އިތާފުށި މުވައްޒަފުންނަށް 85،000 ރުފިޔާގެ ސާވިސް ޗާޖެއް ދީފި
24 ޖެނުއަރީ 2026 | ހޮނިހިރު 06:26މަޝްހޫރު މަހުޖަނުން ޒިޔާރަތްކުރާ މި ހަތް ތަރީގެ ރިސޯޓުން، ޑިސެމްބަރު މަހު މުވައްޒަފުންނަށް ހަފްތާއަކު އެވްރެޖްކޮށް 826 ޑޮލަރު ސާވިސް ޗާޖުގެ ގޮތުގަ ދީފަވޭ.
ވޮލްޑޯފް އެސްޓޯރިއާ އިތާފުށީގެ މުވައްޒަފުން ޑިސެމްބަރު މަހު ލިބުނު 4،177 ޑޮލަރުގެ ސާވިސް ޗާޖުން ހިތްހަމަ ޖެހިފަ ތިބިކަން ދައްކުވައިދޭ ހިޔާލީ ފޮޓޯ އެއް | ރާއްޖެއެމްވީ
ރާއްޖޭގެ ފަތުރުވެރިކަމުގެ އެންމެ ކާމިޔާބު ދުވަސްވަރާ ދިމާކޮށް، ވޮލްޑޯފް އެސްޓޯރިއާ އިތާފުށި މޯލްޑިވްސް އިން ކޮންމެ މުވައްޒަފަކަށް ޑިސެމްބަރު މަހުގެ ސާވިސް ޗާޖުގެ ގޮތުގައި 4،177 ޑޮލަރު ދީފައިވާ ކަމަށް ހާމަވެއްޖެ އެވެ.
މިއީ މިހާރުގެ ޑޮލަރު ރޭޓުން ބަލާނަމަ 85،000 ރުފިޔާ އަށް ވުރެ އިތުރު އަދަދެކެވެ.
ގަތަރުގެ ޝާހީ އާއިލާ އަށް ނިސްބަތްވާ މަހުޖަނަކާ ރާއްޖޭގެ މަޝްހޫރު ވިޔަފާރިވެރިޔާ މުހައްމަދު އަލީ ޖަނާހު ގުޅިގެން ތަރައްގީކޮށްފައިވާ މި ހަތް ތަރީގެ ރިސޯޓުން ދީފައިވާ ސާވިސް ޗާޖުގެ އަދަދުތަކަށް ބަލާ އިރު، އިތާފުށީގެ ކޮންމެ މުވައްޒަފަކަށް ހަފްތާ އަކު އެވެރެޖް ކޮށް 826 ޑޮލަރު، ޑިސެމްބަރު މަހު ސާވިސް ޗާޖުގެ ގޮތުގައި ލިބިފައިވެ އެވެ. މިއީ މިހާރުގެ ރޭޓުން ބަލާއިރު 17،000 ރުފިޔާ އަށް ވުރެ އިތުރު އަދަދެކެވެ.
އިތާފުށީ އަށް ބޮޑު ސާވިސް ޗާޖެއް ލިބޭ މައިގަނޑު ސަބަބަކީ އެތަނަށް ޒިޔާރަތްކުރާ ދުނިޔޭގެ މަޝްހޫރު މަހުޖަނުން ކަމަށް މައުލޫމާތު ލިބެ އެވެ. މި ރިސޯޓަކީ ރާއްޖޭގެ އެންމެ މަތީ ފަންތީގެ ރިސޯޓްތަކުގެ ތެރޭގައި ހިމެނޭ ރިސޯޓެކެވެ.
އިތާފުށި ރިސޯޓުގެ ލަގްޒަރީ ވިލާ އެެއް
މިދިޔަ ޑިސެމްބަރު މަހު ރާއްޖޭގެ މަތީ ފަންތީގެ އެހެން ރިސޯޓްތަކުން ވެސް ވަނީ މުވައްޒަފުންނަށް ބޮޑު ސާވިސް ޗާޖެއް ބަހާފަ އެވެ. އެގޮތުން ވަން އެންޑް އޮންލީ ރީތި ރަށުން 1،977 ޑޮލަރު ބަހާފައިވާއިރު، ވެލާ ޕްރައިވެޓް އައިލެންޑުން ވަނީ 1،875 ޑޮލަރު ބަހާފަ އެވެ.
އަދި ރިއު އެޓޯލް އެންޑް ޕެލަސް އިން ވަނީ 1،239 ޑޮލަރު ބަހާފަ އެވެ. އަޔާޑާ މޯލްޑިވްސް އިން 1،197.30 ޑޮލަރު ސާވިސް ޗާޖުގެ ގޮތުގައި ދީފައިވާއިރު، ސެންޓާރާ ގްރޭންޑް ލެގޫން އިން 1،111 ޑޮލަރު ބެހިފައިވެ އެވެ. ޖޭޑަބްލިއު މެރިއޮޓް ކާފު އަތޮޅު ރިސޯޓުން ވަނީ 1،158 ޑޮލަރު ދީފަ އެވެ.
މީގެ އިތުރުން މާލޭގައި ހިންގާ ބާސެލޯ ނަސަންދުރާ ހޮޓަލުން ވަނީ، އެ ހޮޓަލުގެ ކޮންމެ މުވައްޒަފަކަށް ޑިސެމްބަރު މަހުގެ ސާވިސް ޗާޖުގެ ގޮތުގައި 748 ޑޮލަރު ދީފަ އެވެ.
ކޮންމެ އަހަރެއްގެ ވެސް ޑިސެމްބަރު އަދި ޖެނުއަރީ މަހަކީ ރާއްޖޭގެ ފަތުރުވެރިކަމުގެ އެންމެ ޕީކް ދުވަސްވަރު ކަމަށްވާތީ، މި ދުވަސްވަރު މުވައްޒަފުންނަށް ލިބޭ ސާވިސް ޗާޖު އެހެން މަސްތަކާ އަޅާބަލާއިރު އިތުރުވެގެންދެ އެވެ. މި ދުވަސްވަރަކީ ދުނިޔޭގެ އެކި ކަންކޮޅުތަކުން ފަތުރުވެރިން ރާއްޖެ އަށް އެންމެ ގިނައިން ޒިޔާރަތްކުރާ ދުވަސްވަރެވެ.
ރާއްޖޭގެ ފަތުރުވެރިކަމުގެ ސިނާއަތަކީ ރާއްޖޭގެ އިގްތިސާދުގެ އެންމެ މުހިންމު ސިނާއަތެވެ. މި ސިނާއަތުގައި މަސައްކަތްކުރާ މުވައްޒަފުންނަށް ލިބޭ ސާވިސް ޗާޖަކީ އެ މުވައްޒަފުންގެ އާމްދަނީގެ އެންމެ މުހިންމު ބައެވެ. ނަމަވެސް ސަރުކާރުން ރިސޯޓުތަކުން ޑޮލަރު މާރުކުރަން ޖެހޭ އުސޫލަށް ގެނައި ބަދަލުގެ ސަބަބުން ބައެއް ރިސޯޓުތަކުން ވަނީ ރުފިޔާ އިން ސާވިސް ޗާޖު ދޭން ފަށާފަ އެވެ.
މަސްދަރު: Resort Workers Maldives
