ޑޮލަރުގެ މައްސަލަ ހައްލު ނުވާ ސަބަބަކީ ކަޅު ބާޒާރުގައި ހުރި ފައިސާ ރާއްޖޭގައި ނޭނބުރޭ ވަރަށް އެ ފައިސާ ވެސް ސަރުކާރަށް ނެގުން: ދީދީ
މަރަދޫ ދާއިރާގެ މެންބަރު އަހުމަދު ދީދީ ވިދާޅުވީ ރިސޯޓުތަކުގައި ސަރވިސް ޗާޖު ދިވެހި ފައިސާއިން ދޭން ފެށުމުން ކުންފުނިތަކަށް ނާޖައިޒް ފައިދާ ނެގުމުގެ ފުރުސަތު ލިބި ޑޮލަރު ބާޒާރަށް ނުނެރޭކަމަށް
މަރަދޫ ދާއިރާގެ މެމްބަރު އަހުމަދު ދީދީ ރާއްޖެޓީވީގެ ފަލަ ސުރުހީ ޕްރޮގްރާމްގައި ވާހަކަދައްކަވަނީ
ޑޮލަރުގެ މައްސަލަ ހައްލު ނުވާ ސަބަބަކީ ކަޅު ބާޒާރުގައި ހުރި ފައިސާ ރާއްޖޭގައި ނޭނބުރޭ ވަރަށް އެ ފައިސާ ވެސް ސަރުކާރަށް ނެގުން ކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އަހުމަދު ދީދީ ވިދާޅުވެއްޖެ އެވެ.
އޭނާ އެފަދައިން ވިދާޅުވީ ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަމުންނެވެ.
ރިސޯޓްތަކުން ކުރިން ސަރވިސް ޗާޖުގެ ގޮތުގައި ޑޮލަރުން ފައިސާ ދިނުމުން ރިސޯޓުގައި މަސައްކަތްކުރާ މީހުންގެ އާއިލާ މީހުންނަށް ހެޔޮ އަގުގައި ޑޮލަރު ލިބޭ ކަމަށް ދީދީ ވިދާޅުވި އެވެ. ސަރުކާރުން ޑޮލަރުގެ އުސޫލަށް ގެނައި ބަދަލުތަކާއި އެކު މިހާރު ގިނަ ރިސޯޓްތަކުގައި ސަރވިސް ޗާޖު ދެނީ މިހާރު ދިވެހި ފައިސާ އިން ކަމަށް ދީދީ ވިދާޅުވި އެވެ. އެހެންކަމުން ކުންފުނިތަކަށް އެކަމުގެ ނާޖައިޒް ފައިދާ ނަގަން ވަރަށް ބޮޑަށް ފުރުސަތު ލިބުނު ކަމަށް ދީދީ ވިދާޅުވި އެވެ.
" އޭގެ ސަބަބުން ވެސް ޓައިޓް ކަމެއް އައިސްފި މާކެޓުގައި. އާއްމުކޮށް މާކެޓްތެރެ އަށް ނެރެމުންދާ އެތައް ލައްކަ ޑޮލަރެއް ނުލިބެން އެ މެދުވެރިވީ. އެ ކޮންސިކުއެންސް އަށް ނުވިސްނާ ފިޔަވަޅު އަޅާފައިވާތީ ވާ ގޮތް މިއީ. ބައެއް މީހުން ބުނޭ ބޯޓު ކައްޕި އެއް ކޮކްޕިޓަށް އެރުވިފަ އޭ މިހުރީ ރައީސް މުއިއްޒު ކަންތައް ކުރާ ގޮތުން." ދީދީ ވިދާޅުވި އެެވެ.
އޭނާ ވަނީ ބޭންކު މެދުވެރިކޮށް ވިޔަފާރި ކުރުމަށް ދޭ ޑޮލަރުގެ ރޭޓަށް އަނެއްކާ ވެސް ބަދަލުތަކެއް ގެނެސްފާނެ ކަމަށް ޤަބޫލުކުރެވޭ ކަމަށް ފާހަގަ ކުަރައްވާފަ އެވެ. ސަރުކާރުން ޑޮލަރުގެ ތާށިކަން އިސްލާހުކުރުމަށް ފިޔަވަޅުތަކެއް ނާޅާ ކަމަށާއި އެއީ ވަރަށް ބޮޑު ކަންބޮޑުވުމެއް ކަމަށް ދީދީ ވަނީ ވިދާޅުވެފަ އެވެ. ޑޮލަރު ނުލިބުމުގެ ސަބަބުން އާއްމުންނަށް އެތައް ދަތިތަކެއް ދިމާވާ އިރު އެކަމާއި މެދު ހަރުދަނާ ފިޔަވަޅުތަކެއް ނޭޅޭ ކަމަށް އޭނާ ވަނީ ވިދާޅުވެފަ އެވެ.
މީގެ އިތުރުން، ދެ އަހަރު ސަރުކާރުން ހޭދަކުރީ ދޮގު މައްޗަށް ދޮގު ހެދުމުގެ ތެރޭގައި ކަމަށް އޭނާ ވިދާޅުވި އެވެ.
