އަހަރެން މަރާލައިފި ނަމަ، ދުނިޔެ އިން ވެސް އީރާން ފޮހެލާނަން: ޓްރަމްޕް

އީރާން އިން ދޭ ހަމަލާއެއްގެ ސަބަބުން އޭނާ މަރާލައިފި ނަމަ، މުޅި ދުނިޔެ އިން ވެސް އީރާން ފޮހެލާނެ ކަމަށް ވިދާޅުވެ، އެމެރިކާގެ ރައީސް ޑޮނަލްޑް ޓްރަމްޕް ވަރުގަދަ އިންޒާރެއް ދެއްވައިފި އެވެ. 

އެމެރިކާގެ ނިއު ނޭޝަން އަށް ދެއްވި އިންޓަވިޔުއެއްގައި އުމުރުން 79 އަހަރުގެ ޓްރަމްޕް ވިދާޅުވީ، އޭނާ ގެ ފުރާނަ އަށް ނުރައްކާވާ ގޮތަށް އީރާން އިން ދެމުން އަންނަ އިންޒާރު ތަކުގެ ސަބަބުން، ވަރަށް ހަރުކަށީ ފިޔަވަޅު ތަކެއް އެޅުމުގެ އިރުޝާދު ލިބިފައިވާ ކަމަށެވެ. އަދި އެކަމާ ގުޅިގެން އޭނާ އަށް އެއްވެސް ކަމެއް ދިމާވެއްޖެ ނަމަ، ދުނިޔެ އިން އީރާން ފޮހެލާނެ ކަމަށް ޓްރަމްޕް ވިދާޅުވި އެވެ. 

ޓްރަމްޕް މިހެން ވިދާޅުވެފައިވާއިރު، އީރާން އާއި އެމެރިކާއާ ދެމެދު ވަނީ ބަހުގެ ހަމަލާ ތަކެއް ބަދަލު ކޮށްފަ އެވެ. އެގޮތުން ދެ ޤައުމުގެ ލީޑަރުންނަށް އަމާޒު ކޮށްގެން ހަމަލާ ތަކެއް ދޭނެ ކަމުގެ އިންޒާރު ދީފައިވާއިރު، ބައިނަލްއަޤުވާމީ މަސްރަހުގައި މިއީ ސަމާލުކަން ލިބިފައިވާ ކަމެކެވެ. 

ޓްރަމްޕް ގެންދަވަނީ އީރާން އާއި އެ ޤައުމުގެ ރޫހާނީ ލީޑަރު އާޔަތުﷲ އަލީ ޚާމަނާއީ އަށް އިންޒާރު ދެއްވައި، އެކި ވާހަކަތައް ދައްކަވަމުންނެވެ. އެގޮތުން އެމެރިކާ އިން އީރާން އަށް، ނުވަތަ އެ ޤައުމުގެ އިސްވެރިންނަށް އަމާޒުކޮށް ހަމަލާ ދީފި ނަމަ، އީރާން އިން ފަހަތަށް ނުޖެހޭނެކަން ޓްރަމްޕް އަށް އެނގިވަޑައިގަންނަވާނެ ކަމަށް އީރާންގެ ޖެނަރަލް އަބޮލްފްޒްލް ޝެކާރްޗީ ވަނީ ވިދާޅުވެފަ އެވެ. 

އީރާންގެ ސަރުކާރުގެ މީޑިއާ އަށް ދެއްވި އިންޓަވިޔުއެއްގައި ޖެނަރަލް ވިދާޅުވީ، އީރާންގެ ލީޑަރަށް ހަމަލާ ދޭން އަތެއް ދިއްކޮށްފި ނަމަ، އީރާން އިން އެ އެތެއް ކަނޑާލާނެ ކަމަށެވެ. އަދި އެއީ ހަމަ އެކަނި ދެވޭ އިންޒާރެއް ނޫން ކަމަށް ވެސް އޭނާ ވިދާޅުވި އެވެ. އެ ފަދަ ޙާލަތެއްގެ ދިމާވެއްޖެ ނަމަ، އެފަދަ ކަމެއް ކުރި ބައެއްގެ ދުނިޔެ އަލިވެ، ސަރަހައްދުގައި އެ މީހުންނަށް ސަލާމަތް ވާނެ އެއްވެސް ފުރުސަތެއް އީރާން އިން ނުދޭނެ ކަމަށް ވެސް އޭނާ ވިދާޅުވި އެވެ. 

އީރާން އަށް އަމާޒުކޮށް ހަމަލާ ދޭނެ ކަމުގެ އިންޒާރު ޓްރަމްޕް ވަނީ ވަރަށް ގިނައިން ދެއްވައިފަ އެވެ. ޚާއްސަކޮށް އެމެރިކާގެ ރައީސް ކަމުގެ ދެ ވަނަ ދައުރަކަށް ވަޑައިގެންނެވި ފަހުން ޓްރަމްޕް ވަނީ އެ ފަދަ އިންޒާރުތައް ދިނުން އިތުރު ކުރައްވައިފަ އެވެ. އީރާންގެ ހަމަލާއެއް އެމެރިކާ އަށް އަމާޒުވެއްޖެ ނަމަ، ނުވަތަ އޭނާ އަށް އަމާޒުކޮށްފި ނަމަ، އީރާން ނައްތާލާނެ ކަމަށް ޓްރަމްޕް ވިދާޅުވެފައިވެ އެވެ. 

އީރާންގެ މި ދޭތެރެއިން މުޒާހަރާ ކުރުން ކުރިއަށް ގެންގޮސްފައިވާއިރު، އެ މުޒާހަރާ ތަކުގެ ސަބަބުން އީރާންގެ ސަރުކާރަށް ވަނީ ބޮޑު ޕްރެޝަރަކާ ކުރިމަތިލާން ޖެހިފަ އެވެ. އެއީ 1979 ވަނަ އަހަރުގެ އިސްލާމީ އިންޤިލާބަށް ފަހު، އީރާންގައި ދިމާވި ސަރުކާރާ ދެކޮޅު އެންމެ ބޮޑު އެއްވުންތައް ކަމަށް ފާހަގަ ކޮށްފައިވެ އެވެ. އެއީ އިޤްތިސާދީ ދަތި ކަމުގެ ސަބަބުން އެ ޤައުމުގައި ފެށުނު މުޒާހަރާ ތަކެކެވެ. 

އީރާން އާއި އެމެރިކާއާ ދެމެދު ނުތަނަވަސްކަން އުފެދުނީ، އެ މުޒާހަރާ ތަކަށް އެމެރިކާ އިން ހިތްވަރު ދިނުމުންނެވެ. އަދި މުޒާހަރާގެ ބައިވެރިންނަށް ހިތްވަރު ދެއްވައި ޓްރަމްޕް ވާހަކަ ދައްކަވާފައިވާއިރު، އީރާން އިން ތުހުމަތު ކޮށްފައި ވަނީ އެއީ އެމެރިކާ އަޑީގައި އޮވެގެން ކުރި ކަންތައް ތަކެއް ކަމަށެވެ.