއް ކުރިއަށްދާތާ ހަފުތާތަކެއް ވެފައިވާއިރު، އެ ގައުމުގެ ސަރުކާރުން ދަނީ ބާރުގެ ބޭނުންކޮށް މުޒާހަރާތައް ހުއްޓުވުމަށް މަސައްކަތް ކުރަމުން ކަމަށް އެމެރިކާ އިން ބުނެ އެވެ. އަނެއްކޮޅުން އީރާނުން ބުނެފައިވަނީ ގައުމުގެ އެތެރޭގެ ހަމަ ނުޖެހުން ނަގާލުމުގެ ފަހަތުގައި ވަނީ އެމެރިކާ އާއި އިޒްރޭލު ކަމަށެވެ.

މުޒާހަރާވެރިންނާ ދެކޮޅަށް ހިންގާ "އަނިޔާވެރި" އަމަލުތައް ހުއްޓާނުލައިފި ނަމަ، އަސްކަރީ ފިޔަވަޅު އަޅާނެ ކަމުގެ އިންޒާރު ރައީސް ޓްރަމްޕް ވަނީ ތަކުރާރުކޮށް ދެއްވާފަ އެވެ.