އީރާނަށް އެމެރިކާގެ އިންޒާރު - އީރާނަށް އެނގެންޖެހޭ ވަގުތު ޖެހުމުން އެކަން އެނގޭނެ: ހަކަބީ

އީރާނުން އެގައުމުގެ ސިޔާސަތުތަކަށް ބަދަލު ނުގެނެސްފި ނަމަ، އެމެރިކާ އިން އިތުރު ހަރުކަށި ފިޔަވަޅުތަކެއް އަޅާފާނެ ކަމުގެ އިންޒާރު މައިކް ހަކަބީ ދެއްވައިފި އެވެ.

އޭނާ ވިދާޅުވި ގޮތުގައި، ރައީސް ޑޮނަލްޑް ޓްރަމްޕް ދެއްވާ އިންޒާރުތަކަކީ އަމަލީ ސިފަ ގެންނަވާނެ ކަންތައްތައްކަން އީރާނުގެ ވެރިންނަށް މިހާރު އޮންނާނީ ސާފުވެފަ އެވެ.

ހުކުރު ދުވަހު އަލް އަރަބިއްޔާގެ 'ކައުންޓަރޕޮއިންޓްސް' އަށް ދެއްވި ޚާއްޞަ ބަސްދީގަތުމެއްގައި ހަކަބީ އާ ސުވާލުކުރެވުނީ، އެމެރިކާގެ އަސްކަރީ މަނަވަރުތަކެއް އީރާނާ ދިމާލަށް ދަތުރުކުރަމުންދާ ކަމަށް ޓްރަމްޕް އިޝާރާތްކުރެއްވި ވާހަކަފުޅާ ގުޅޭގޮތުންނެވެ. ދެން އަޅާނެ ސީދާ ފިޔަވަޅެއް ހާމަކުރައްވަން ފަސްޖެހުނުކަން ފާހަގަ ކުރެވުނު ނަމަވެސް ހަކަބީ ވިދާޅުވީ، އީރާނަށް މިހާރު ވެސް ވަނީ ސާފު އިންޒާރުތަކެއް ދެވިފައި ކަމަށާއި، ރައީސް ޓްރަމްޕްގެ ވަރުގަދަ ނިންމުންތަކާ މެދު އީރާނުން ފަރުވާކުޑަކޮށްގެން ނުވާނެ ކަމަށެވެ.

"އީރާނަށް އެކަން އެނގެންޖެހޭ ވަގުތު ޖެހުމުން އެކަން އެނގޭނެ،" ހަކަބީ ވިދާޅުވި އެވެ. އަދި ޓްރަމްޕް ދެއްވާ އިންޒާރުތަކަކީ ހަމައެކަނި ދައްކަވާ ވާހަކަފުޅުތަކެއް ނޫންކަން މިދިޔަ ހޫނު މޫސުމުގައި އެމަނިކުފާނު ސާބިތުކޮށްދެއްވާފައިވާ ކަމަށްވެސް އޭނާ ފާހަގަކުރެއްވި އެވެ.

އަލް އަރަބިއްޔާ އާ ވާހަކަދައްކަވަމުން ހަކަބީ ވިދާޅުވީ، "މިދިޔަ ހޫނު މޫސުމުގައި އީރާނަށް ވަރަށް ބޮޑު ލޮޅުމެއް އެރި. އަދި ރައީސް ޓްރަމްޕް އަމަލުކުރެއްވީ ސީދާ އެމަނިކުފާނު ވިދާޅުވި ގޮތަށް،" ކަމަށެވެ.

އީރާނަށް ޔުރޭނިއަމް މުއްސަނދިކުރުމުގެ ނުވަތަ ނިއުކްލިއަރ ހަތިޔާރު އުފެއްދުމުގެ ފުރުސަތު ނުދެއްވާނެ ކަމަށް ރައީސް ތަކުރާރުކޮށް ވިދާޅުވަމުން ގެންދެވި ކަމަށާއި، ނަމަވެސް ވޮޝިންގޓަނުން އަމަލީ ފިޔަވަޅު އަޅަންދެން ތެހެރާނުން އެ އިންޒާރުތަކަށް ބޯ ނުލަނބާ އޮތް ކަމަށް އޭނާ ވިދާޅުވި އެވެ. "އެމީހުން އެމަނިކުފާނުގެ ބަސްފުޅު ގަބޫލެއް ނުކުރި. އެކަމަކު އެއީ ހަގީގަތެއްކަން އެމަނިކުފާނު ސާބިތުކޮށްދެއްވި،" ހަކަބީ ވިދާޅުވި އެވެ.

