އީރާނުގެ ޚާރިޖީ ވަޒީރު އެމެރިކާ އަށް އަމާޒުކޮށް މިހާތަނަށް ދެއްވި އެންމެ ވަރުގަދަ އިންޒާރު މިއަދު ދެއްވައިފި

އީރާނުގެ ޚާރިޖީ ވަޒީރު އައްބާސް އަރަގްޗީ، އެމެރިކާއަށް އަމާޒުކުރައްވައި މިހާތަނަށް ދެއްވި އެންމެ ވަރުގަދަ އިންޒާރު ބުދަ ދުަވަހު ދެއްވައިފި އެވެ.

އީރާނުގައި ކުރިއަށްދިޔަ މުޒާހަރާތަކާ ގުޅިގެން އީރާނުގެ ސަރުކާރުން އަމަލު ކުރި ގޮތާ ބެހޭ ގޮތުން އެމެރިކާ އާއި ހުޅަނގުގެ ގައުމުތަކުން ފާޑުކިޔުން އަމާޒުވެފައިވަނިކޮށް، އަރަގްޗީ ވިދާޅުވީ، އިސްލާމީ ޖުމްހޫރިއްޔާ އަށް އަލުން ހަމަލާއެއް އަތުވެއްޖެނަމަ، އަތުގައި ހުރި ހުރިހާ ވަސީލަތެއް ބޭނުން ކޮށްގެން ރައްދު ހަމަލާ ދޭނެ ކަމަށެވެ.

އީރާނުގެ ސަލާމަތީ ބާރުތަކުން މުޒާހަރާގެ ބައިވެރިން މަރާފައިވާ ކަމަށް ބުނެ، ޑާވޯސް ގައި ބޭއްވޭ ވޯލްޑް އިކޮނޮމިކް ފޯރަމަށް އަރަގްޗީ އަށް ދީފައިވާ ދައުވަތު ވަނީ ކެންސަލްކޮށްފަ އެވެ.

އޭނާގެ މި އިންޒާރު އައިސްފައި ވަނީ، އެމެރިކާގެ މަތިންދާބޯޓު އުފުލާ މަނަވަރެއް ހިމެނޭ ގްރޫޕެއް އޭޝިއާ އިން މެދުއިރުމައްޗާ ދިމާލަށް ދަތުރުކުރަމުންދާ ދަނޑިވަޅެއްގައިކަން ފާހަގަ ކުރެވެ އެވެ.

މީގެ އިތުރުން، އެމެރިކާގެ އަސްކަރިއްޔާ އިން ކެރީބިއަން ސަރަހައްދުގައި ހިންގި އޮޕަރޭޝަނެއްގައި ވެނެޒުއޭލާގެ ރައީސް ނިކޮލަސް މަދޫރޯ ހައްޔަރުކުރުމަށް ފަހު، އެމެރިކާގެ ހަނގުރާމަމަތީ ބޯޓުތަކާއި އެހެނިހެން އަސްކަރީ ސާމާނު މެދުއިރުމައްޗަށް ޖަމާވަމުންދާކަން ވަނީ ފާހަގަކުރެވިފަ އެވެ.

އަރަގްޗީ މި އިންޒާރު ދެއްވީ 'ދަ ވޯލް ސްޓްރީޓް ޖާނަލް' ގައި ޝާއިއުކުރި ލިޔުމެއްގަ އެވެ. އެ ލިޔުމުގައި އޭނާ ވިދާޅުވެފައި ވަނީ، އީރާނުގައި ހިނގައިދިޔަ ހަމަނުޖެހުންތަކުގެ ނުރައްކާތެރި މަރުހަލާ 72 ގަޑިއިރަށްވުރެ ކުރު މުއްދަތެއްގައި ނިމުމަކަށް އައިސްފައިވާ ކަމަށެވެ. އީރާނުން ބުނަމުން އައިސްފައިވަނީ ސުލްހަވެރި އިހުތިޖާޖު ގަބޫލު ކުރާ ކަމަށާއި އެހެން ނަމަވެސް ތަންތަނުގައި ހުޅު ޖަހާ މީހުން މެރި މީހުންނަކީ އެމެރިކާ އާއި އިޒްރޭލުން ހިތްވަރު ދީގެން ހަމަ ނުޖެހުން އުފެއްދި ބައެއް ކަމަށެވެ.

"2025 ވަނަ އަހަރުގެ ޖޫން މަހު އީރާނުން ދެއްކި ކެތްތެރިކަމާ ޚިލާފަށް، އަލުން ހަމަލާ އެއް އަތުވެއްޖެ ނަމަ، އަހަރެމެންގެ ވަރުގަދަ އަސްކަރީ ބާރުތަކުން ފަސްޖެހުމެއް ނެތް ރައްދު ހަމަލާ ދޭނެ،" މިދިޔަ ޖޫން މަހު އިޒްރޭލުން އީރާނާ ދެކޮޅަށް ކުރި 12 ދުވަހުގެ ހަނގުރާމަ އަށް އިޝާރާތް ކުރައްވައި އަރަގްޗީ ލިޔުއްވާފައިވެ އެވެ.

