އީރާން އާ ދިމާލަށް އެމެރިކާގެ ބިޔަ ލަޝްކަރެއް މިސްރާބު ޖަހާފައިވާ ކަމަށް އެމެރިކާގެ ރައީސް ޓްރަމްޕް ވިދާޅުވެއްޖެ

އީރާނަށް އަމާޒުކޮށް، އެމެރިކާގެ ކަނޑުގެ ބިޔަ އަސްކަރީ ފައުޖެއް ގަލްފް ސަރަހައްދަށް މިސްރާބު ޖަހާފައިވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

އޮފިޝަލުން ހާމަކުރާ ގޮތުގައި، ކުރިއަށް އޮތް މަދު ދުވަސްތަކެއްގެ ތެރޭގައި މަތިންދާބޯޓު އުފުލާ މަނަވަރަކާއި އަސްކަރީ އިތުރު ވަސީލަތްތައް މެދުއިރުމައްޗަށް ފޯރާނެ އެވެ.

ސްވިޒަލޭންޑުގެ ޑާވޯސް ގައި އޮތް ވޯލްޑް އިކޮނޮމިކް ފޯރަމް ނިންމަވާލެއްވުމަށް ފަހު، އެނބުރި ވަޑައިގަންނަވަމުން "އެއަރ ފޯސް ވަން" ގައި ނޫސްވެރިންނާ ވާހަކަދައްކަވަމުން ޓްރަމްޕް ވިދާޅުވީ، އެމެރިކާ އިން އީރާނުގެ ހަރަކާތްތައް ވަރަށް ގާތުން ބަލަމުންދާ ކަމަށާއި، ވަރުގަދަ ލަޝްކަރެއް އެ ގައުމާ ދިމާލަށް މިހާރު ދަތުރުކުރަމުންދާ ކަމަށެވެ.

"އެއްވެސް ނުރައްކާތެރި ހާދިސާ އެއް ހިނގުމަކީ އަޅުގަނޑު އެދޭ ކަމެއް ނޫން. އެކަމަކު އަޅުގަނޑުމެން މިދަނީ އެމީހުންގެ ކަންކަން ވަރަށް ފަރުވާތެރިކަމާއެކު މޮނިޓަރ ކުރަމުން،" ޓްރަމްޕް ވިދާޅުވި އެވެ. އޭނާ އިތުރަށް ވިދާޅުވީ، ކޮންމެ ފަދަ ހާލަތަކަށް ވެސް ތައްޔާރުވުމުގެ ގޮތުން ގިނަ އަދަދެއްގެ މަނަވަރުތަކެއް އެ ސަރަހައްދަށް ފޮނުވަމުންދާ ކަމަށާއި، ނަމަވެސް އެ ބާރުގެ ބޭނުންކުރަން ނުޖެހޭނެ ކަމަށް އުއްމީދު ކުރައްވާ ކަމަށެވެ.

އަސްކަރީ ބާރުތައް އިތުރުކުރާނެކަން ޓްރަމްޕް އިޢުލާން ކުރައްވާފައި މިވަނީ، އީރާނުގައި ސަރުކާރާ ދެކޮޅަށް މުޒާހަރާކުރާ މީހުންނަށް މަރުގެ އަދަބު ނުދޭނެ ކަމުގެ ޔަގީންކަން ލިބުމާ ގުޅިގެން، އީރާނާ ދެކޮޅަށް ހަމަލާދޭނެ ކަމަށް ކުރިން ދެއްވި އިންޒާރުތަކަށް މިދިޔަ ހަފުތާގައި ކޮންމެވެސް ވަރެއްގެ ދޫދެއްވުމަކަށްފަހުގަ އެވެ.

މި ސަރަހައްދުގައި އަސްކަރީ ތައްޔާރީތައް ވަރުގަދަކުރަމުންދާކަން ޓްރަމްޕް ކަށަވަރުކޮށްދެއްވިއިރު، އެމެރިކާގެ މީޑިއާތަކުން ރިޕޯޓްކޮށްފައިވާ ގޮތުގައި "ޔޫއެސްއެސް އަބްރަހަމް ލިންކަން" މަތިންދާބޯޓު އުފުލާ މަނަވަރާއި އޭގެ ފައުޖު، ދެކުނު ޗައިނާ ކަނޑުގައި ކުރިއަށްދިޔަ ތަމްރީނުތައް މެދުކަނޑާލުމަށްފަހު މެދުއިރުމައްޗަށް ދިއުމަށް ވަނީ އަމުރުކޮށްފަ އެވެ.

ބުރާސްފަތި ދުވަހު ވާހަކަދައްކަވަމުން ޓްރަމްޕް ތަކުރާރުކޮށް ވިދާޅުވީ، އޭނާ ކުރިން ދެއްވި އިންޒާރުތަކުގެ ސަބަބުން، މުޒާހަރާކުރި 800 އަށްވުރެ ގިނަ މީހުންނަށް މަރުގެ އަދަބު ދިނުން އީރާނުން ހުއްޓާލާފައިވާ ކަމަށެވެ. އަދި އީރާނުގެ ލީޑަޝިޕާ މަޝްވަރާކުރުމުގެ ފުރުސަތު އަދިވެސް އޮތް ކަމަށް އޭނާ ވިދާޅުވިއެވެ.