މީގެ އިތުރުން، އެމެރިކާގެ ސަފީރު ވަނީ އީރާނުގެ ދާޚިލީ ކަންކަމަށް ވެސް ވަރަށް ބޮޑަށް ފާޑުވިދާޅުވެފަ އެވެ. އީރާނުގެ ވެރިން އެގައުމުގެ ރައްޔިތުންނަށް ދިމާވެފައިވާ އިގްތިސާދީ ދަތިތައް ހައްލުކުރުމުގެ ބަދަލުގައި، ގައުމުގެ ވަސީލަތްތައް ޣައްޒާގެ ހަމާސް ޖަމާއަތަށާއި، ލުބުނާނުގެ ހިޒްބުالله އަދި ޔަމަނުގެ ހޫޘީން ފަދަ ހަނގުރާމަވެރި ޖަމާއަތްތަކަށް ހޭދަކުރާ ކަމަށް އޭނާ ތުހުމަތުކުރެއްވި އެވެ. އަދި އަމިއްލަ ގައުމުގައި މުޒާހަރާކުރާ މީހުން މަރަމުންދާ ކަމަށް ވެސް ވިދާޅުވި އެވެ.

އީރާނުގައި މިހާރު މަސްލަހަތު ގާއިމުވެފައިވާ ކަމަށާއި، މީހުން މެރުން ހުއްޓާލާފައިވާ ކަމަށް އީރާނުން ބުނާ ބުނުމަށް ރައީސް ޓްރަމްޕް ޝައްކުކުރައްވާ ކަމަށް ހަކަބީ ވިދާޅުވި އެވެ. އީރާނުގެ އަނިޔާވެރިކަމުގެ ދިގު ތާރީޚަށް ބަލާއިރު، އެއްވެސް ކަމެއް ގަބޫލުކުރެވޭނީ ހެއްކާއެކުގައި ކަމަށް އޭނާ ފާހަގަކުރެއްވި އެވެ.

"އެމަނިކުފާނު (ޓްރަމްޕް) ބޭނުންފުޅުވާނީ ހެކި. އެ ހެކި ނުލިބިއްޖެނަމަ، އެއީ އެމަނިކުފާނު ގޮތް ނިންމެވުމުގައި ބައްލަވާނެ އެންމެ މުހިންމު އެއް އަސާސް،" ހަކަބީ ވިދާޅުވި އެވެ.

މެދުއިރުމަތީގައި އެމެރިކާގެ އިތުރު އަސްކަރީ ހަރަކާތެއް ފެނިދާނެތޯ ސުވާލުކުރުމުން، ހަކަބީ ވިދާޅުވީ މިވަގުތު، ވަގުތުން ވަގުތަށް ކުރިމަތިވެދާނެ ނުރައްކަލެއްގެ އިހުސާސް ނުކުރެވޭ ކަމަށެވެ. ނަމަވެސް މެދުއިރުމައްޗަކީ ކޮންމެ ވަގުތަކުވެސް ކަންކަން ބަދަލުވެދާނެ ފަދަ ނުތަނަވަސް ސަރަހައްދެއް ކަމަށާއި، އަބަދުވެސް ސަމާލުވެ ތިބެންޖެހޭނެ ކަމަށް އޭނާ ބުންޏެވެ.

"ބޮޑު ހަނގުރާމައެއް ފެށެން އުޅޭ ކަމަކަށް އެކަކުވެސް ގަބޫލެއް ނުކުރޭ. އެކަމަކު މި ސަރަހައްދުގެ މީހުންނަށް އެނގޭ ކަންކަން ވަރަށް އަވަހަށް ބަދަލުވެދާނެކަން،" އޭނާ ވިދާޅުވި އެވެ.

ހަކަބީ އިތުރަށް ވިދާޅުވީ، އީރާނާ މެދު ނިންމާ ކޮންމެ ނިންމުމަކީ ސީދާ ރައީސް ޓްރަމްޕްގެ ނިންމެވުމެއް ކަމަށެވެ. އަދި ރައީސް ފިޔަވަޅު އަޅުއްވަން ފަސްޖެހިވަޑައިގަންނަވާނެ ކަމަށް ހީކުރާ މީހުންނަކީ ކަން ހިނގަމުންދާ ގޮތަށް ސަމާލުކަން ނުދޭ މީހުން ކަމަށްވެސް އޭނާ ވިދާޅުވި އެވެ.