ސަލާމަތީ މަޖިލީހުގެ ބައްދަލުވުމުގައި އީރާން އާއި ޗައިނާ އާއި ރަޝިޔާ އިން އެމެރިކާ އަށް ވަރަށް ބޮޑަށް ފާޑު ކިޔައިފި

އީރާނު ގައި ބޭރުގެ ނުފޫޒާ އެކު ހިންގަމުންދާ ހަމަނުޖެހުންތަކާ ގުޅިގެން އދ. ގެ ސަލާމަތީ މަޖިލީހުން ބޭއްވި ކުއްލި ބައްދަލުވުމެއްގައި، އދ. އަށް ކަނޑައަޅާފައި ހުންނަވާ އީރާނުގެ ޑެޕިއުޓީ ޕާމަނަންޓް ރެޕްރެޒެންޓޭޓިވް ޣުލާމް ހުސައިން ދަރުޒީ އެމެރިކާ އަށް ވަރަށް ބޮޑަށް ފާޑުވިދާޅުވެއްޖެ އެވެ.

ބުރާސްފަތި ދުވަހު ބޭއްވި މި ބައްދަލުވުމުގައި ދަރުޒީ ވިދާޅުވީ، އެއްވެސް އަސާސެއް ނެތް ތުހުމަތުތަކެއްކޮށް، އީރާނުގައި ކުރިއަށްދާ އަމާން މުޒާހަރާތަކުގެ ނާޖާއިޒު ފައިދާ ނެގުމަށް އެމެރިކާ އިން ކުރާ މަސައްކަތްތަކުގެ ސަބަބުން އދ. އަކީ "ތިއޭޓަރަކަށް" ބަދަލުވެފައިވާ ކަމަށާއި، މިއީ ވަރަށް ލަދުވެތި ކަމެއް ކަމަށެވެ.

"އެމެރިކާގެ ސަރުކާރުން މި ގަދަރުވެރި މަޖިލިސް ތިއޭޓަރަކަށް ބަދަލުކޮށްލުމަކީ ލަދުވެތި ކަމެއް،" އޭނާ ވިދާޅުވިއެވެ. އަދި މިއީ އދ. ގެ ނިޒާމު ރޫޅާލައި، އެ މުއައްސަސާގެ އަގު ވައްޓާލުމަށް އެމެރިކާ އިން ކުރަމުންދާ މަސައްކަތުގެ ތެރެއިން ހިންގާ އަމަލެއް ކަމަށްވެސް އޭނާ އިތުރަށް ފާހަގަކުރެއްވި އެވެ.

އެމެރިކާގެ އެދުމުގެ މަތިން ބޭއްވި މި ބައްދަލުވުމަކީ، އީރާނުގެ އިގްތިސާދީ ހާލަތު ގޯސްވެ، ތަކެތީގެ އަގު އުފުލި އަދި ފައިސާގެ އަގު ވެއްޓުމާ ގުޅިގެން ފެށުނު މުޒާހަރާތަކާ ގުޅޭގޮތުން ބޭއްވި ބައްދަލުވުމެކެވެ. އަމާންކަމާއެކު ފެށުނު މި މުޒާހަރާތައް ހަމަނުޖެހުންތަކަކަށް ބަދަލުވީ އެމެރިކާ އާއި އިޒްރޭލުން އެކަމުގެ ތެރެއަށް ވަދެގަތުމާ ގުޅިގެން ކަމަށް އީރާނުން ބުނެ އެވެ.

ބޭރުގެ އެޖެންޓުންނާއި ހަތިޔާރު އެޅި ގްރޫޕްތަކުން ވަނީ މިސްކިތްތަކާއި އާންމު ވަސީލަތްތަކަށް ގެއްލުންދީފައެވެ. މި ހަމަނުޖެހުންތަކުގައި އާންމުންނާއި ސަލާމަތީ ބާރުތަކުގެ މީހުން ހިމެނޭހެން ގިނަ ބަޔަކު ވަނީ މަރުވެފަ އެވެ.

އީރާނުގެ ކަމާބެހޭ ފަރާތްތަކުން ހާމަކޮށްފައިވާ ގޮތުގައި، ހަތިޔާރު އެޅި ހަމަނުޖެހުން ހިންގާ ފަރާތްތަކުގެ ސަބަބުން އާންމުންނާއި ސަލާމަތީ ބާރުތަކުގެ އެތައް ބަޔަކު ވަނީ ޝަހީދުވެފަ އެވެ. އީރާނުގެ އިންޓެލިޖެންސް އިދާރާތަކުން ކަށަވަރުކޮށްދޭ ގޮތުގައި، މި ފަރާތްތަކަށް ބޭނުންވާ މައުލޫމާތާއި، އޮޕަރޭޝަނަލް އަދި މާލީ އެހީތެރިކަން ފޯރުކޮށްދެނީ ވޮޝިންގޓަނާއި އިޒްރޭލުގެ މޮސާޑް ޖާސޫސީ އިދާރާއިންނެވެ.

