އާޔަތުﷲ ޚާމަނާއީ އަށް އަމާޒުކޮށް ދޭ ކޮންމެ ހަމަލާ އަކީ މުޅި އީރާނުގެ ރައްޔިތުންނާ ދެކޮޅަށް އިޢުލާން ކުރާ "ފުރިހަމަ ހަނގުރާމަ އެއް": ރައީސް މަސްޢޫދު ޕެޒެޝްކިއަން

އާޔަތުﷲ ޚާމަނާއީ އަށް އަމާޒުކޮށް ދޭ ކޮންމެ ހަމަލާ އަކީ މުޅި އީރާނުގެ ރައްޔިތުންނާ ދެކޮޅަށް އިޢުލާން ކުރާ "ފުރިހަމަ ހަނގުރާމަ އެއް" ކަމަށް ވިދާޅުވެ އެ ގައުމުގެ ރައީސް މަސްޢޫދު ޕެޒެޝްކިއަން އިންޒާރު ދެއްވައިފި އެވެ.

އީރާނުގެ ރައީސް އާދީއްތަ ދުވަހު އެކްސް ގައި ކުރެއްވި ޕޯސްޓެއް ގައި ވިދާޅުވީ، އެމެރިކާ އާއި އެ ގައުމުގެ ބައިވެރިން އީރާނާ ދެކޮޅަށް އަޅާފައިވާ އިންސާނިއްޔަތާ ޚިލާފު ދަތިކުރުމުގެ ފިޔަވަޅުތަކަކީ އީރާނުގެ ރައްޔިތުންނަށް ކުރިމަތިވެފައިވާ އިޤްތިޞާދީ ދަތިތަކުގެ މައިގަނޑު އެއް ސަބަބު ކަމަށެވެ.

ހޮނިހިރު ދުވަހު އާޔަތުﷲ ޚާމަނާއީ ދެއްވި ބަޔާނެއްގައި ވިދާޅުވީ، ފަހަކަށް އައިސް އީރާނުގައި ހިނގި ހަމަނުޖެހުންތަކުގައި ބޭރުގެ ނުފޫޒުތަކާ ގުޅުންހުރި ފަރާތްތަކުން ހިންގި މަރުތަކާއި ހަލާކުކުރުންތަކުގެ މައިގަނޑު މުގުލަކީ އެމެރިކާގެ ރައީސް ޑޮނަލްޑް ޓްރަމްޕް ކަމަށެވެ.

އީރާނުގެ ލީޑަރު ޓްރަމްޕަކީ ކުށްވެރިއެއްގެ ގޮތުގައި ސިފަކުރައްވައި ވިދާޅުވީ، އީރާނުގެ ރައްޔިތުންނަށް ލިބުނު ގެއްލުންތަކާއި، މަރުވި މީހުންނާއި، އަދި އެ ގައުމާ ދެކޮޅަށް ކުރެވުނު ދޮގު ތުހުމަތުތަކުގެ ފުރިހަމަ ޒިންމާ އުފުލަންޖެހޭނީ އެމެރިކާގެ ރައީސް ކަމަށެވެ.

އަނެއްކޮޅުން ހޮނިހިރު ދުވަހުގެ ފަހުގެ ވަގުތެއްގައި ޓްރަމްޕް ވަނީ އިސްލާމީ ޖުމްހޫރިއްޔާ އާ ދެކޮޅަށް އޭނާގެ ހަރުކަށި ބަސްމަގު ތަކުރާރުކުރައްވައި، އާޔަތުﷲ ޚާމަނާއީގެ ޒަޢާމަތު ނިމުމަކަށް ގެނައުމަށް ގޮވާލައްވާފަ އެވެ. "ޕޮލިޓިކޯ" ނޫހަށް ދެއްވި ބަސްދީގަތުމެއްގައި ޓްރަމްޕް ވިދާޅުވީ، އީރާނަށް އައު ލީޑަރަކު ހޯދަންވީ ވަގުތު ޖެހިއްޖެ ކަމަށެވެ.

މިދިޔަ މަހުގެ ފަހުކޮޅު އީރާނު ގައި އަމާންކަމާ އެކު ފެށުނު މުޒާހަރާތައް ހަމަނުޖެހުމަކަށް ބަދަލުވީ، ޓްރަމްޕާއި އިޒްރޭލުގެ ބޮޑުވަޒީރު ބެންޖަމިން ނަތަންޔާހޫގެ ހިތްވަރު ދިނުމާއި، އެ ގައުމުތަކުގެ ޖާސޫސީ އިދާރާތަކުގެ އެހީތެރިކަމާއެކު ހަމަނުޖެހުން ހިންގާ ފަރާތްތަކުން އީރާނުގެ ރަށްތަކުގައި ހިންގި ހަރަކާތްތަކުގެ ސަބަބުންނެވެ. މި ހަމަނުޖެހުންތަކުގައި ސަލާމަތީ ބާރުތަކުގެ މީހުންނާއި އާންމުން މަރުވެ، ދައުލަތުގެ ވަސީލަތްތަކަށް ބޮޑެތި ގެއްލުންތަކެއް ދީފައިވެ އެވެ.