ނަމަވެސް، އީރާނުގެ އޮފިޝަލުން ވަނީ މުޒާހަރާގެ ބައިވެރިންނަށް މަރުގެ އަދަބު ދިނުމުގެ އެއްވެސް ރޭވުމެއް އޮތް ކަމަށް ބުނާ ވާހަކަތައް ދޮގުކޮށްފަ އެވެ. އީރާނުގެ ދައުލަތުގެ މީޑިއާތަކުން ހާމަކޮށްފައިވާ ގޮތުގައި، ޑިސެމްބަރު މަހު ފެށުނު މުޒާހަރާތަކުގައި ޖުމްލަ 3,117 މީހުން މަރުވެފައިވާއިރު، އޭގެ ތެރޭގައި 2,427 އާންމުންނާއި ސަލާމަތީ ބާރުތަކުގެ މީހުން ހިމެނެއެވެ.

ބުދަ ދުވަހު ސީއެންބީސީ އަށް ދެއްވި ބަސްދީގަތުމެއްގައި ޓްރަމްޕް ވިދާޅުވީ، އީރާނާ ދެކޮޅަށް އިތުރު އަސްކަރީ ފިޔަވަޅެއް އަޅަން ނުޖެހޭނެ ކަމަށް އުއްމީދު ކުރައްވާ ކަމަށެވެ. އެހެންނަމަވެސް، އީރާނުން އަލުން ނިއުކްލިއަރ ޕްރޮގްރާމް ކުރިއަށް ގެންދަން ފަށައިފިނަމަ، އެމެރިކާ އިން ފިޔަވަޅު އަޅާނެ ކަމުގެ އިންޒާރު އޭނާ ދެއްވިއެވެ. "އެމީހުންނަށް ނިއުކްލިއަރ ކަންކަމެއް ނުކުރެވޭނެ،" ޓްރަމްޕް ވިދާޅުވިއެވެ. "އެމީހުން އެކަން ކޮށްފިނަމަ، ކުރިން ހިނގި ކަންތައްތައް ތަކުރާރުވާނެ،" އޭނާ އިޝާރާތް ކުރެއްވީ 2025 ވަނަ އަހަރުގެ ޖޫން މަހު އިޒްރޭލުން އީރާނާ ދެކޮޅަށް ކުރި 12 ދުވަހުގެ ހަނގުރާމައިގައި ބައިވެރިވެ، އެމެރިކާ އިން އީރާނުގެ ނިއުކްލިއަރ މަރުކަޒުތަކަށް ދިން ވައިގެ ހަމަލާތަކަށެވެ.

އަނެއްކޮޅުން، އީރާނުގެ ފޮރިން މިނިސްޓަރ އައްބާސް އަރަގްޗީ "ވޯލް ސްޓްރީޓް ޖާނަލް" ގައި ލިޔުއްވި ލިޔުމެއްގައި އެމެރިކާ އަށް އިންޒާރު ދެއްވަމުން ވިދާޅުވީ، އީރާނަށް ހަމަލާ އެއް ދީފިނަމަ، އަތުގައި ހުރި ހުރިހާ ބާރެއްގެ ބޭނުންކޮށްގެން ރައްދު ހަމަލާ ދޭނެ ކަމަށެވެ. "އަލުން އަޅުގަނޑުމެންނަށް ހަމަލާ އެއް އަތުވެއްޖެނަމަ، އަޅުގަނޑުމެންގެ ވަރުގަދަ އަސްކަރީ ބާރުގެ ބޭނުން ފުރިހަމަ އަށް ހިފުމަށް އެއްވެސް ފަސްޖެހުމެއް ނެތް،" މިނިސްޓަރު ލިޔުއްވާފައިވެއެވެ.

އަރަގްޗީ ވިދާޅުވި ގޮތުގައި މިއީ އިންޒާރެއް ނޫނެވެ. ނަމަވެސް މިއީ ހަގީގަތެކެވެ. އޭނާ އަކީ ހަނގުރާމަ އަށް ނަފުރަތުކުރާ، ޑިޕްލޮމެޓިކް ދާއިރާގެ ތަޖުރިބާކާރަކަށް ވާތީ މި ވާހަކަ ސާފުކޮށް ބުނަން ބޭނުން ވަނީ ކަމަށެވެ. އޭނާ އިތުރަށް ވިދާޅުވީ، ދެ ގައުމުގެ މެދުގައި ކުރިމަތިލުމެއް ހިނގައިފި ނަމަ، އެއީ ވަރަށް ނުރައްކާތެރި އަދި އިޒްރޭލުން ހީކުރާ ވަރަށްވުރެ މާ ދިގުދެމިގެންދާނެ ކަމެއް ކަމަށެވެ. އަދި އޭގެ އަސަރު މުޅި ސަރަހައްދަށާއި ދުނިޔޭގެ އާންމު ރައްޔިތުންނަށް ކުރާނެ ކަމަށް ވެސް އޭނާ ވިދާޅުވި އެވެ.