އެމެރިކާ އިން ދޮގު ފަތުރާ ކަމުގެ ތުހުމަތު

އީރާނުގެ މަންދޫބު ދަރުޒީގެ ވާހަކަފުޅުގައި، އީރާނުގެ ހަމަނުޖެހުންތައް އިތުރަށް ގޯސްކުރުމުގައި އެމެރިކާގެ ސީދާ ބައިވެރިވުން އޮތްކަން ފޮރުވުމަށްޓަކައި، އެމެރިކާ އިން "ދޮގު ހަދައި، ހަގީގަތް އޮޅުވާލަމުންދާ" ކަމަށް ވިދާޅުވެ އެކަން ކުށްވެރިކުރެއްވި އެވެ.

އޭނާ ވަނީ މާޒީގައި އެމެރިކާ އިން އީރާނާ ދެކޮޅަށް ހިންގާފައިވާ އަމަލުތަކުގެ ހަނދާން އާކޮށްދެއްވާފަ އެވެ. އެގޮތުން 1953 ވަނަ އަހަރުގެ ބަޣާވާތާއި، 1980 ގެ އަހަރުތަކުގައި ސައްދާމް ހުސައިން އީރާނާ ދެކޮޅަށް ކުރި ހަނގުރާމަ އަށް އެމެރިކާ އިން ދިން އެހީތެރިކަމާއި، 1988 ވަނަ އަހަރު އީރާން އެއަރގެ މަތިންދާބޯޓެއް ވައްޓާލައި 290 މީހުން މަރާލި ހާދިސާ އަކީ އެމެރިކާ އިން އީރާނަށް ދޭ "އެހީތެރިކަމުގެ" އަސްލު ސޫރަ ކަމަށް އޭނާ ވިދާޅުވި އެވެ.

މުޒާހަރާކުރާ މީހުން ހިމާޔަތްކުރުމުގެ ނަމުގައި އަސްކަރީ ބާރުގެ ބޭނުންކޮށްފާނެ ކަމުގެ އިންޒާރު ދިނުމަކީ ބައިނަލްއަގުވާމީ ގާނޫނުތަކާއި އދ. ގެ މުއާހަދާއާ ހިލާފު ކަމެއް ކަމަށް އޭނާ އިންޒާރު ދެއްވި އެވެ.

އެމެރިކާގެ ނުރައްކާތެރި ބަަސްމަގަށް ރަޝިއާގެ ފާޑުކިޔުން

ރަޝިޔާ އިން އދ. އަށް ކަނޑައަޅާފައި ހުންނަވާ ދާއިމީ މަންދޫބު ވަސިލީ ނެބެންޒިއާ ވަނީ އީރާނުގެ ވާހަކަތަކަށް ތާއީދުކުރައްވައި، އެމެރިކާގެ ބަަސްމަގަކީ "ނުރައްކާތެރި އަދި ޒިންމާދާރުކަން ކުޑަ" ބަސްމަގަކެއް ކަމަށް ސިފަކުރައްވާފަ އެވެ.

އޭނާ ވިދާޅުވި ގޮތުގައި، ބޭރުގެ ނުފޫޒުތަކުން މަސައްކަތް ކުރަމުންދަނީ އީރާނުގެ ސަރުކާރު ވައްޓާލައި، އެ ގައުމުގެ މިނިވަންކަމާއި ސިޔާދަތު ނަގާލުމަށެވެ. އަދި އެމެރިކާ އަކީ "ދުނިޔޭގެ ފަނޑިޔާރެއް" ކަމަށް ދެކިގެން އެ ގައުމުން ހިންގާ އަމަލުތައް ހުއްޓާލުމަށް އޭނާ ގޮވާލެއްވި އެވެ.

ޗައިނާ އިން އެމެރިކާގެ އިންޒާރުތައް ބަލައެއް ނުގަނޭ

ޗައިނާގެ ޑެޕިއުޓީ މަންދޫބު ވަނީ ހުޅަނގު އޭޝިއާ ސަރަހައްދުގައި މަސްރަހު ގޯސްވަމުންދާތީ ކަންބޮޑުވުން ފާޅުކުރައްވައި، އީރާނުގެ ދާހިލީ ކަންކަމާ ބެހުމަށް އެމެރިކާ އިން ދޭ އިންޒާރުތައް ބަލައިނުގަނެވޭނެ ކަމަށް ވިދާޅުވެފަ އެވެ.

ބެއިޖިންގް އިން ވަނީ ހުރިހާ ފަރާތްތަކަކުން ވެސް ކެތްތެރިކަން އިސްކުރުމަށާއި، މި ސަރަހައްދު އިތުރު ހަމަނުޖެހުންތަކެއްގެ ތެރެއަށް ވައްޓާލުމަށް ކުރާ މަސައްކަތްތައް ހުއްޓާލުމަށް ގޮވާލާފަ އެވެ. އދ. އިން ވެސް ވަނީ ހަމަނުޖެހުންތަކާ ގުޅޭ މިނިވަން ތަހުގީގެއް ހިންގުމަށާއި، މަސްރަހު އިތުރަށް ގޯސްވިޔަނުދިނުމަށް އިލްތިމާސްކޮށްފަ އެވެ.