ގްރީންލޭންޑް ހޯދުމަކީ ގަނޑުފެންގަނޑެއް ހޯދުން ފަދަ ކަމެއްގެ ގޮތުގައި ސިފަ ކުރައްވަމުން އެތަން ހޯދަން ބާރުގެ ބޭނުން ނުކުރައްވާނެ ކަމަށް ޓްރަމްޕް ވިދާޅުވެއްޖެ
ޑެންމާކުގެ ބާރުގެ ދަށުގައިވާ ގްރީންލޭންޑްގެ ރައްކާތެރިކަން ކަށަވަރުކުރެވޭނީ ހަމައެކަނި އެމެރިކާ އަށް ކަމަށް ޓްރަމްޕް ދައްކަވާ ވާހަކަފުޅު ތަކުރާރު ކުރައްވަމުން، އެ ސަރަހައްދު މިލްކުކުރުމާ ބެހޭގޮތުން ވަގުތުން މަޝްވަރާތައް ފެށުމަށް އެދިވަޑައިގެންނެވި.
2026 ވަނަ އަހަރުގެ ޖެނުއަރީ މަހުގެ 21 ވަނަ ދުވަހު ޑާވޯސްގައި ބޭއްވި ވޯލްޑް އިކޮނޮމިކް ފޯރަމް ގެ އަހަރީ ބައްދަލުވުމުގައި އެމެރިކާގެ ރައީސް ޑޮނަލްޑް ޓްރަމްޕް ވާހަކަފުޅު ދައްކަވަނީ، | ގެޓީ އިމޭޖަސް
ގްރީންލޭންޑްގެ މިލްކުވެރިކަން ހޯދުމަށް އަސްކަރީ ބާރުގެ ބޭނުން ނުކުރައްވާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ބުދަ ދުވަހު ވިދާޅުވެއްޖެ އެވެ.
ނަމަވެސް، ޑެންމާކުގެ ބާރުގެ ދަށުގައި އޮތް އެ ސަރަހައްދުގެ ރައްކާތެރިކަން ކަށަވަރުކުރެވޭނީ ހަމައެކަނި އެމެރިކާ އަށް ކަމަށް ދައްކަވަމުން ގެންދަވާ ވާހަކަ އަނެއްކާ ވެސް ތަކުރާރު ކުރައްވާ ވިދާޅުވިއެވެ.
ޑާވޯސް ގައި ބޭއްވި ވޯލްޑް އިކޮނޮމިކް ފޯރަމްގައި ވާހަކަ ދައްކަވަމުން، ބާރުގެ ބޭނުންކޮށްފާނެ ކަމަށް ދެކެވޭ ވާހަކަތައް ޓްރަމްޕް ދޮގުކުރެއްވި އެވެ.
"ބައެއް މީހުންނަށް ހީވީ އަޅުގަނޑު ބާރުގެ ބޭނުންކޮށްފާނެ ކަމަށް، އެކަމަކު އެއީ އަޅުގަނޑު ކުރަންޖެހޭ ކަމެއް ނޫން،" އޭނާ ވިދާޅުވިއެވެ. "އަޅުގަނޑު ބާރުގެ ބޭނުންކުރާކަށް ބޭނުމެއް ނޫން، އަދި ބޭނުމެއް ވެސް ނުކުރާނަން."
ޓްރަމްޕް މިހެން ވިދާޅުވީ އިޤްތިޞާދީ ދާއިރާއާ ގުޅޭގޮތުން ދެއްވި ތަޤުރީރެއްގެ ތެރެއިންނެވެ. ނަމަވެސް، ގްރީންލޭންޑް ބައްލަވައިގަތުމަށް ޓްރަމްޕް ކުރައްވާ މަސައްކަތުގެ ސަބަބުން ޔޫރަޕާއި އެމެރިކާ އާ ދެމެދު އުފެދިފައިވާ ނުތަނަވަސްކަމުގެ ހިޔަނި މި ތަޤުރީރަށް އެޅިގެންދިޔައެވެ.
މި މައްސަލަ އަކީ "ކުޑަ ކަމެއް" ނުވަތަ "ގަނޑުފެންގަނޑެއް" ހޯދުން ފަދަ ކަމެއްގެ ގޮތުގައި ޓްރަމްޕް ސިފަކުރެއްވި އެވެ. އަދި އެ ސަރަހައްދު އެމެރިކާގެ ބާރުގެ ދަށަށް ދިއުމަކީ، ޑެންމާކާއި އެމެރިކާ ވެސް ހިމެނޭ ނޭޓޯގެ އިއްތިޙާދަށް އޮތް ނުރައްކަލެއް ނޫން ކަމަށް އޭނާ ވަކާލާތު ކުރެއްވިއެވެ.
"އެމެރިކާ ފިޔަވައި އެހެން އެއްވެސް ޤައުމަކަށް ނުވަތަ ޖަމާއަތަކަށް ގްރީންލޭންޑްގެ ރައްކާތެރިކަން ކަށަވަރުކޮށްދެވޭނެ ޤާބިލުކަމެއް ނެތް،" ޓްރަމްޕް ވިދާޅުވިއެވެ. މީގެ އިތުރުން، އެ ސަރަހައްދު މިލްކުކުރުމާ ބެހޭގޮތުން "ވަގުތުން މަޝްވަރާތައް" ފެށުމަށް އެދިވަޑައިގަންނަވާ ކަމަށްވެސް ވިދާޅުވި އެވެ.
ދުނިޔޭގެ ސިޔާސީ އަދި ވިޔަފާރީގެ ލީޑަރުން އިޤްތިޞާދީ އަދި ޖިއޯޕޮލިޓިކަލް ގޮންޖެހުންތަކާ ބެހޭގޮތުން ބަހުސްކުރަން އެއްވި ޑާވޯސް ކޮންފަރެންސް ގައި، ޓްރަމްޕްގެ މި ވާހަކަތަކަށް ބޮޑު ސަމާލުކަމެއް ލިބުނެވެ.
ނޭޓޯގެ އޮފިޝަލުން އިންޒާރު ދެއްވާފައި ވަނީ ޓްރަމްޕްގެ މި ސިޔާސަތުގެ ސަބަބުން އިއްތިޙާދުގެ ގުޅުމަށް ބުރޫއަރާފާނެ ކަމަށެވެ. ނަމަވެސް ޑެންމާކާއި ގްރީންލޭންޑްގެ ލީޑަރުން ވަނީ، ގާތްގަނޑަކަށް 57,000 މީހުންގެ އާބާދީއެއް އޮތް، އިސްތިރާތީޖީ ގޮތުން މުހިންމު އެ ސަރަހައްދުގައި އެމެރިކާ އަށް އޮންނަ ފުރުޞަތުތައް ފުޅާކޮށް، އެކުގައި މަސައްކަތް ކުރުމަށް ހުށަހަޅާފައެވެ.
"ދުނިޔޭގެ ރައްކާތެރިކަމަށްޓަކައި އަޅުގަނޑުމެން ބޭނުން ވަނީ ގަނޑުފެންގަނޑެއް، އެކަމަކު އެމީހުން އެ ދޭކަށެއް ބޭނުމެއް ނޫން،" މީހުން ފުރިފައި އޮތް ކޮންގްރެސް ހޯލެއްގައި ވާހަކަ ދައްކަވަމުން ޓްރަމްޕް ވިދާޅުވިއެވެ.