"މިއީ ހަމައެކަނި ދޭ އިންޒާރެއް ނޫން، މިއީ ހަގީގަތް. ޑިޕްލޮމޭޓެއްގެ ހައިސިއްޔަތުންނާއި ހަނގުރާމައިގެ ތަޖުރިބާކާރެއްގެ ހައިސިއްޔަތުން އަހަރެން ހަނގުރާމަ އަށް ނަފްރަތުކުރަން." އަރަގްޗީ ވިދާޅުވި އެވެ.

އޭނާ އިތުރަށް ވިދާޅުވީ، ދެފަރާތުގެ މެދުގައި ކުރިމަތިލުމެއް ހިނގައިފި ނަމަ، އެކަން ވަރަށް ނުރައްކާތެރިވާނެ ކަމަށާއި، އިޒްރޭލުން އެމެރިކާ އަށް ދައްކާ ކުރު މުއްދަތުގެ ޚިޔާލީ ތަސައްވަރުތަކަށް ވުރެ މާ ގިނަ ދުވަހަށް ހަނގުރާމަ ދެމިގެންދާނެ ކަމަށެވެ. އަދި މުޅި ސަރަހައްދަށް އޭގެ އަސަރު ފޯރައި، ދުނިޔޭގެ އެކި ކަންކޮޅުތަކުގެ އާންމު ރައްޔިތުންނަށް އޭގެ ނޭދެވޭ އަސަރު ކުރާނެ ކަމަށްވެސް އޭނާ ވިދާޅުވި އެވެ.

މެދުއިރުމަތީގެ ގައުމުތަކުން، ހާއްސަކޮށް ގަލްފުގެ އަރަބި ގައުމުތަކުގެ ޑިޕްލޮމޭޓުން ވަނީ އީރާނަށް ހަމަލާ ނުދިނުމަށް ޓްރަމްޕަށް ބާރުއަޅުއްވާފަ އެވެ. މިދިޔަ ހަފްތާގައި އީރާނުން ވަނީ އެ ގައުމުގެ ވައިގެ ސަރަހައްދު ބަންދުކޮށްފަ އެވެ. މިއީ ހަމަލާއެއް އަތުވެދާނެ ކަމަށް ބަލައި އެޅި ފިޔަވަޅެއް ކަމަށް ބެލެވެ އެވެ.

ދާދިފަހުން ދެކުނު ޗައިނާ ކަނޑުގައި އޮތް 'ޔޫ.އެސް.އެސް އަބްރަހަމް ލިންކަން' މަނަވަރު މިހާރު ވަނީ އިންޑިއާ ކަނޑާ ދިމާލަށް ދަތުރުކޮށްފަ އެވެ. އެމެރިކާގެ އަސްކަރީ އޮފިޝަލަކު ވިދާޅުވީ، މި މަނަވަރާއި އޭގެ ސަޕޯޓް މަނަވަރުތައް ދަތުރުކުރަމުން ދަނީ ހުޅަނގަށް ކަމަށެވެ. މިއީ ސީދާ މެދުއިރުމައްޗަށް ކުރާ ދަތުރެއް ކަމަށް ރަސްމީކޮށް ބުނެފައި ނުވިނަމަވެސް، މިހާރު އެ މަނަވަރު އޮތް ސަރަހައްދަށް ބަލާއިރު މަދު ދުވަސްކޮޅެއްގެ ތެރޭގައި މެދުއިރުމައްޗަށް ދެވޭނެ އެވެ.

މުޒާހަރާތަކުގައި މަރުވި މީހުންގެ އަދަދު މަދުވެގެން 4،519 އަށް އަރާފައިވާ ކަމަށް އެމެރިކާގައި ހުންނަ 'ހިއުމަން ރައިޓްސް އެކްޓިވިސްޓްސް ނިއުސް އެޖެންސީ' އިން ބުނެ އެވެ. 

އީރާނުގެ ރޫހާނީ ލީޑަރު އަލީ ޚާމަނާއީ ވިދާޅުވި ގޮތުގައި، މުޒާހަރާތަކުގައި "ތިން ހާހަށްވުރެ ގިނަ" މީހުން މަރުވެފައިވެ އެވެ. އަދި މިކަމުގެ ޒިންމާ އީރާނުގެ ލީޑަރު އެޅުއްވީ އެމެރިކާގެ ބޮލުގަ އެވެ.